لاہور : پنجاب کے دارلحکومت لاہور میں 8 گھنٹے سے بارش کا تاریخی اسپیل جاری ہے ، اوسطاً 136 ملی میٹربارش کا نیا ریکارڈ بن گیا ہے۔
تفصیلات کے مطابق لاہور میں مون سون بارشوں کا زوردار اسپیل جاری ہے، آٹھ گھنٹوں سے جاری موسلا دھار بارش سے نشیبی علاقے زیرآب آگئے۔
ماہرین موسمیات نے اسے سنچری بارش قرار دیا ہے، جو مون سون کی شدت کی واضح علامت ہے۔
سمن آباد کا علاقہ دریا کا منظرپیش کرنے لگا، جس سے شہریوں کیلئے آمدورفت مشکل ہوگئی، سب سے زیادہ بارش نشتر ٹاؤن میں ایک سو اٹھہتر ملی میٹر ریکارڈ کی گئی جبکہ اقبال ٹاؤن اور پانی والا تالاب میں ایک سو پچھہتر ملی میٹربارش ہوئی۔
لاہور سٹی 115، لکشمی چوک 110، چوک ناخودا اور سمن آباد 109، نشتر ٹاؤن 108 ، فرخ آباد 102، گلشن راوی 98، گلبرگ 97، قرطبہ چوک 96، جیل روڈ 94، مغل پورہ 87، اور ایئرپورٹ 33 ملی میٹر ریکارڈ کی گئی ۔
زیر آب آنے والے علاقوں سے پانی کی نکاسی جاری ہے، واسا کی ٹیمیں اور افسران فیلڈ میں موجود ہیں۔
موسم سے متعلق خبریں
موسلا دھار مون سون بارش تاحال وقفے وقفے سے جاری ہے، جس نے شہر بھر میں معمولات زندگی کو متاثر کیا ہے۔
محکمہ موسمیات نے بارش کا سلسلہ جاری رہنے کی پیش گوئی کی ہے تاہم مون سون بارشوں کا دوسرا اسپیل 13 جولائی تک جاری رہنے کا امکان ہے۔
پی ڈی ایم اے پنجاب نے شہریوں سے اپیل کی ہے کہ وہ کچے گھروں، بوسیدہ عمارتوں اور بجلی کے کھمبوں یا کھلی تاروں سے دور رہیں، کیونکہ مزید بارشوں کی پیش گوئی کے باعث حادثات کا خدشہ بڑھ گیا ہے۔
نشیبی علاقوں کے مکینوں کو خصوصی احتیاط برتنے کی ہدایت کی گئی ہے، ریسکیو اور واسا ٹیموں کو فیلڈ میں رہتے ہوئے نکاسی آب کے عمل کو تیز کرنے کا حکم دیا گیا ہے۔
محکمہ موسمیات کا کہنا ہے کہ آئندہ 24 سے 48 گھنٹوں میں لاہور سمیت بالائی پنجاب کے دیگر شہروں میں مزید بارش کا امکان ہے، جس کے نتیجے میں سیلابی کیفیت پیدا ہو سکتی ہے۔
شہریوں کو مشورہ دیا گیا ہے کہ وہ غیر ضروری سفر سے گریز کریں اور بارش سے متعلق الرٹس پر توجہ دیں۔
