گلگت بلتستان (11 اگست 2025): گلگت میں سیلاب سے متاثرہ دنیور نالے کی بحالی کے دوران مٹی کا تودا گر گیا، جس سے 8 رضاکار جاں بحق ہو گئے۔
تفصیلات کے مطابق گلگت میں سیلاب میں دنیور نالہ متاثر ہو گیا تھا، جس کی بحالی کا کام جاری تھا، اس دوران اچانک مٹی کا تودا گر گیا، جس کے نیچھے آٹھ افراد دب کر جاں بحق ہو گئے، جب کہ 4 افراد کو زخمی حالت میں نکال لیا گیا۔
ریسکیو حکام کے مطابق تودے تلے مزید افراد کے دبے ہونے کی اطلاعات ہیں، اور ہلاکتیں بڑھنے کا بھی خدشہ ہے۔
گلگت بلتستان میں سیلاب کی تباہ کاریوں کا سلسلہ جاری ہے، ترجمان صوبائی حکومت فیض اللہ فراق نے بتایا کہ ہنزہ شیشپر گلیشیئر بپھر گیا ہے، جس سے سڑکیں، فصلیں اور زمینیں بہہ گئیں، شیشپر نالے میں سیلاب اور پانی کے بہاؤ میں خطرناک اضافہ ہو گیا ہے۔
گلگت بلتستان : گلیشیئر بپھر گیا، سیلاب کی تباہ کاریوں کا سلسلہ جاری
سیلاب سے متصل آبادیوں کی زمینوں کو شدید نقصان پہنچا ہے، قراقرم ہائی وے بھی متاثر ہوئی ہے جس کے بعد شاہراہ ہنزہ ایک بار پھر بند کر دی گئی ہے، زرعی زمینیں، درخت اور کھیت سیلاب کی نذر ہو گئے ہیں۔
شاہراہ قراقرم کے کٹاؤ کے باعث ہنزہ کی ٹریفک معطل ہے، اور ٹریفک کو متبادل نگر روڈ سے گزارا جا رہا ہے، سڑکوں کی بحالی کے لیے بھی کام شروع کر دیا گیا ہے، دریائی و زمینی کٹاؤ سے نصف درجن گاڑیاں بال بال بچ گئیں، ماہرین کا کہنا ہے کہ موسمیاتی تبدیلیاں گلگت بلتستان میں خطرناک سطح پر پہنچ گئی ہیں۔
