فیصل آباد : گشت پر معمور پولیس کی موبائل پر نامعلوم موٹرسائیکل سواروں نے فائرنگ کرکے تین پولیس اہلکاروں کو شہید کردیا، حملہ آوروں کی گرفتاری کے لئے ایلیٹ فورس سمیت پولیس کی خصوصی ٹیمیں روانہ کردی گئیں۔
تفصیلات کے مطابق فیصل آباد کے تھانہ نشاط آباد کے علاقے میراں والا بنگلہ بائی پاس پر گشت کے دوران پولیس کے اہلکاروں نے دو موٹرسائیکلوں پر سوار مشکوک افراد کو روکنے کی کوشش کی تو انہوں نے پولیس پر اسٹیٹ فائرنگ کر دی۔
گولیاں لگنے سے ڈرائیور کانسٹیبل اسحاق موقع پر جاں بحق ہو گیا جبکہ اسسٹنٹ سب انسپکٹر عمران اور کانسٹیبل رفاقت شدید زخمی ہو گئے ۔ زخمی پولیس اہلکاروں کو الائیڈ ہسپتال منتقل کیا گیا جہاں دونوں زیادہ خون بہہ جانے کے باعث دم توڑ گئے۔
واردات کے بعد ملزمان با آسانی فرار ہونے میں کامیاب ہوگئے، واقعے کے بعد سیکیورٹی فورسز نے علاقے کو گھیرے میں لے لیا۔
ملزمان کی گرفتاری کے لئے پولیس کی بھاری نفری جائے وقوعہ پر روانہ کر دی گئی ہے جو مختلف دیہات میں چھاپے مار رہی ہے ۔
پولیس ذرائع کے مطابق جاں بحق ہونے والے تینوں پولیس اہلکاروں کی لاشوں کے پوسٹ مارٹم کے بعد ہفتے کے روز پولیس لائنز میں نماز جنازہ ادا کی جائے گی۔
