Tag: مولانا فضل الرحمان

اسلام آباد : سربراہ جمعیت علمائے اسلام مولانا فضل الرحمان نے کہا ہے کہ پاکستان کا دفاع مضبوط ہے جنگ کی صورت میں بھارت کو نقصان اٹھانا پڑے گا، ہمیشہ کی طرح اس بار بھی مسئلہ کشمیر ہمارے انتخابی منشور میں اولین ترجیح پر ہوگا.

وہ اسلام آباد میں میڈیا سے گفتگو کر رہے تھے، مولانا فضل الرحمان نے بھارتی آرمی چیف کی ہرزہ سرائی پر ردعمل دیتے ہوئے کہا کہ قوم سرزمین پاک کی حفاظت میں اپنی فوج کے شانہ بشانہ کھڑی ہے اور بھارت کو منہ توڑ جواب دینا جانتی ہے۔

مولانا فضل الرحمان جو کشمیر کمیٹی کے سربراہ بھی ہیں کا کہنا تھا کہ وزارت خارجہ اور کشمیر کمیٹی کو متحرک کرنے کے لیے پارلیمنٹ کی جانب سے کئی تجاویز ملی ہیں جن  کا خیر مقدم کرتے ہوئے پارلیمنٹ اور قوم کو راست اور فوری علمدرآمد کی یقین دہانی کراتے ہیں۔

مولانا فضل الرحمان کا کہنا تھا کہ تجاویز پر کشمیر کمیٹی اجلاس میں بھرپور گفت و شنید ہوئی ہے جس کی روشنی میں لائحہ عمل بھی مرتب کیا گیا ہے جسے کشمیری رہنما میر واعظ عمر فاروق کو بھی آگاہ کیا گیا ہے اور اس معاملے کو باہمی مشاورت سے آگے بڑھائیں گے۔

سربراہ جمعیت علمائے اسلام کا کہنا تھا کہ پارلیمنٹ سے مشاورت میں طے پایا ہے کہ مسئلہ کشمیر کو عالمی سطح پر کیسے اٹھایا جائے اور عالمی رائے عامہ کو ہموار کرنے میں کون سے ضروری اقدامات کیے جائیں.

سربراہ کشمیر کمیٹی نے بتایا کہ اجلاس کی تفصیلات سے آگاہ کرتے ہوئے کشمیری رہنما میر واعظ کو جدوجہد آزادی میں ان کے شانہ بشانہ کھڑے ہونے کے عزم کا اعادہ بھی کیا اور یقین دہانی کرائی کہ کشمیریوں کو تنہا نہیں چھوڑیں گے.

انہوں نے کہا کہ پاکستانی قوم متحد ہے، ایل او سی پر ہمارے جوان شہید ہوئے ہیں لیکن عزائم جواں ہیں ایسے حالات میں بھارتی آ رمی چیف کی دھمکی کی کوئی اہمیت نہیں ہے جنگ کی صورت میں پاکستان کو کسی قسم کا نقصان نہیں ہوگا کیوں کہ پاکستان کا دفاع مضبوط ہے.

انہوں نے کہا کہ حقوق کے حصول کے لیے جدوجہد کی تحاریک میں اتار چڑھاؤ آتے رہتے ہیں تاہم کشمیر کی کوئی بھی نسل جدوجہد آزادی سے غافل نہیں ہوئی ہے.

اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

اسلام آباد : سربراہ جمعیت علمائے اسلام مولانا فضل الرحمان نے کہا ہے کہ فاٹا کے انضمام کا فیصلہ قبائیلیوں کی رضامندی اور اتفاق رائے سے ہونا چاہیے جس کے لیے وزیراعظم فاٹا سپریم کونسل سے ملاقات کریں گے۔

ان خیالات کا اظہار انہوں نے سینیٹ اجلاس کے بعد میڈیا سے گفتگو کرتے ہوئے کیا، مولانا فضل الرحمان کا کہنا تھا کہ آرمی چیف قمر باجوہ سے وزیراعظم کے چیمبر میں ملاقات ہوئی اس موقع پر وزیراعظم شاہد خاقان، ڈپٹی چیئرمین سینیٹ غفور حیدری اور ڈی جی آئی ایس آئی بھی موجود تھے۔

مولانا فضل الرحمان نے کہا کہ فاٹا کا خیبر پختونخواہ سے انضمام کا فیصلہ آئین کے مطابق اور ریفرنڈم کے نتائج کی روشنی میں کیا جائے کیوں کہ آئین سے ماورا فیصلہ قانونی پیچیدگیاں پیدا کردے گا چنانچہ فاٹا جرگے کے ساتھ مزاکرات کے ذریعے مسئلہ حل کیا جائے۔

آرمی چیف اور وزیراعظم سے ملاقات کے متعلق انہوں نے بتایا کہ ہمارا کسی سے کوئی ذاتی مسئلہ نہیں ہے، فاٹا سے متعلق اپنا مؤقف رکھا ہے کہ اختلاف رائے ہر ایک کا حق ہے اور جہاں آئینی سقم موجود ہے اس پرآئینی ماہرین کی رہنمائی حاصل کی جائے گی۔

مولانا فضل الرحمان نے مزید بتایا کہ وزیراعظم شاہد خاقان کو فاٹا سپریم کونسل سے ملاقات کی دعوت دی جسے انہوں نے قبول کرلیا تاکہ رکاوٹوں کو خوش اسلوبی کے ساتھ حل کیا جاسکے, ہمارا مطالبہ تھا کہ  فاٹا کے مسئلے پر بحث کرائی جائے اور اس معاملے کے تمام زاویے دیکھے جائیں۔

  اسی سے متعلق : فاٹا کو قومی دھارے میں شامل کرنے کے لیے کوشاں ہیں، آرمی چیف

انہوں نے کہا کہ وزیراعظم شاہد خاقان عباسی نے ہماری تجاویز کا مثبت جواب دیا ہے جس کے امید ہو چلی ہے کہ اس اہم قومی مسئلے پر اتفاق رائے پیدا کرلیا جائے گا۔

خیال رہے فاٹا کا خیبرپختونخواہ سے انضمام پر تحریک انصاف، جماعت اسلامی اور دیگر جماعتیں متفق ہیں تاہم جمعیت علمائے اسلام اور پختون خواہ ملی عوامی پارٹی ریفرنڈم کے ذریعے فیصلہ کرنے کے حامی ہیں جب کہ حکمراں جماعت اس معاملے پر اتفاق رائے کی خواہ ہے۔

یاد رہے 13 دسمبر 2017 میں آرمی چیف قمر جاوید باجوہ نے قبائلی عمائدین سے گفتگو میں کہا کہ فاٹا کی قومی دھارے میں شمولیت کی حمایت کرتے ہیں اور فاٹا کے بہادر عوام کی قربانیوں کے ذریعے جو کامیابیاں حاصل کی گئیں ہیں انہیں مزید مستحکم کرنے کی کوششیں جاری ہیں۔

تجزیہ کاروں کا فاٹا انضمام سے متعلق اس ملاقات کو اہم قرار دیتے ہوئے کہنا تھا کہ مولانا فضل الرحمان اپنے موقف میں لچک دکھاتے ہوئے اس مسئلے کے حل کی راہ ہموار کرنے میں اہم کردار ادا کرسکتے ہیں جس کے لیے اگلے چند دن بہت اہمیت کے حامل ہیں۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔