کراچی: شہر ٖقائد میں مولانا عادل خان کی شہادت پر علما کی کال پر آج ہڑتال کی صورت حال دیکھنے میں آ رہی ہے۔
اے آر وائی نیوز کے مطابق 10 اکتوبر کو کراچی میں ٹارگٹ کلنگ میں شہید ہونے والے اسکالر مولانا عادل خان کے سلسلے میں علما کمیٹی کی کال پر آج ہڑتال کی جا رہی ہے۔
ہڑتال کے باعث سڑکوں پر پبلک ٹرانسپورٹ معمول سے کم ہے، جب کہ نجی گاڑیاں رواں دواں ہیں، کراچی میں صبح کے وقت کھلنے والی دکانیں اور کاروبار بھی بند ہیں۔
یاد رہے کہ علما کی جانب سے پُر امن ہڑتال کر کے احتجاج ریکارڈ کرانے کا کہاگیا تھا، آج بعد نماز جمعہ مختلف علاقوں میں احتجاج بھی کیا جائے گا، تاجروں اور ٹرانسپورٹرز نے ہڑتال کی حمایت کر رکھی ہے۔
مولانا عادل خان جامعہ فاروقیہ کے احاطے میں سپرد خاک
ہڑتال کے باعث حالات کو کنٹرول کر نے کے لیے سڑکوں پر پولیس اور رینجرز کا گشت معمول سے زیادہ ہے۔
گرومندر نیو ٹاؤن مسجد کے اطراف سڑکوں کو کنٹینر لگا کر سیل کر دیاگیا ہے، جس کی وجہ سے گرومندر سے جیل روڈ کی جانب اور آنے والے روڈ پر ٹریفک جام ہے۔
واضح رہے کہ دس اکتوبر کو کراچی کے علاقے شاہ فیصل کالونی نمبر 2 میں واقع شمع شاپنگ سینٹر کے قریب نامعلوم موٹر سائیکل سواروں نے ڈبل کیبن گاڑی پر فائرنگ کی جس کے نتیجے میں جامعہ فاروقیہ کے مہتمم مولانا عادل اور ان کے ڈرائیور مقصود احمد جاں بحق ہوئے۔
