مٹیاری کے علاقے نیو سعیدآباد کے گائوں غلام محمد انڑ میں رشتہ داروں نے خاتون کو تشدد کا نشانہ بنایا اور اس کی دونوں ٹانگیں توڑ دیں۔
اے آر وائی نیوز کے مطابق پولیس نے بتایا کہ 4 سے زائد افراد نے حسنہ نامی خاتون کو رسیوں سے باندھ کر شدید تشدد کیا، رشتے داروں نے خاتون پر اتنا تشدد کیا کہ اس کی دونوں ٹانگیں توڑ دیں، ملزمان نے خاتون پر تشدد کے بعد اس کے سر کے بال بھی کاٹ دیے۔
ایس ایس پی نے بتایا کہ پولیس نے اطلاع ملنے پر خاتون کو علاج کےلیے اسپتال منتقل کیا، تشدد کی شکار خاتون اسپتال میں انصاف کے لیے دہائیاں دیتی رہی۔
خاتون کا کہنا تھا کہ تشدد کرنے والوں نے الزام لگایا کہ میں نے ان کی بیٹی کو بھگایا ہے، لڑکی نے چند روز قبل پسند کی شادی کی جس سے میرا کوئی تعلق نہیں تھا۔
زخمی ہونے والی خاتون کا مزید بتایا کہ لڑکی نے خود پسند کی شادی کی مجھ پر تشدد کرکے ظلم کیا گیا، ایس ایس پی مٹیاری کی جانب سے واقعے کا نوٹس لے لیا گیا ہے۔
پولیس نے خاتون کو تشدد کا نشانہ بنا کر اس کی ٹانگیں توڑنے میں ملوث ایک ملزم کو گرفتار کرلیا ہے جب کہ باقی تین ملزمان کی تلاش جاری ہے۔
