اسلام آباد: پاکستان پیپلز پارٹی کے مرکزی رہنما مولا بخش چانڈیو نے تحریکِ انصاف کی حکومت کے ابتدائی 20 دنوں کی کارکردگی کو تنقید کا نشانہ بناتے ہوئے کہا کہ قوم کا مسئلہ گاڑیاں نیلام کرنے سے حل نہیں ہوگا۔

پیپلز پارٹی کے رہنماؤں نے اسلام آباد میں ایک ایسے موقع پر پریس کانفرنس کی جب امریکی وزیرِ خارجہ مائیک پومپیو اسلام آباد دورے پر وزیرِ اعظم عمران خان کے ساتھ ملاقات کر رہے تھے۔

رہنما پی پی نے کہا ’سو دنوں میں سے 20 دن گزر گئے ہیں، باقی 80 دن بھی ایسے ہی گزر جائیں گے، دہشت گردی، بھوک اور افلاس کے لیے آپ نے کیا کیا یہ بتائیں، قوم کو بنیادی مسائل کا حل بتائیں۔‘

مولا بخش کا کہنا تھا کہ اچھے حکمران پہلے ہی دن تبدیلی دکھا دیتے ہیں۔ کہا ’باتیں نہیں ہمیں کام چاہیے، وزیرِ اعظم ہاؤس میں کتنی گاڑیاں کتنے ملازم ہیں یہ قوم کا مسئلہ نہیں، آپ دہشت گردوں کی حمایت کرتے رہے ہیں، آپ نے بھی اشتہاری مہم چلائی ہوئی ہے۔‘

عارف علوی صدر مملکت منتخب، حتمی و سرکاری نتیجہ جاری

پیپلز پارٹی کے رہنما نے کہا کہ صدارتی انتخابات میں انھوں نے جمہوری عمل کی حمایت کی، پی ٹی آئی کی نہیں، ان کی کوئی مجبوری نہیں، ہاں اُن کی ہو سکتی ہے جو جیل میں ہیں۔ جمہوری حمایت میں کوئی فرینڈلی کہتا ہے تو کہے۔

مولا بخش چانڈیو کا کہنا تھا کہ پیپلز پارٹی آئندہ 80 دن مسلم لیگ (ن) اور پاکستان تحریکِ انصاف کو کچھ نہیں کہے گی، انھیں آزادی ہے، اپوزیشن کو تقسیم کرنے والے ہم نہیں ن لیگی ہیں۔

کراچی: پیپلز پارٹی کے مرکزی رہنما مولا بخش چانڈیو نے کہا ہے کہ ابھی تو شریف فیملی کی املاک بھی ضبط نہیں ہوئیں اور چھوٹے میاں گانا گانے لگ گئے۔

ان خیالات کا اظہار انھوں نے میڈیا سے بات چیت کرتے ہوئے کیا، سینیٹر مولا بخش نے کہا کہ شہباز شریف بوکھلاہٹ کا شکار ہو چکے ہیں جب کہ ابھی تو ان کی املاک بھی سیل نہیں ہوئیں۔

مولا بخش چانڈیو کا کہنا تھا کہ چھوٹے میاں گانے گا کر بہت کچھ چھپانےکی کوشش کر رہے ہیں، شہباز شریف کو مخاطب کر کے کہا ’ تم اتنا جو مسکرا رہے ہو کیا غم ہے جسے چھپا رہے ہو‘۔

پی پی کے سینئر رہنما نے کہا کہ شریف فیملی کے خلاف ابھی تو صرف تحقیقات چل رہی ہیں، ابھی املاک سیل ہوئیں نہ ہی اکاؤنٹ فریز ہوئے ہیں۔

مولا بخش چانڈیو کا کہنا تھا کہ صاف پانی اور آشیانہ مقدمات نے شہباز شریف کے اوسان خطا کر دیے ہیں، جس کی وجہ سے وہ کراچی میں آکر گانا گانے لگ گئے، لگتا ہے وہ غم چھپانے کی کوشش کر رہے ہیں۔

اہلیان کراچی کی تضحیک، ایم کیو ایم نے شہباز شریف سے معافی مانگنے کا مطالبہ کر دیا

شہباز شریف کے کراچی میں جاری کردہ بیان کے حوالے سے انھوں نے کہا اہلیانِ کراچی کی توہین سے چھوٹے میاں نے اپنی ذہنی کیفیت کی عکاسی کی، انھیں سیاست کا حق ہے لیکن عوام کی توہین کا حق کس نے دیا۔

واضح رہے کہ گزشتہ روز کراچی دورے کے دوران ن لیگ کے صدر میاں شہباز شریف نے پریس کانفرنس میں ایک رپورٹر کے کرانچی بولنے پر کہا کہ کرانچی نہیں بلکہ کراچی ہے، دوسرے موقع پر انھوں نے کراچی کو پان والوں کا شہر قرار دیا۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔