بھارت سمیت دنیا بھر میں ہندو برادری آج اپنا مذہبی تہوار ہولی منا رہی ہے اس موقع پر پڑوسی ملک میں سونے والی مٹھائی کے چرچے ہیں۔
بھارت سمیت دنیا بھر میں جہاں جہاں ہندو مذہب کے پیروکار مقیم ہیں وہ آج اپنا تہوار ہولی اپنے مذہبی عقائد کے مطابق منا رہے ہیں۔
رنگوں کے اس تہوار میں جہاں وہ ایک دوسرے پر رنگوں کی بارش کرتے ہیں۔ وہیں ایک دوسرے کو بطور تحفہ مٹھائی بھی پیش کی جاتی ہے۔
بھارت میں اس تہوار کے موقع پر انتہائی بیش قیمت مٹھائی کی دھوم مچی ہوئی ہے جس پر سونے کی تہہ چڑھی ہوئی ہے اور اس کی قیمت 50 ہزار بھارتی روپے (پاکستانی لگ بھگ ڈیڑھ لاکھ روپے) ہے۔
بھارتی میدیا کے مطابق ریاست اتر پردیش کے شہر گوندا میں واقع ایک مٹھائی کی دکان پر منفرد گجیا تیار کی گئی ہے جس کی قیمت 50 ہزار روپے (ڈیڑھ لاکھ پاکستانی) فی کلو مقرر کی گئی ہے جب کہ گجیا کے صرف ایک پیس کی قیمت بھی 1300 روپے بھارتی (پاکستانی لگ بھگ 4 ہزار روپے) ہے۔
اس مٹھائی کے بیش قیمت ہونے کی وجہ یہ ہے کہ اس گولڈن گجیا پر خالص 24 قیراط سونے کی تہہ چڑھائی گئی ہے جب کہ اس کے اندر ایک خاص قسم کا ڈرائی فروٹ ڈالا گیا ہے جس نے اس کو خوش ذائقہ ہونے کے ساتھ انتہائی بیش قیمت بھی بنا دیا ہے۔
دوسری جانب ہولی کے موقع پر ہی لکھنو میں ایک دکاندار نے 25 انچ لمبی اور 6 کلو وزنی گجیا بنا کر انڈیا بک آف ریکارڈ میں اپنا نام درج کروا لیا ہے۔
