ARYNews.tv | Urdu – Har Lamha Bakhabar

Tag: موٹر سائیکل سوار

  • موٹر سائیکل سوار ننھا بچہ پتنگ کی ڈورکی زد میں آگیا

    موٹر سائیکل سوار ننھا بچہ پتنگ کی ڈورکی زد میں آگیا

    کراچی: ناظم آباد کے علاقے میں موٹر سائیکل پر اپنے باپ کے ساتھ سوار ننھا بچہ پتنگ کی ڈور کی زد میں آکر زخمی ہوگیا۔

    تفصیلات کے مطابق کراچی میں بھی پتنگ کی ڈور سے زخمی ہونے والوں کی تعداد میں اضافہ ہوتا جارہا ہے، اس بار ناظم آباد میں پتنگ کی ڈور کی زد میں آکر ڈھائی سالہ بچہ عبد الباری زخمی ہوا ہے۔

    پتنگ کی ڈور سے زخمی ہونے کے باعث بچے کا چہرہ اور ہونٹ متاثر ہوئے۔ ڈھائی سالہ عبد الباری اپنے والد کے ساتھ سائٹ ایریا کی جانب جا رہا تھا۔

    شہر قائد میں پچھلے 10 روز کے دوران پتنگ کی خطرناک ڈور سے زخمی ہونے والوں کی تعداد 8 ہوگئی ہے۔

    پتنگ کی ڈور پھرنے سے متعدد علاقوں میں مزید شہریوں کے زخمی ہونے کے واقعات سامنے آگئے۔

    واضح رہے کہ اس سے قبل عزیزآباد کے علاقے میں موٹرسائیکل سوار نوجوان گلے پر ڈور پھرنے سے زخمی ہوا تھا۔ 20 سالہ اویس کو اسپتال منتقل کرکے طبی امداد دی گئی تھی۔

    کراچی میں ہی شہری کے پتنگ کی ڈور سے زخمی ہونے کا ایک اور واقعہ سامنے آیا تھا، شہری کے زخمی ہونے کا واقعہ 3 روز قبل کشمیر روڈ پر پیش آیا تھا۔

  • کراچی میں راہ چلتی خاتون کے ساتھ غیر اخلاقی حرکت کا ایک اور واقعہ

    کراچی میں راہ چلتی خاتون کے ساتھ غیر اخلاقی حرکت کا ایک اور واقعہ

    کراچی : نارتھ کراچی سیکٹر الیون اے میں راہ چلتی خاتون کیساتھ موٹر سائیکل سوار کی غیر اخلاقی حرکت کا واقعہ پیش آیا، واقعہ کی سی سی ٹی وی فوٹیج سامنے آگئی۔

    تفصیلات کےمطابق کراچی میں راہ چلتی خاتون کے ساتھ نازیباحرکت کرنے کا ایک اور افسوسناک واقعہ سامنے آیا۔

    کراچی کے علاقے نارتھ کراچی سیکٹر الیون اے میں راہ چلتی خاتون کیساتھ موٹر سائیکل سوار نے غیر اخلاقی حرکت کی ، خاتون سے غیر اخلاقی حرکت کی سی سی ٹی وی فوٹیج منظرعام پر آگئی ہے۔

    فوٹیج میں خاتون کو گلی میں اپنے بچے کے ہمراہ جاتے ہوئے دیکھا جا سکتا ہے کہ اسے میں موٹر سائیکل سوار شہری خاتون کو جنسی طور پر ہراساں کر کے فرار ہو گیا۔

    پولیس کا کہنا ہے کہ ابھی تک کسی نے شکایت درج نہیں کرائی، فوٹیج کا جائزہ لے رہے ہیں، ملزم کو جلد گرفتار کرلیا جائے گا۔

    گذشتہ سال ستمبر میں بھی نارتھ کراچی سیکٹر 11بی میں موٹرسائیکل سوار اوباش نے خاتون کو ہراساں کیا تھا، خاتون کو ہراساں واقعے کی سی سی ٹی وی فوٹیج منظر عام پر آئی تھی ، فوٹیج میں ملزم کا چہرہ واضح دیکھا جاسکتا تھا۔

  • ویڈیو: انتظامیہ کی نااہلی، مین ہول میں گائے گر گئی

    ویڈیو: انتظامیہ کی نااہلی، مین ہول میں گائے گر گئی

    سکھر : سندھ کے شہر میں کھلے گٹر کی وجہ سے موٹر سائیکل سوار بچے اور گائے کے ساتھ حادثہ پیش آیا ہے۔

    تفصیلات کے مطابق سکھر کے شالیمار پھاٹک کے قریب اسکول سے واپس جاتے ہوئے بچہ گٹر میں گرنے سے بال بال بچ گیا، بچے کی  موٹر سائیکل کھلے گٹر میں گر پڑی۔

    رپورٹ کے مطابق گرتے وقت بچے نے خود کو بچایا جبکہ موٹرسائیکل گٹر میں گر پڑی، سڑک پر موجود لوگوں نے موٹر سائیکل کو باہر نکالا جبکہ بچہ معجزاتی طور پر محفوظ رہا۔

    اہل علاقہ کا کہنا ہے کہ انتظامیہ نے زیر تعمیر  کثیر المنزلہ عمارت کا پانی نکالنے کیلئے شالیمار پھاٹک کے قریب گٹر کھول دیا ہے، شہر کے اکثر فوٹ پاتھ پر بنے گٹر کھلے ہوئے ہیں۔

    اہل علاقہ نے بتایا کہ  آج صبح ایک گائے بھی کھلے گٹر میں گر گئی تھی، گٹروں کے ڈھکن نہ ہونے کی وجہ سے حادثات معمول بن چکے ہیں۔

    اہل علاقہ نے مزید کہا کہ بار بار نشاندھی کرنے  کے باوجود انتظامیہ نے کھلے گٹروں پر ڈھکن رکھنے کے کوئی انتظامات نہیں کیے ہیں۔

  • موٹر سائیکل سواروں کو بغیر ہیلمٹ پیٹرول ملے گا یا نہیں ؟ بڑا حکم آگیا

    موٹر سائیکل سواروں کو بغیر ہیلمٹ پیٹرول ملے گا یا نہیں ؟ بڑا حکم آگیا

    لاہور : لاہور ہائی کورٹ نے بغیر ہیلمٹ موٹر سائیکل سواروں کو پیٹرول کی فراہمی کا حکم دے دیا اور درخواست نمٹا دی۔

    تفصیلات کے مطابق لاہور ہائی کورٹ نے موٹر سائیکل سواروں کوبغیر ہیلمٹ پیٹرول فراہمی پر پابندی کیخلاف درخواست پر فیصلہ سنادیا۔

    جسٹس راحیل کامران شیخ نےشہری میاں عرفان بشیر کی درخواست پر محفوظ فیصلہ جاری کیا، فیصلے میں عدالت نے حکم دیا کہ موٹرسائیکل سواروں کو بغیر ہیلمٹ پیٹرول ملتا رہے گا۔

    عدالت نے ڈی سی رافیہ حیدرکے جواب کی روشنی میں درخواست منظور کرتے ہوئے نمٹادی اور کہا کہ ڈی سی کے جواب کے مطابق بغیر ہیلمٹ پیٹرول پر پابندی کے متعلق ایڈوائس جاری کی آرڈر نہیں۔

    درخواست گزار نے بغیر ہیلمٹ موٹر سائیکل سواروں کو پیٹرول کی فروخت پر پابندی چیلنج کی تھی۔

  • موٹر سائیکل سوار نوجوان کی جانب سے ایک اور خاتون کو ہراساں کا واقعہ

    موٹر سائیکل سوار نوجوان کی جانب سے ایک اور خاتون کو ہراساں کا واقعہ

    لاہور میں موٹر سائیکل سوار نوجوان کی جانب سے ایک اور خاتون کو ہراساں کرنے کی کوشش کی ہے۔

    تفصیلات کے مطابق کراچی سمیت ملک کے مختلف علاقوں میں خواتین کو ہراساں کرنے کے واقعات میں اضافہ ہورہا ہے تاہم یہ واقعہ لاہور ٹاؤن شپ میں پیش آیا۔

    پیلی شرٹ پہنے موٹر سائیکل سوار کی خاتون کو ہراسا کرنے کی کلوز سرکٹ فوٹیج  سامنے آئی ہے، پولیس کا کہنا ہے کہ خاتون کی جانب سے ردعمل پر ملزم فرار ہوگیا لیکن تفتیش جاری ہے۔

    پولیس کا کہنا ہے کہ معاملے کی تفتیش جاری ہے فوٹیج کی مدد سے جلد ملزم کو گرفتار کرلیں گے۔

    پولیس نے مزید یہ بتایا کہ چند روز قبل مسلم ٹاؤن میں بھی رکشہ ڈرائیور خاتون کو ہراساں کررہا تھا، رکشہ ڈرائیور کو بھی ہراساں کرنے پر گزشتہ رات گرفتار کیا گیا۔

    واضح رہے کہ کراچی کے گلستان جوہر کے علاقے میں موٹر سائیکل سوار شخص کی جانب سے خاتون کو جنسی طور پر ہراساں کرنے کا واقعہ پیش آیا تھا تاہم اس کیس میں اب تک مذکورہ شخص کی شناخت کے حوالے سے کوئی پیش رفت نہیں ہو سکی۔

  • ویڈیو: ڈاکو نے موٹر سائیکل سوار نجی کمپنی کے ملازم سے رقم سے بھری تھیلی چھین لی

    ویڈیو: ڈاکو نے موٹر سائیکل سوار نجی کمپنی کے ملازم سے رقم سے بھری تھیلی چھین لی

    کراچی: ملیرسٹی میں ڈاکو نے موٹر سائیکل سوار نجی کمپنی کے ملازم سے مبینہ طور پر رقم سے بھری تھیلی چھین کر فرار ہوگئے۔

    اے آر وائی نیوز کے مطابق کراچی کے علاقے ملیرسٹی میں ڈاکو نجی کمپنی کے ملازم سے مبینہ طور پر 24 لاکھ 65 ہزار روپے لوٹ کر فرار ہوگئے، واردات کی سی سی ٹی وی فوٹیج اے آروائی نیوز نے حاصل کرلی۔

    فوٹیج میں دیکھا جاسکتا ہے کہ ڈاکوؤں نے نجی کمپنی کے ملازم سے پیٹرول پمپ پر موٹرسائیکل سے تھیلا چھینا اور فرار ہوگئے۔

    نجی کمپنی کے ملازم نے پولیس کو بیان میں کہا کہ ریکوری کی رقم بینک میں جمع کرانے جارہا تھا، پولیس کا کہنا ہے کہ واردات گزشتہ روز پیش آئی، ابتدائی رپورٹ ملیر سٹی تھانے میں جمع کرادی گئی ہے۔

    پولیس کا کہنا ہے کہ فوٹیج کی مدد سے ملزمان کی تلاش اور مزید تفتیش جاری ہے۔

  • ویڈیو: گلستان جوہر میں موٹر سائیکل سوار 4 ملزمان نے شوروم مالک کو لوٹ لیا

    ویڈیو: گلستان جوہر میں موٹر سائیکل سوار 4 ملزمان نے شوروم مالک کو لوٹ لیا

    کراچی: شہر قائد کے علاقے گلستان جوہر میں موٹر سائیکل سوار 4 مسلح ملزمان شوروم کے مالک کو لوٹ کر فرار ہوگئے۔

    تفصیلات کے مطابق کراچی کے علاقے گلستان جوہر میں واقعے ایک چورنگی کے قریب ڈکیتی کی واردات ہوئی، جس میں ملزمان عبدالستار سے 15 لاکھ 25 ہزار نقدی اور موبائل فون لوٹ کر فرار ہوگئے۔

    واردات کی سی سی ٹی وی فوٹیج منظرعام پر آگئی، جس کے مطابق عبدالستار صفورا چورنگی پربینک سے 15 لاکھ روپے لے کر شوروم  پہنچا تھا ، عبدالستار نے شوروم پر جیسے ہی گاڑی روکی ملزمان نے گھیر لیا۔

    فوٹیج میں 2 ملزمان کو عبدالستار کےگاڑی سے اترنے کا انتظار کرتے ہوئے دیکھا جاسکتا ہے، موٹر سائیکل چلانے والے دو ملزمان نے ہیلمٹ پہنے ہوئے تھے۔

    متاثرہ شوروم مالک عبدالستار نے گلستان جوہر پر پولیس واردات کا مقدمہ درج کرلیا۔

  • لاہور : تیز رفتار ٹرک نے موٹر سائیکل سوار بہن بھائی کو کچل ڈالا

    لاہور : تیز رفتار ٹرک نے موٹر سائیکل سوار بہن بھائی کو کچل ڈالا

    لاہور : تیز رفتار ٹرک نے موٹر سائیکل سوار بہن بھائی کو کچل ڈالا اور ٹرک ڈرائیور موقع سے فرار ہوگیا۔

    تفصیلات کے مطابق لاہور کے علاقے سکھ نہر میں افسوسناک حادثہ پیش آیا ، جہاں تیز رفتار ٹرک نے موٹرسائیکل سوار بہن بھائی کو روند ڈالا، جس سے بہن موقع پر جاں بحق اور بھائی شدید زخمی ہوا۔

    پولیس حکام نے بتایا کہ حادثے میں سترہ سالہ لڑکی جاں بحق ہوگئی ہے جبکہ اس کے بھائی کو زخمی حالت میں اسپتال منتقل کردیا گیا ہے۔

    ٹرک ڈرائیور موقع سے فرار ہوگیا تاہم پولیس نے ٹرک کو تحویل میں لے کر تفتیش شروع کردی ہے

  • چیک پوسٹ پہ نہ رکنے پر موٹر سائیکل کو ہولناک حادثہ، رونگٹے کھڑے کردینے والی ویڈیو

    چیک پوسٹ پہ نہ رکنے پر موٹر سائیکل کو ہولناک حادثہ، رونگٹے کھڑے کردینے والی ویڈیو

    نئی دہلی: بھارت میں چیک پوسٹ پر نہ رکنے پر موٹر سائیکل سواروں کو ہولناک حادثہ پیش آگیا، حادثے کی دل دہلا دینے والی سی سی ٹی وی فوٹیج سوشل میڈیا پر وائرل ہورہی ہے۔

    بھارتی میڈیا کے مطابق واقعہ بھارتی ریاست تلنگانہ میں پیش آیا جہاں فاریسٹ ڈپارٹمنٹ نے ایک جگہ چیک پوسٹ اور بیریئر لگا رکھا تھا۔

    سی سی ٹی وی فوٹیج میں دیکھا جاسکتا ہے کہ بیریئر کے پاس کھڑا پولیس اہلکار دور سے موٹر سائیکل سوار کو رکنے کا اشارہ کر رہا ہے، موٹر سائیکل پر 2 افراد سوار ہیں۔

    تاہم موٹر سائیکل سوار اس کا اشارہ نظر انداز کر کے نہایت تیزی سے گزرتا ہے جسے دیکھ کر پولیس اہلکار جلدی سے بیریئر اٹھانے کی کوشش کرتا ہے، لیکن اس سے پہلے ہی موٹر سائیکل زن سے گزر گئی۔

    اس موقع پر آگے بیٹھے شخص نے بروقت اپنا سر جھکا لیا لیکن پیچھے بیٹھا شخص ہولناک طریقے سے بیریئر سے ٹکرایا اور اچھل کر سڑک پر گر پڑا۔

    سر پر شدید چوٹ لگنے کی وجہ سے مذکورہ شخص موقع پر ہی ہلاک ہوگیا جبکہ اس کا ساتھی فرار ہونے میں کامیاب ہوگیا۔

    پولیس کے مطابق ہلاک شخص کی شناخت ہوگئی ہے، اس کی عمر 30 سال ہے۔ لاش کو اسپتال منتقل کردیا گیا ہے۔

  • بھارت: موٹر سائیکل سواروں کے ساتھ دل دہلا دینے والا واقعہ (ویڈیو دیکھیں)

    بھارت: موٹر سائیکل سواروں کے ساتھ دل دہلا دینے والا واقعہ (ویڈیو دیکھیں)

    راجستھان: بھارتی ریاست راجستھان میں دو خوش قسمت موٹر سائیکل سوار ایک لاری کے نیچے آ کر دبنے سے بال بال بچ گئے۔

    غیر ملکی میڈیا کے مطابق یہ دل دہلا دینے والا واقعہ راجستھان کے نیشنل ہائی وے پر پیش آیا، جس میں موٹر سائیکل پر سوار افراد نے خود کو الٹتی ہوئی لاری کی زد میں آنے سے بال بال بچا لیا۔

    ویڈیو فوٹیج میں دیکھا جا سکتا ہے کہ ایک لاری نہایت غلط انداز میں ہائی وے پر رواں دواں ہے، ڈرائیور سڑک پر لاری کو کبھی دائیں جانب کر رہا ہے تو کبھی بائیں جانب، اور پھر کچھ ہی دیر بعد اس غلط ڈرائیونگ کا نہایت خوف ناک نتیجہ برآمد ہوا۔

    گزشتہ روز 62 نیشنل ہائی وے پر ہونے والا یہ حادثہ لاری ڈرائیور کے نشے میں ہونے کی وجہ سے پیش آیا، ویڈیو کلپ کے آغاز ہی سے دیکھا جا سکتا ہے کہ ڈرائیور لاری کو سڑک پر لینوں کے درمیان مسلسل گھما رہا ہے، اس دوران سامنے سے آنے والی گاڑیوں کو شدید پریشانی لاحق ہوتی رہی۔

    ایک موقع پر لاری جب پل پر پہنچی تو تب بھی ڈرائیور اپنی حرکتوں سے باز نہ آیا، ایسا لگتا ہے کہ وہ سامنے سے آنے والی ٹریفک سے غافل ہو گیا تھا، حالاں کہ اسے پل کا اوپری کنارا نظر نہیں آ رہا تھا لیکن اس کے باوجود وہ لاری کو لہراتے ہوئے ڈرائیو کرتا رہا، یہاں تک ٹریفک بڑھ گئی، اور ایک موٹر سائیکل اور کار اس سے بال بال بچے۔

    اچانک، جب وہ غلط لین میں لاری ڈرائیور کر رہا تھا، اس نے اپنے لین کی طرف گاڑی موڑ لی، لیکن اس نے یہ اتنی جلدی میں کیا کہ لاری الٹ گئی، اور پل کے کنارے سے بری طرح ٹکرا گئی، عین اسی وقت ایک موٹر سائیکل پر سوار دو افراد الٹتی ہوئی لاری کے نیچے سے تیزی سے نکلے اور خوف ناک موت کے منہ میں جانے سے بال بال بچ گئے۔

    اطلاعات کے مطابق لاری کا ڈرائیور نشے میں تھا اور حادثے میں اسے شدید چوٹیں آئیں، حادثے کے بعد اسے راہگیروں نے اٹھا کر اسپتال پہنچایا۔