Tag: مونس الٰہی

لاہور: پی ٹی آئی رہنما مونس الٰہی کا شناختی کارڈبلاک کرکے پاسپورٹ بھی کنٹرول لسٹ میں ڈال دیاگیا

تفصیلات کے مطابق منی لانڈرنگ کیس میں پی ٹی آئی رہنما مونس الٰہی کا کمپیوٹرائزڈ قومی شناختی کارڈ عدالتی احکامات پر بلاک کر دیا گیا ہے اورپاسپورٹ بھی کنٹرول لسٹ میں ڈال دیاگیا۔

چھ دیگر شریک ملزمان عامر سہیل، عمیر فیاض، امتیاز علی شاہ، فرصت علی اور عابد علی خان کے شناختی کارڈ بھی بلاک کر دیے گئے ہیں۔

ملزمان کاشناختی کارڈ اینٹی منی لانڈرنگ سرکل لاہورمقدمہ میں بلاک کیاگیا ، عامرسہیل،عمیرفیاض،امتیازعلی شاہ،فرصت علی اورعابد علی خان ملزمان میں شامل ہیں۔

ایف آئی اے لاہور کے ڈائریکٹر نے کہا کہ لانڈرنگ میں ملوث افراد کو کوئی رعایت نہیں دی جائے گی۔

وفاقی تحقیقاتی ادارے (ایف آئی اے) نے اس سے قبل منی لانڈرنگ کیس میں پی ٹی آئی رہنما مونس الٰہی کے گرد گھیرا تنگ کرتے ہوئے انہیں اشتہاری قرار دیتے ہوئے لاہور کی عدالت میں ضمنی چالان جمع کرایا تھا۔

لاہور میں ایف آئی اے کی انسداد منی لانڈرنگ عدالت میں جمع کرائے گئے چالان میں الزام لگایا گیا تھا کہ فراست علی چٹھہ نے مونس الٰہی کی کمپنی کے اکاؤنٹس میں ایک ارب روپے جمع کرائے اور اسے منی لانڈرنگ اسکیم میں مزید ملوث کیا۔

تحقیقاتی ایجنسی نے اس سے قبل الٰہی کی گرفتاری کے لیے ریڈ وارنٹ جاری کیے تھے، جو پہلے ہی انٹرپول کو بھیجے جا چکے ہیں۔

واضح رہے کہ لاہور کی خصوصی مرکزی عدالت نے 17 نومبر کو منی لانڈرنگ کیس میں سابق وفاقی وزیر الٰہی کے تمام اثاثے اور بینک اکاؤنٹس ضبط کرنے کا حکم دیا تھا۔

لاہور : وفاقی تحقیقاتی ادارے (ایف آئی اے)‌ نے مونس الٰہی کی 6 جائیدادیں اور 8 مختلف بینک اکاؤنٹس منجمد کردیے۔

تفصیلات کے مطابق وفاقی تحقیقاتی ادارے (ایف آئی اے)‌ نے مونس الٰہی کی جائیدادیں اور بینک اکاؤنٹس منجمد کردیے، مونس الٰہی کے لاہور میں 8 مختلف بینک اکاؤنٹس منجمد کیے گئے ہیں۔

مونس الٰہی کے مختلف بینک اکاؤنٹس میں 48 کروڑ 76 لاکھ سےزائدرقم آئی جبکہ ایف آ ئی اے کی جانب سےمونس الٰہی کی 6 جائیدادیں بھی منجمد کی گئی ہیں۔

ایف آئی اے نے عدالتی احکامات پر مونس الٰہی کے خلاف کارروائی کی اور مونس الٰہی کی قصورمیں 5 ،راولپنڈی میں ایک جائیدادمنجمد کردی۔

عدالت نے مونس الٰہی کےاثاثے اور اکاؤنٹس منجمد کرنے کا حکم دیا تھا ، ایف آئی اے کے مطابق جائیدادیں منی لانڈرنگ سے بنائی گئی ہیں۔

یاد رہے لاہور کی اسپیشل سینٹرل کورٹ نے پی ٹی آئی رہنما مونس الہٰی کے خلاف منی لانڈرنگ کیس میں ملزم کو اشتہاری قرار دینے کی کارروائی شروع کرتے ہوئے ان کے تمام اثاثے اور بینک اکاؤنٹس منجمد کرنے کا حکم دیا تھا۔

عدالت نے اپنے فیصلے میں یہ بھی کہا تھا کہ مونس الہٰی اپنی اسپین والی رہائش گاہ پر موجود نہیں تھے۔ لندن میں ان کی رہائش گاہ پر وارنٹ کی تعمیلی رپورٹ ابھی آنی ہے تاہم اب تک پیش کردہ رپورٹ سے مطمئن ہیں جس میں کہا گیا ہے کہ مونس الہٰی جان بوجھ کر گرفتار سے چھپ رہے ہیں۔

لاہور: احتساب عدالت نے ترقیاتی منصوبوں میں مبینہ کرپشن کیس میں مونس الہی کو اشتہاری قرار دیتے ہوئے دائمی وارنٹ گرفتاری جاری کردیے۔

تفصیلات کے مطابق لاہور کی احتساب عدالت میں ترقیاتی منصوبوں میں مبینہ کرپشن کیس کی سماعت ہوئی ، عدالت میں نیب کی جانب سے رپورٹ پیش کر دی گئی۔

نیب نے مونس الہٰی کی روپوشی کی رپورٹ بھی عدالت میں پیش کی ، جس میں بتایا کہ ملزم مونس الہٰی گرفتاری سے چھپ رہا ہے اور گرفتاری سے بچنے کیلئے روپوش ہو چکا ہے۔

احتساب عدالت نے نیب درخواست پر اشتہاری قرار دینےکی کارروائی مکمل کی اور کہا مونس الہٰی کا اشتہار بھی شائع کیاگیامگر وہ پیش نہیں ہوا۔

احتساب عدالت لاہور کے جج نسیم احمد ورک نے نیب کی درخواست پر مونس الہٰی کواشتہاری قراردیا اور مونس الٰہی کے تمام اکاؤنٹس منجمد کردئیے گئے۔

عدالت نے مونس الہٰی کےدائمی وارنٹ گرفتاری جاری کرتے ہوئے مونس الٰہی کی جائیدادوں کا ریکارڈ طلب کرلیا۔

ملزم مونس الہٰی پرگجرات کے ترقیاتی منصوبوں میں مبینہ طورپرایک ارب سے زائد کرپشن اورکک بیکس وصول کرنے اور منی لانڈرنگ کا الزام ہے۔

مسلم لیگ ق کے رہنما مونس الٰہی نے کہا ہے کہ دوسروں کو لاڈلا کہنے والے آج خود لاڈلے ہوگئے ہیں، مجرم کو کھلے عام گھومنے کی اجازت مل گئی.

تفصیلات کے مطابق مونس الٰہی کا ٹوئٹ کرتے ہوئے کہنا تھا کہ سزایافتہ مجرم نوازشریف کو دندناتے پھرنے کی اجازت مل گئی۔ دوسروں کو لاڈلا کہنے والے آج خود لاڈلے ہیں۔

انھوں نے کہا کہ پیسے، موٹرسائیکلیں، قیمے والے نان اور نہ ہی جنت کے ٹکٹ کسی کام آئیں گے۔ عوام انھیں مسترد کر چکے ہیں، ن لیگ کر لے جو کرنا ہے۔

خیال رہے کہ اسلام آباد ہائیکورٹ نے العزیزیہ اور ایون فیلڈریفرنس میں نواز شریف کو وطن واپسی پر ائیرپورٹ پر گرفتار کرنے سے روک دیا ہے اور 24 اکتوبر تک حفاظتی ضمانت منظور کرلی۔

اسلام آباد ہائی کورٹ کے چیف جسٹس عامر فاروق اور جسٹس میاں گل حسن اورنگزیب نے نواز شریف کو ایئرپورٹ پر گرفتاری سے روکنے کاےاحکامات جاری کیے۔

عدالت کا کہنا تھا کہ نیب نے نواز شریف کو واپسی پر حفاظتی ضمانت دینے کے لیے کوئی اعتراض نہیں کیا۔

لاہور: قومی احتساب بیورو (نیب) کی انکوائری رپورٹ میں مونس الٰہی کرپشن اورمنی لانڈرنگ میں ملوث پائے گئے، پرویز الٰہی کے وزیراعلیٰ بنتےہی مونس الہٰی کےاثاثوں میں اضافہ ہوا۔

تفصیلات کے مطابق سرکاری ٹھیکوں کے عوض کک بیکس اورگھپلوں کی انکوائری میں مونس الٰہی کی نیب انکوائری رپورٹ منظرعام آگئی۔

نیب انکوائری رپورٹ میں مونس الٰہی کرپشن اورمنی لانڈرنگ میں ملوث پائے گئے اور کہا گیا کہ پرویز الٰہی کے وزیراعلیٰ بنتےہی مونس الہٰی کےاثاثوں میں اضافہ ہوا، مونس نےفرنٹ مین عظمت حیات اورسہیل اصغرکےذریعےٹھیکوں کی مدمیں کک بیکس لیں۔

رپورٹ میں بتایا گیا کہ مونس الٰہی نے جولائی 2022 سے اپنے بینک اکاؤنٹس میں ملکی وغیرملکی بھاری رقم جمع کرائی اور جولائی 2022 کےبعد 72 ملین روپے سے384 کنال سے زائد اراضی خریدی، خریدی گئی اراضی بظاہر کک بیکس اوررشوت کی رقم سےبنائی گئی۔

انکوائری رپورٹ میں کہنا ہے کہ مونس الہٰی نےاپنےوالد کےوزیراعلیٰ کےعہدےکاغلط استعمال کیا، انھوں نےگجرات میں پسندیدہ کنٹریکٹرز کو ٹھیکے دلوا کر رشوت وصول کی۔

رپورٹ کے مطابق مونس الٰہی کرپشن،کرپٹ پریکٹسز اور منی لانڈرنگ میں ملوث پائے گئے ہیں۔

خیال رہے سرکاری ٹھیکوں میں کیک بیکس کےکیس میں پرویز الٰہی نیب کی تحویل میں ہیں۔

لاہور: سیشن عدالت نے رشوت لینے، دینے اور اعانت جرم کے مقدمے میں مونس الٰہی کے ناقابل ضمانت وارنٹ گرفتاری جاری کر دئیے ہیں۔

تفصیلات کے مطابق لاہور کی سیشن عدالت میں ایف آئی اے کی جانب سے مونس الٰہی کے دائمی وارنٹ گرفتاری کے لیے درخواست دائر کی گئی۔

ایف آئی اے نے درخواست میں موقف اختیار کیا کہ ملزم کو شامل تفتیش کرنے کی کوشش کی گئی ، اطلاع کے لیے ملزم کے گھر، شارع عام اور احاطہ عدالت میں اشتہار چسپاں کیے گئے۔

ایف آئی اے کا کہنا تھا کہ ملزم دیدہ دانستہ طور پر روپوش ہے، ملزم شامل تفتیش ہونے سے گریزاں ہے، عدالت سے استدعا ہے کہ ملزم مونس الٰہی اور شریک ملزم عامر سہیل کے دائمی وارنٹ گرفتاری جاری کیے جائیں۔

جس پر عدالت نے مونس الٰہی کے ناقابل ضمانت وارنٹ گرفتاری جاری کر دئیے۔

اس سے قبل عدالت نے منی لانڈرنگ اور کرپشن سرکل کے مقدمے میں ملوث سابق وفاقی وزیر مونس الہٰی کو اشتہاری قرار دیا تھا جبکہ عدالت نے مونس الٰہی کا شناختی کارڈ، پاسپورٹ، بینک اکاؤنٹ، تمام جائیداد کے منجمد ہونے کی کارروائی کا آغاز کردیا ہے۔

عدالت نے پاسپورٹ، شناختی کارڈ اور رہائش گاہ کا درست ایڈریس سمیت مونس الہٰی کی ٹریول ہسٹری، بینک اکاؤنٹس کی تفصیلات طلب کرلیں۔