لاہور: موٹر وے پولیس نے قومی شاہراہ پر روشن بھیٹ سے 2 لاپتہ کم عمر بھائیوں کو والدین سے ملوادیا۔
تفصیلات کے مطابق لاہور موٹروے پولیس نے انسانیت کی مثال قائم کر دی، 6 اور 8 سالہ بچے گھر کا راستہ بھول کر قومی شاہراہ پر پریشان حال میں اپنا گھر ڈھونڈ رہے تھے۔
ترجمان موٹروے پولیس کا کہنا ہے کہ دونوں بچے مدرسے سے بھاگ کر آئے تھے، انتھک کوشش کے بعد بچوں کے والد سے رابطہ ممکن ہوا۔
ترجمان نے مزید بتایا کہ قانونی کارروائی کے بعد بچوں کو والد کے حوالے کردیا گیا ہے، والدین نے گمشدہ بچے مل جانے پر موٹروے پولیس کو قابل فخر ادارہ قرار دیا ہے۔
اس سے قبل تین دن سے لاپتہ ذہنی مریضہ کو خاندان سے ملوایا تھا، ترجمان موٹروے پولیس نے بتایا تھا کہ موٹروے پولیس کو لاہور کے قریب ایم 3 پر اکیلی خاتون پریشان حالت میں ملی تھی۔
لاہور : موٹر وے ایم ٹو ٹھوکر نیاز بیگ سے ہرن مینار تک شدید دھند کے باعث ہر قسم کی ٹریفک کے لئے دوبارہ بند کردی گئی ہے۔
اس حوالے سے ترجمان موٹر وے پولیس کا کہنا ہے کہ لاہور سیالکوٹ موٹر وے کو دھند کےباعث بند کردیا گیا تھا، موٹر ویز کو عوام کی حفاظت اور محفوظ سفریقینی بنانے کیلئے بند کیا جاتا ہے۔
ترجمان کا کہنا ہے کہ لاہور کے شہری زیادہ سے زیادہ دن کے اوقات میں سفر کرنے کوترجیح دیں، صبح 10سےشام 6 بجے تک دھند کے موسم میں یہ بہترین سفری اوقات ہیں۔
ترجمان موٹر وے پولیس نے عوام سے اپیل کی ہے کہ وہ غیر ضروری سفر بالخصوص لاہور اور اسلام آباد کے درمیان سفر سے گریز کریں۔
ان کاکہنا ہے کہ اپنی گاڑیوں میں فوگ لائٹس کا استعمال لازمی کریں، گاڑی کی رفتار کم رکھیں اور اگلی گاڑی سے مناسب درمیانی فاصلہ رکھیں۔
اپنا سفر شروع کرنے سے پہلے اسمارٹ فون ایپلی کیشن موٹر وے ہمسفر کا استعمال کریں اور ایف ایم ریڈیو 95 یا ہیلپ لائن130 سے رہنمائی ضرور حاصل کر لیں۔
ملتان: موٹر وے پولیس نے نان کسٹم پیڈ گاڑی کی اسمگلنگ ناکام بنادی ، گاڑی پچاس ہزار روپے رشوت کے عوض کراچی سے اسلام آباد اسمگل کی جارہی تھی۔
تفصیلات کے مطابق موٹر وے پولیس ایم 5 ملتان نے نان کسٹم پیڈ گاڑی کی اسمگلنگ ناکام بناتے ہوئے کارروائی میں 2 ملزمان کو گرفتار کرلیا۔
ترجمان موٹرویز نے بتایا کہ ملزمان کے قبضے سے پانچ موبائل فون اور چھتیس لاکھ روپے برآمد ہوئے، نان کسٹم پیڈ گاڑی 50 ہزار روپے رشوت کے عوض کراچی سےاسلام آباد اسمگل کی جارہی تھی۔
ضبط کی گئی گاڑی، موبائل فون اورنقدی کسٹمز حکام کے حوالےکردی گئی ہے ، ڈی آئی جی دار علی خٹک نے افسران کو پیشہ وارنہ کارروائی پر شاباش دی جبکہ ایڈیشنل آئی جی علی احمدنے پٹرولنگ افسران کی کارکردگی کو سراہا۔
یاد رہے کراچی میں انفورسمنٹ کلکٹریٹ نے اسمگلنگ کے خلاف بڑا آپریشن کرتے ہوئے اسمگل شدہ ہیوی موٹرسائیکلیں اور نان کسٹمز پیڈ گاڑیاں ضبط کر کے کسٹمز ایکٹ کے تحت مقدمہ درج کر لیا تھا۔
ایڈیشنل کلکٹر انفورسمنٹ باسط حسین نے بتایا تھا کہ صدر کراچی اور ڈی ایچ اے میں قائم دو گوداموں سے اسمگل شدہ دس کروڑ چھہتر لاکھ روپے مالیت کی سینتیس ہیوی موٹر سائیکلیں اور چھبیس کروڑچالیس لاکھ روپے مالیت کی اکیس نان کسٹمز پیڈ گاڑیاں برآمد کیں تھیں۔ْ
لاہور : پنجاب میں دھند اور اسموگ میں اضافے کے باعث موٹر ویز کے مختلف شیکشنز ٹریفک کیلئے بند کرنا پڑ گئے۔
تفصیلات کے مطابق پنجاب کےبیشترمیدانی علاقوں میں دھند نے ڈیرے ڈالدیئے،، قومی شاہراہ پردھند کے باعث حد نگاہ انتہائی کم رہ گئی، جس کے باعث موٹر ویز کے مختلف شیکشنز ٹریفک کیلئے بند کردیئے گئے۔
موٹروے ایم ٹو لاہور سے شیخوپورہ ،ایم فورگوجرہ سے عبد الحکیم تک ، موٹروے ایم تھری لاہورسے جڑانوالہ اورفیض پورسےدرخانہ تک دھند کی وجہ سے بند کی گئی۔
ترجمان موٹر وے پولیس کا کہنا ہے کہ موٹر ویز کو عوام کی حفاظت اورمحفوظ سفر یقینی بنانےکیلئےبندکیاجاتا ہے، روڈیوزرززیادہ سے زیادہ دن کے اوقات پر سفرکرنے کو ترجیح دیں۔
ترجمان نے کہا کہ صبح 10 سے شام 6 بجےتک دھند کے موسم میں بہترین سفری اوقات ہیں، روڈ یوزرز آگے اور پیچھے دھند والی لائٹس کا استعمال کریں۔
دوسری جانب راستے دھند لانے سے ٹریفک حادثات میں اضافہ ہوگیا، شیخوپورہ میں دھند کے باعث ہرن مینارانٹر چینج کے قریب متعدد گاڑیاں آپس میں ٹکرا گئیں، حادثے میں پانچ فراد زخمی ہوگئے۔
ایک اور واقعے میں ٹوبہ ٹیک سنگھ موٹروے ایم فور پر دھند کے باعث مسافر وین، کاراور ٹرالر ٹکرانے سے چھ افراد زخمی ہوگئے جبکہ پھول نگر میں مسافر وین ٹرالر سےٹکرا گئی تین افراد زخمی ہوئے۔
خیال رہے لاہور اور ملتان سمیت پنجاب کے کئی شہروں میں اسموگ کی شدت برقرار ہے، آلودہ فضا میں سانس لینا انسانی صحت کیلئے خطرناک بن چکا ہے۔
پاکستان میں موٹر ویز پولیس کارکردگی کیسی ہے اور اہلکاروں کا شہریوں کے ساتھ رویہ کس حد تک قابل تعریف ہے؟ اے آر وائی نیوز کے پروگرام میں اس بات کا تفصیل سے احاطہ کیا گیا۔
پروگرام سرِعام کے میزبان اقرار الحسن نے موٹر وے پر اہلکاروں کے ساتھ خصوصی پروگرام کا انعقاد کیا اس موقع پر شہریوں اور موٹر وے پولیس کے درمیان ہونے والی گفتگو ریکارڈ کی گئی، اس دوران کچھ شہریوں کی جانب سے دلچسپ بہانے بھی سننے میں آئے۔
موٹر وے پولیس نے وہاں سے گزرنے والی ایک کار کو روکا، جس کے ڈرائیور نے سیٹ بیلٹ نہیں باندھی ہوئی تھی، ڈرائیور کا کہنا تھا کہ وہ دل کا مریض ہے اور سیٹ بیلٹ باندھنے سے اسے گھٹن کا احساس ہوتا ہے جسے پولیس نے تنبییہ کرکے جانے دیا۔
اس طرح ایک اور کار ڈرائیور نے بھی سیٹ بیلٹ نہیں باندھی اور پولیس کی جانب سے 500 روپے کا چالان دیا گیا اور ڈرائیور نے بغیر کسی بحث و مباحثے کے جرمانے کی رقم ادا کردی۔
اے آر وائی نیوز سے گفتگو کرتے ہوئے شہریوں نے مجموعی طور پر موٹر ویز پولیس کے رویے کی تعریف کی اور ایک اچھے شہری ہونے کا ثبوت پیش کرتے ہوئے آئندہ ٹریفک قوانین پر مکمل عمل درآمد کرنے کی یقین دہانی کرائی۔
جہاں تک رشوت خوری اور شہریوں کو بے جا تنگ کرنے کا سوال ہے اس حوالے سے موٹر وے پولیس کا تصور شہریوں کی نظروں میں بہت زیادہ مثبت ہے اور اے آر وائی سے گفتگو میں لوگوں نے اس عمل کی کُھل کر تعریف بھی کی۔
واضح رہے کہ ٹریفک قوانین پر عمل درآمد کرانے کے علاوہ نیشنل ہائی ویز اینڈ موٹر وے پولیس چوروں اور ڈاکوؤں کیخلاف بھی کارروائیاں کرتی ہے جس کی تازہ مثال گزشتہ روز سامنے آئی۔
موٹر وے پولیس نے ضلع رحیم یار خان کی پولیس کو مطلوب چھ مویشی چوروں کے گروہ کو گرفتار کرلیا۔ این ایچ ایم پی کے افسر برائے تعلقات عامہ کے مطابق موٹر وے پولیس کو ضلعی پولیس رحیم یار خان سے اطلاع ملی کہ 6 پیشہ ور مویشی چوروں کا ایک گروہ جو ڈاٹسن نمبر ایک آر ٹی-4174میں سفر کر رہا ہے اور روہڑی ٹول پلازہ سے موٹروے (ایم فائیو ) میں داخل ہو گا۔
اطلاع ملنے پر نیشنل ہائی ویز اینڈ موٹر وے پولیس نے گشت کرنے والی تمام گاڑیوں کو چوکس کر دیا اور گھوٹکی کے قریب ناکہ لگا کر مذکورہ گاڑی کو روک کر پورے گینگ کو گرفتار کر لیا۔
اوچ شریف: انٹر چینج پر موٹر وے پولیس نے پشاور سے سکھر ہتھیاروں کی کھیپ اسمگل کرنے کی کوشش ناکام بناتے ہوئے دو خاتون سمیت 4 ملزمان کو گرفتار کرلیا۔
تفصیلات کے مطابق ایم 5 موٹر وے پر اوچ شریف انٹر چینج کے قریب پولیس نے کارروائی کی اور ہتھیاروں کی بڑی کھیپ اسمگل کرنے کی کوشش ناکام بنادی۔
ایس پی موٹر وے کے مطابق اسلحے کی کھیپ ممکنہ طور پر سندھ کے کچے کے علاقے منتقل کی جارہی تھی، ہزاروں گولیاں اور اسلحہ کی کھیپ گاڑی کے خفیہ خانوں سے برآمد کی گئی۔
ایس پی موٹر وے نے بتایا کہ مزمان سے ایئر کرافٹ، جی تھری، کلاشنکوف، رائفلز، پستول کی بھاری کھیپ بھی برآمد کرلی گئی جبکہ کارروائی میں 2 خواتین سمیت 4 ملزمان کو گرفتار کرلیا گیا، ان سے مزید تفتیش جاری ہے۔
لاہور:موٹر وے پولیس نے ایمانداری کی مثال قائم کرتے ہوئے شہری کو 6 لاکھ مالیت کا موبائل فون لوٹا دیا، شہری کا موبائل فون موٹر وے پر گرگیا تھا۔
تفصیلات کے مطابق موٹر وے پولیس نے ایمانداری کی مثال قائم کردی، ترجمان نے بتایا کہ موٹر وے سے ملنے والا 6 لاکھ مالیت کا موبائل فون مالک کے حوالے کردیئے۔
لاہور سے فیصل آباد جانے والے شہری کا موبائل فون موٹر وے پر گرگیا تھا، شہری نے موٹر وے پولیس ہیلپ لائن 130 پر موبائل فون گمشدگی کی اطلاع دی، جس کے بعد پٹرولنگ افسران رمضان، دبیر اور اختر نے سیال موڑ کے قریب سے موبائل فون کو تلاش کیا۔
ترجمان کا کہنا تھا کہ ڈی ایس پی خرم شاہ نے اپنی نگرانی میں موبائل فون مالک کےحوالے کیا۔
کراچی: موٹر وے پولیس نے ملک بھر میں ٹریکر سسٹم کے ذریعے مسافر بسوں کی خود نگرانی شروع کر دی۔
موٹر وے پر اوور اسپیڈنگ کرنے والی مسافر بسوں کے ڈرائیورز ہوشیار ہو جائیں، موٹر وے پولیس نے ٹریکر سسٹم کے ذریعے اب باقاعدہ سیٹلائٹ مانیٹرنگ کا استعمال شروع کر دیا ہے۔
‘یہاں کیمرہ موجود نہیں ہے چلو گاڑی تیزی سے بھگا لیتے ہیں’ اکثر ڈرائیور یہی سوچ پر اووراسپیڈنگ کر جاتے ہیں، لیکن موٹر وے پر اب ایسا نہیں چلے گا۔
سیکٹر کمانڈر موٹر وے سید فرحان شاہ نے بتایا کہ پاکستان بھر میں مسافر بسوں کی مانیٹرنگ شروع کی گئی ہے، اور ایک شہر سے دوسرے شہر یا صوبے جانے والی ساڑھے 6 ہزار سے زائد بسوں کی ٹریکنگ ہو رہی ہے۔
انھوں نے کہا کہ اوور اسپیڈنگ کی وجہ سے حادثات بہت بڑھتے جا رہے تھے، جس کے سد باب کے لیے یہ نیا سلسلہ شروع کیا گیا ہے، پہلے پی ایس وی بسوں میں ٹریکر سسٹم لگے ہوتے تھے، ہم نے ان کے ساتھ میٹنگ کی اور ان کے ٹریکر کا سسٹم حاصل کر لیا۔
سیکٹر کمانڈر سید فرحان شاہ کے مطابق ٹریکر سسٹم کا ایکسس موٹر وے پولیس کے سیکٹر آفس میں لگایا گیا ہے، اور بسوں کی مانیٹرنگ آفس سے کی جاتی ہے، یعنی انٹر سٹی جانے والی بس اگر اوور اسپیڈ کرتی ہے تو اب موٹر وے پولیس خود ان کو ٹریک کرتی ہے، پولیس اب کمپنی کی محتاج نہیں رہی۔
انھوں نے بتایا کہ حد سے زیادہ رفتار سے جانے والے بسوں کو روکا جاتا ہے، اور نہ صرف ان پر جرمانہ کیا جاتا ہے بلکہ ان کو تنبیہ بھی کی جاتی ہے۔
سیکٹر کمانڈر کے مطابق روزانہ کی بنیاد پر تقریباً 100 سے زیادہ جرمانے کیے جا رہے ہیں، انھوں نے کہا کہ ہماری کوشش ہے کہ جرمانوں کی تعداد زیادہ نہ ہوں بلکہ ڈرائیور ہی اووراسپیڈنگ چھوڑیں، تاکہ حادثات میں کمی واقع ہو۔
لاہور : موٹروے پولیس کا کہنا ہے کہ 5 مئی کو شہباز گل کی گاڑی کو حادثہ پیش آیا تاہم وہ محفوظ رہے،ملزم نے ابتدائی تفتیش کے دوران اعتراف کیا اور کہا حادثہ تھا۔
تفصیلات کے مطابق تحریک انصاف کے رہنما شہباز گل کی گاڑی کو حادثے سے متعلق موٹروے پولیس کا مؤقف سامنے آگیا ، موٹروے پولیس نے کہا ہے کہ 5مئی کو شہباز گل کی گاڑی کو حادثہ موٹروے ایم ٹو ساؤتھ بمقام خانقاہ ڈوگراں کے قریب پیش آیا، ڈاکٹرشہباز گل اس حادثے میں محفوظ رہے۔
آئی جی پنجاب انعام غنی کا کہنا تھا کہ موٹروے پولیس اطلاع ملتے ہی فوراً جائے حادثہ پہنچ گئی، شہباز گل کے رشتے دار جابرعلی کی مدعیت میں درج کرائی گئی۔
انعام غنی نے کہا کہ واقعے کی ایف آئی آرکالیکے منڈی ضلع حافظ آباد میں درج کرلی گئی ہے اور ملزم وجاہت علی ولد لیاقت علی کو مریدکے سے گرفتارکرلیا گیا ہے۔
موٹروےپولیس نے بتایا کہ ایکسیڈنٹ شدہ گاڑی بھی پولیس کی تحویل میں ہے ، ملزم نے ابتدائی تفتیش کے دوران اعتراف کیا اور کہا حادثہ تھا، ملزم کے مطابق شہباز گل یا کسی اور کو نشانہ بنانا ہرگز مقصود نہیں تھا۔
پولیس نے مزید کہا کہ ملزم حادثہ کے بعد کوٹ سرور انٹر چینج سے فرارہوگیا ہے۔
