حیدرآباد : پیپلزپارٹی کے رہنما اورسندھ کے مشیر اطلاعات مولا بخش چانڈیو نے کہا ہے کہ عمران خان اور نواز شریف کو قومی اور سیاسی رہنما مانتا ہوں۔ انہوں نے سوال کیا کہ عمران خان بتائیں کامیاب جلسے سے حاصل کیا ہوا؟

ان خیالات کا اظہار انہوں نے حیدرآباد میں پریس کانفرنس سے خطاب کرتے ہوئے کیا، مولا بخش چانڈیو کا کہنا تھا کہ انتہائی نا اہلی کی بات ہے کہ ن لیگ سے کوئی وزیر خارجہ نہیں مل سکا۔

انہوں نے کہا کہ عمران خان اور میاں صاحب دونوں کو قومی اور سیاسی رہنما مانتا ہوں، ایک بات طے ہے کہ مخالفین کے معاملے میں دونوں غیر سنجیدہ ہیں۔

ایک سوال کے جواب میں مولا بخش چانڈیو کا کہنا تھا کہ عمران خان قومی لیڈر اورایک پارٹی کے سربراہ ہیں، وہ بڑا جلسہ کرنے میں کامیاب تو ہوئے ہیں لیکن جلسے سے حاصل کیا ہوا؟

مولا بخش چانڈیو نے عمران خان کو مخاطب کرتے ہوئے کہا کہ دوسروں پر انحصار کر نا چھوڑ دیں، آپ کو سیاسی دوستوں کی ضرورت ہے۔

مشیر اطلاعات کا کہنا تھا کہ ہماری پالیسی لوگوں کو تقسیم کرنے کی نہیں ملانے کی ہے، لوگ سمجھتے ہیں کہ نوجوان قیادت بلاول بھٹو زرداری ہیں، پیپلز پارٹی میں نوجوانوں،خواتین،اقلیتیوں کو اہمیت دے رہے ہیں۔

انہوں نے کہا کہ وہ اے پی سی بلاتے تو شیخ رشید کو ضرور مدعو کرتے۔ مولا بخش چانڈیو کا کہنا تھا کہ رینجرزصوبے میں حکومت کےساتھ تعاون اوراختیارات استعمال کرتی رہے گی، پولیس اور رینجرز کی کوشش سے کراچی میں امن قائم ہوا ہے۔

حیدرآباد : پیپلز پارٹی کے رہنما مولا بخش چانڈیو نے کہا ہے کہ سندھ کے مسائل حل کرنے میں وفاق اپنا کردار ادا نہیں کررہا۔ رینجرز کو اختیارات ایک دو دن میں دے دئیے جائیں گے۔

ان خیالات کا اظہار انہوں نے حیدرآباد میں میڈیا سے گفتگو کرتے ہوئے کیا، مولا بخش چانڈیو نے اعتراف کیا کہ صوبے میں جہاں وسائل ہیں وہا ں مسائل بھی ہیں ،کراچی میں پانی کی قلت ہماری کوتاہی ہو سکتی ہے۔

ان کا کہنا تھا کہ سندھ کے لوگ جو تبدیلی چاہتے ہیں وہ ضرورآئے گی ،بہت سے اہم فیصلے ہوئے ہیں جن کے آثار نظر آئیں گے۔

مولا بخش چانڈیو نے کہا کہ نئے وزیر اعلیٰ کے آنے سے اداروں کی کارکردگی بہتر ہو گی ،آغاز بہت اچھا ہوا ہے محکموں کو مزید مستحکم کریں گے۔

رہنما پیپلز پارٹی کا کہنا تھا کہ پارٹی نے غیر معمولی فیصلہ کیا ہے اور غیر معمولی لوگ ہی غیر معمولی فیصلے کرتے ہیں ۔

انہوں نے بلاول بھٹو زرداری کو پاکستان کا مستقبل قراردیا۔ انہوں نے کہا کہ کراچی پر سب اپنا حق جتاتے ہیں تو مشکلات کو آسان کرنے کے لیے سندھ حکومت کی مدد بھی کریں۔