اسلام آباد: مولانا فضل الرحمان نیشنل گرینڈ ڈائیلاگ کے مخالف نکلے ہیں، تاہم پیپلز پارٹی نے پیچھے ہٹنے سے انکار کر دیا ہے۔
ذرائع کے مطابق پاکستان پیپلز پارٹی کی جانب سے سیاسی جماعتوں میں نیشنل گرینڈ ڈائیلاگ جاری ہیں، سربراہ پی ڈی ایم مولانا فضل الرحمان نے نیشنل گرینڈ ڈائیلاگ کی مخالفت کر دی ہے، ان کے نزدیک ڈائیلاگ غیر ضروری ہیں۔
پی پی ذرائع کا کہنا ہے کہ نیشنل گرینڈ ڈائیلاگ پر مولانا فضل الرحمان کے مؤقف پر انھیں شدید تحفظات ہیں، ان سے قومی مکالمہ کی مخالفت ہی کی توقع تھی، پارٹی قیادت کو مولانا فضل الرحمان کے مؤقف سے آگاہ کر دیا گیا ہے، جو مولانا کو تحفظات سے آگاہ کرے گی۔
ذرائع نے بتایا کہ پی پی قیادت نیشنل گرینڈ ڈائیلاگ سے کسی طور پیچھے نہیں ہٹے گی، ملک کو بحران سے نکالنے کا واحد راستہ نیشنل گرینڈ ڈائیلاگ ہیں، یہ سیاسی صورت حال کے پیش نظر ناگزیر ہیں، سیاست میں مذاکرات کے دروازے بند نہیں کیے جا سکتے، کیوں کہ آج کے حریف کل کے حلیف ہوتے ہیں۔
پیپلز پارٹی ذرائع نے اپنا مؤقف دہرایا کہ سیاست میں مذاکرات کے بغیر آگے بڑھنا ممکن نہیں ہے، انتخابات سے ہمیشہ کے لیے فرار حاصل نہیں کیا جا سکتا، پیپلز پارٹی ایک ہی دن انتخابات کرانے کے مؤقف پر قائم ہے۔
ذرائع نے کہا کہ مذاکرات کے معاملے پر ن لیگ کے رویے میں نمایاں لچک آئی ہے، پیپلز پارٹی اتحادیوں کے بعد اپوزیشن جماعتوں سے مکالمہ کرے گی۔
