کراچی : پیپلز پارٹی کے مرکزی رہنما مولابخش چانڈیو نے کہا ہے کہ چوہدری نثارعلی خان نااہل وزیرداخلہ ہیں، عجلت میں بیان جاری کرنے سے پہلے سندھ حکومت سےمعلومات لیتے تو بہتر ہوتا۔ جبکہ ترجمان وزیراعلیٰ ہاؤس سندھ کا کہنا ہے کہ چوہدری نثار پہلے سانحہ ماڈل ٹاؤن کی مذمت کریں۔
تفصیلات کے مطابق پی ایس پی کی ریلی پر پولیس شیلنگ اور رہنماؤں کی گرفتاری پر وزیر داخلہ کے بیان پر پیپلز پارٹی کے رہنما مولابخش چانڈیو نے اپنے شدید ردعمل کا اظہار کیا ہے۔
ان کا کہنا ہے کہ وزیر داخلہ چوہدری نثار نااہل وزیرداخلہ ہیں، عجلت میں بیان جاری کرکے چوہدری نثار نے اپنی نااہلی ثابت کی ہے۔
انہوں نے کہا کہ چوہدری نثار پہلے سندھ حکومت سے معلومات لیتے پھر بیان جاری کرتے، انہوں نے سوال کیا کہ چوہدری نثارسانحہ ماڈل ٹاؤن کے وقت کہاں تھے؟ جب ماڈل ٹاؤن میں پی اے ٹی کے نہتے کارکنان پرگولیاں برسائی گئی تھیں، چوہدری نثارکےبیان سےسندھ کےحالات خراب ہونگے۔
علاوہ ازیں ترجمان وزیراعلیٰ ہاؤس نے بھی اپنے رد عمل میں کہا ہے کہ چوہدری نثار پہلے ماڈل ٹاؤن میں کارکنان کےقتل کی مذمت کریں، پی اےٹی کی تحریک کے ساتھ حکومت نے جو کیا سب کو یاد ہے، ہم جمہوری طریقے اپناتے ہیں،آپ کو ہماری پالیسی سمجھ نہیں آئے گی۔
ترجمان نے مزید کہا کہ جمہوری رویے پرعمل کرتے ہوئے ہی ہم پی ایس پی رہنماؤں سے مسلسل مذاکرات کررہے تھے، ریڈ زون میں دفعہ144نافذ ہے، حکومتی رٹ چیلنج کرنے والوں کیخلاف کارروائی ہوگی۔
ترجمان وزیراعلیٰ ہاؤس نے واضح کیا کہ شہر کے مختلف علاقوں میں زبردستی دکانیں بند کرانےوالوں کیخلاف بھی سخت کارروائی کی جائےگی۔
