Tag: مہم

دبئی پولیس کی رمضان کے آغاز پر گداگری کیخلاف آگاہی مہم

دبئی پولیس نے رمضان المبارک کے آغاز پر ”عقلمندی سے عطیہ دیں ” کے عنوان سے ایک آگاہی مہم کا آغاز کیا ہے۔

بین الاقوامی خبر رساں ادارے کی رپورٹ کے مطابق دبئی پولیس کی جانب سے شروع کی گئی اس مہم کا مقصد عوام کو پیشہ ور گداگروں کے دھوکے سے بچانا اور مستحق افراد کی صحیح طریقے سے مدد کو یقینی بنانا ہے۔

رپورٹس کے مطابق پولیس نے عوام کو خبردار کرتے ہوئے کہا ہے کہ وہ سڑکوں، مساجد اور عوامی مقامات کے قریب گھومنے والے گداگروں کی جھوٹی کہانیوں کے جھانسے میں نہ آئیں۔

دبئی پولیس کے مطابق یہ پیشہ ور گداگر لوگوں کی ہمدردی کا غلط فائدہ اٹھاتے ہیں اور ان کے عطیات کو غلط استعمال کرتے ہیں۔

پولیس نے عوام سے اپیل کی ہے کہ عطیات صرف مستند فلاحی اداروں کو دیں اور گداگری کی مشکوک سرگرمی کی اطلاع فوری طور پر پولیس کو دیں۔

پولیس کے مطابق ذمہ داری سے عطیات دینے سے نہ صرف کمیونٹی محفوظ رہے گی بلکہ اصل مستحق افراد کو ان کا حق مل سکے گا۔

دوسری جانب دبئی نے ویزا سروسز میں آسانی، رہائش اور دیگر سروسز کے لیے‘سلاما’AI پلیٹ فارم کا آغاز کر دیا۔

دبئی میں جنرل ڈائریکٹوریٹ آف ریذیڈنسی اینڈ فارنرز افیئرز (جی ڈی آر ایف اے) نے ایک نئے مصنوعی ذہانت کے پلیٹ فارم‘سلاما’کی نقاب کشائی کی ہے جس کا مقصد سرکاری خدمات کی کارکردگی کو جدید ٹیکنالوجی سے ہم آہنگ کر کے آسان بنانا ہے۔

پلیٹ فارم کی خدمات کا مقصد افراد کے لیے رہائش کے عمل کو آسان بنانا ہے۔

اس کی خصوصیات میں سے ”سلاما”صارفین کو رہائشی اجازت ناموں کی تجدید یا منسوخی، ویزہ سے متعلق پوچھ گچھ کے فوری جوابات حاصل کرنے، اور متعدد سسٹمز پر تشریف لائے بغیر یا سروس سینٹرز کا دورہ کیے بغیر لین دین مکمل کرنے کی سہولت فراہم کرنا ہے۔

اسرائیلی جیلوں سے مزید 46 فلسطینی رہا

یہ اضافہ پلیٹ فارم کو ایک انتہائی موثر اور صارف دوست ٹول بناتا ہے۔ ان کی خدمات کو مستقبل میں کمپنیوں کے لیے بڑھایا جائے گا۔

فروری 28, 2025
سندھ حکومت کا گھر گھر سوشل رجسٹری کروانے کا منصوبہ

کراچی: سندھ حکومت نے پولیو ورکرز کے ذریعے گھر گھر سوشل رجسٹری کروانے کا منصوبہ تیار کرلیا، پولیو ورکر فارم کے ذریعے معلومات حاصل کریں گے۔

تفصیلات کے مطابق چیف سیکریٹری سندھ سید ممتاز علی شاہ کی زیر صدارت اہم اجلاس منعقد ہوا، اجلاس میں پولیو ورکرز کے ذریعے گھر گھر سوشل رجسٹری کروانے کے منصوبے کی منظوری دے دی گئی۔

اجلاس کو بریفنگ میں بتایا گیا کہ رجسٹری مہم میں پولیو ورکر فارم کے ذریعے معلومات حاصل کریں گے، معلومات کی بنیاد پر ہر فرد کو الگ سے سوشل رجسٹری نمبر دیا جائے گا۔

چیف سیکریٹری سندھ کا کہنا تھا کہ عوام کی سماجی حالت کے بارے میں ڈیٹا بیس تیار کر رہے ہیں، حکومتی ریلیف کی مؤثر اور شفاف ترسیل کے لیے معلومات دستیاب ہونا چاہیئے، مہم کے لیے سندھ کابینہ نے 350 ملین روپے کی منظوری دی ہے۔

انہوں نے کہا کہ کراچی کے 12 یونین کونسلز میں سوشل رجسٹری کا پائلٹ پراجیکٹ مکمل کیا گیا ہے، پولیو ورکرز کو مہم کے لیے خصوصی تربیت فراہم کی جائے گی۔

نومبر 22, 2021
ٹائیفائیڈ کی وبا، امریکا نے ٹریول ایڈوائزری جاری کردی

واشنگٹن: امریکا نے پاکستان میں ٹائیفائیڈ کی وبا پھیلنے پر ٹریول ایڈوائزری جاری کر دی اور وبا کے خاتمے کے لیے مدد کی بھی پیش کش کی۔

تفصیلات کے مطابق امریکی محکمہ خارجہ نے ٹریول ایڈوائزری جاری کرتے ہوئے پاکستان کا سفر کرنے والوں کے لیے ٹائیفائیڈ کی ویکسی نیشن لازمی قرار دے دی۔ واشنگٹن انتظامیہ کا کہنا ہے کہ پاکستان میں ٹائیفائیڈ بخار خطرنک حد تک پھیل چکا ہے۔

امریکی محکمہ خارجہ کا کہنا تھا کہ پاکستان میں ٹائیفائیڈ کی وبا کا آغاز حیدر آباد سے ہوا۔

دوسری جانب ذرائع کا کہنا ہے کہ امریکا نے پاکستان کو وبا پر قابو پانے کے لیے مدد کی بھی پیش کش کی ہے تاہم انہیں اس معاملے پر شدید تشویش ہے، ٹائیفائیڈ کی وبا سب سے زیادہ کراچی اور اندرون سندھ میں ہے۔

سندھ بھر میں 48لاکھ بچوں کو ٹائیفائیڈ ویکسین فراہم کردی گئی

جبکہ پاکستان ٹائیفائیڈ سے بچاؤ کے لیے ہرممکن اقدامات کررہا ہے، اور ویکسین کا سلسلہ بھی جاری ہے۔

خیال رہے کہ ملک میں پہلی انسداد ٹائیفائیڈ مہم جاری ہے، جو 30 نومبر تک جاری رہے گی، اس دوران 9 ماہ سے 15 سال تک کے بچوں کو انسداد ٹائیفائیڈ ویکسین دی جائے گی۔

حکومتِ پاکستان نے یہ نئی ویکسین ورلڈ ہیلتھ آرگنائزیشن (ڈبلیو ایچ او) کے ذریعے منظور کروائی ہے اور یہ ویکسین صوبہ سندھ میں دو ہفتوں کی حفاظتی ٹیکوں کی مہم کے دوران استعمال کی جارہی ہے۔ صوبہ سندھ میں 2017 کے بعد سے اب تک ٹائیفائیڈ کے 10,000 کیسز درج کیے گئے۔

نومبر 25, 2019
کراچی نہیں چلے گا تو ملک نہیں چلے گا: علی زیدی

کراچی: وفاقی وزیر برائے بحری امور علی زیدی کا کہنا ہے کہ ہم نے صفائی مہم بطور ایک ماڈل شروع کی ہے، روز کی بنیاد پر کچرا اٹھنا چاہیئے۔ کراچی نہیں چلے گا تو ملک نہیں چلے گا۔

تفصیلات کے مطابق وفاقی وزیر برائے بحری امور علی زیدی نے اے آر وائی نیوز کے مارننگ شو باخبر سویرا میں خصوصی گفتگو کرتے ہوئے کہا کہ ہماری سوچ تھی کہ جو نالے سالوں سے صاف نہیں ہوئے وہ صاف کیے جائیں، صفائی نہ ہونے کے باعث نالوں پر تجاوزات بنا دی گئی ہیں۔

انہوں نے لیٹس کلین کراچی مہم کے حوالے سے گفتگو کرتے ہوئے کہا کہ نالوں کی صفائی نہ ہونے سے بارشوں میں نکاسی آب کا مسئلہ ہوتا ہے، ہزاروں ٹن کچرا کیماڑی کے پاس جمع ہوگیا ہے، ساحل پر کچرا جمع ہوتا رہا تو ہماری بندر گاہ بند ہوجائے گی۔ مہم سے ایک طرف تو صفائی ہوگی اور دوسری طرف آگاہی ملے گی، تحریک انصاف، ایم کیو ایم اور سندھ حکومت صفائی کے لیے ایک صفحے پر ہیں۔

علی زیدی کا کہنا تھا کہ ناصر حسین شاہ نے وزارت بلدیہ کا قلمدان سنبھالتے ہی فون کیا، ناصر حسین شاہ نے مہم میں بھرپور تعاون کی یقین دہانی کروائی ہے۔ ہمیں مہم کے لیے لاجسٹک مدد مل رہی ہے۔ ہم نے پانچ بڑے اور 6 دیگر نالوں کی صفائی کا منصوبہ بنایا۔ ہم نے مہم بطور ایک ماڈل شروع کی ہے۔

انہوں نے کہا کہ میئر کراچی کو بااختیار بنانے کے لیے ہم کام کر رہے ہیں۔ ہم سندھ حکومت اور دیگر اداروں پر روز صفائی کے لیے دباؤ ڈالیں گے۔ چندے پر مناسب اور غیر مناسب کی بحث سے باہر نکل آئیں۔ حکومت تو ایمبولینس بھی نہیں دیتی پھر بھی اسےٹیکس کیوں دیتے ہیں۔ ہمارے ہاں تو بارش کے بعد بیماریاں پیدا ہوتی ہیں۔ بارش کے بعد کی صورتحال سے بچے بڑے بیمار ہوتے ہیں۔

علی زیدی نے مزید کہا کہ سندھ حکومت کو ہمارے ساتھ مل کر لائحہ عمل بنانا پڑے گا، جو ہم صفائی کر رہے ہیں وہ ماڈل ہے، روز کی بنیاد پر کچرا اٹھنا بھی چاہیئے۔ بہت سارے نالے ڈی ایم سی اور بڑے نالے کے ایم سی کے تحت ہیں، شکر گزار ہوں فوج کا انہوں نے بھی تعاون کی یقین دہانی کروائی۔ کراچی نہیں چلے گا تو ملک نہیں چلے گا۔

اگست 7, 2019
اسرائیلی فوجی ایک بار پھرنہتے فلسطینیوں کے گھرمنہدم کرنے لگے

بیت المقدس : مقبوضہ بیت المقدس کی وادی الحمص کے سربراہ نے بتایا ہے کہ اسرائیلی عدالت نے متاثرہ خاندانوں کو 18 جولائی تک مکانات مسمار کرنے کی مہلت دی ہے۔

تفصیلات کے مطابق مقبوضہ فلسطین کے دارالحکومت یروشلم میں اسرائیلی بلدیہ کے عملے نے پولیس کی بھاری نفری کی موجودگی میں مقبوضہ بیت المقدس کے جنوب میں صور باھر قصبے کے ساتھ واقع وادی الحمص پر دھاوا بولا اور گھروں کو مسمار کرنے کی دھمکی کے ساتھ گھروں کی پیمائش کی۔

غیرملکی خبررساں ادارے کا کہنا تھا کہ وادی الحمص کمیٹی کے سربراہ حمادہ حمادہ نے کہا کہ مکانات مسماری کی منصوبہ بندی میں 237 رہائشی اپارٹمنٹس شامل ہیں جہاں 500 لوگ آباد ہیں۔

غیر ملکی خبر رساں ادارے کے مطابق حمادہ نے کہا کہ یروشلم کی بلدیہ نے رہائشیوں سے اپنے مکانات خود مسماری کرنے کا کہا نہیں تو انہیں مسمار کر دیا جائے گا اور زبردستی جرمانہ بھی وصول کیا جائے گا۔

انہوں نے مزید کہا کہ اسرائیلی عدالت نے خاندانوں کو 18 جولائی تک کی مہلت دی ہے کہ وہ اپنے مکانات مسمار کر دیں۔ مطلوبہ مکانات کو دیوار علیحدگی کے ساتتھ واقع ہونے اور سکیورٹی کے لیے خطرہ ہونے کا بہانہ بنا کر مسمار کای ھا رہا ہے۔

اسرائیلی قانون کے مطابق فلسطینیوں کے گھر دیوار سے 250 میٹر دور ہوں۔وادی الحمص میں 6000 فلسطینی آباد ہیں، مسماری کے بعد 500 لوگوں کو زیردستی وہان سے نکال دیا جائے گا۔

جولائی 11, 2019
انتخابات 2020، ٹرمپ نے الیکشن میں کامیابی کےلیے انتخابی مہم کا آغاز کردیا

واشنگٹن :امریکا کے صدارتی انتخابات 2020 میں کسی بھی ڈیموکریٹ کو ووٹ دیناشدت پسندانہ سوشلزم کو پروان چڑھانے اورامریکی خواب کی تباہی کے مترادف ہوگا

تفصیلات کے مطابق امریکی صدر ڈونلڈ ٹرمپ نے دوسری بار صدارت کے لیے انتخابی مہم شروع کردی، ڈونلڈ ٹرمپ نے فلوریڈا کے شہر اورلینڈو میں 20 ہزار حامیوں سے خطاب کرتے ہوئے کہا کہ جھوٹے میڈیا نے پہلے بھی میرے خلاف خبریں چلائیں۔

انہوں نے کہا کہ 2016ء میں انتخابات سے کچھ پہلے ایف بی آئی نے اوباما کو ممکنہ روسی مداخلت کا بتایا تو بارک اوباما نے کچھ نہیں کیا کیونکہ اُن کے خیال میں ہیلری کلنٹن جیت رہی تھیں۔

امریکی صدر نے خطاب کے دوران گذشتہ صدارتی مہم میں کیے گئے وعدوں کو دہراتے ہوئے ایک بار پھر غیر قانونی امیگریشن، میڈیا اور سابقہ صدارتی حریف ہلری کلنٹن کو تنقید کا نشانہ بنایا۔

غیر ملکی خبر رساں ادارے کے مطابق امریکی صدر کا کہنا تھا کہ صدر بن کر میں نے روس پر پابندیاں لگائیں۔

ڈونلڈ ٹرمپ نے اپنے مخالفین کے خلاف متعصابہ رویہ اختیار کرتے ہوئے وارننگ دی کہ 2020 میں ڈیموکریٹس ان سے ہار گئے تو کیا ہوگا۔

صدر ٹرمپ کا کہنا تھا کہ حریف جماعت ’ڈیموکریٹس‘ امریکہ میں شدت پسندانہ تبدیلیاں لے کر آئیں گے اور سرحد پار سے آنے والے تارکین وطن کے لیے قانونی چارا جوئی کریں گے تاکہ انتخابات میں ان سے ووٹ حاصل کر سکیں۔

ان کا کہنا تھا کہ ہمارا ملک قانون ماننے والے شہریوں کے لیے پناہ گاہ ہونا چاہیے نہ کہ غیر ملکی مجرموں کے لیے۔

امریکی صدر کا کہنا تھا کہ یہ آپ کی عظیم مہم اور تاریخ کے سب سے عظیم انتخابات کی میراث کو مٹانے کی کوشش کررہے ہیں، یہ آپ کو ختم کردیں گے اور ہمارے ملک کو بھی توڑ دیں گے۔

امریکی صدر ڈونلڈ ٹرمپ نے صدارتی انتخابات 2020 میں کسی بھی ڈیموکریٹ کو ووٹ دیناشدت پسندانہ اور سوشلزم سوچ کو پروان چڑھانے اورامریکی خواب کی تباہی کے مترادف قرار دیا۔

مزید پڑھیں : آئندہ ہفتے صدارتی الیکشن میں شرکت کا باقاعدہ اعلان کروں گی، ہندو ایم پی تلسی گبّارڈ

خیال رہے کہ رابرٹ کے علاوہ سینیٹر برنی سینڈرز، سینیٹر الزبتھ وارن، سینیٹر کمالا حارث، ہندو رکن کانگریس تلسی گبارڈ اور انڈیانا کے میئر پیٹی بٹیگیگ بھی ڈیموکریٹ پارٹی کی جانب سے صدارتی امیدوار ہیں۔

غیر ملکی خبر رساں ادارے کا کہنا ہے کہ 46 سالہ ڈیموکریٹ سیاست دان کو سنہ 2020 میں ہونے والے صدارتی انتخابات میں حصّہ لینے سے قبل ڈیموکریٹ پارٹی کے دیگر امیدواروں کو پارٹی الیکشن میں شکست دینا ہوگی، جو صدارتی الیکیشن سے پہلے ہوں گے۔

امریکی خبر رساں ادارے کے مطابق امریکا کے صدارتی انتخابات کی دوڑ میں ڈیموکریٹک کی جانب سے اب تک 19 امیدوار صدارتی انتخابات میں شامل ہوچکے ہیں۔

جون 19, 2019
اسرائیل بائیکاٹ مہم کیوں چلائی؟ امریکی حکام نے فلسطینی رضاکار کا ویزہ منسوخ کردیا

تل ابیب : امریکی حکام نے فلسیطینی رضاکار کا اسرائیل کے بائیکاٹ کی مہم چلانے کی پاداش میں ویزہ مسترد کردیا۔

تفصیلات کے مطابق امریکی حکام کی جانب سے اسرائیل کے بائیکاٹ کی مہم چلانے والے رضاکار کو امریکا میں داخلے سے روک دیا، امریکی حکام نے رضاکار مہم کو اسرائیل مخالف اقدامات قرار دیا۔

غیر ملکی خبر رساں ادارے کا کہنا ہے کہ بی ڈی ایس تحریک کے شریک بانی عمر برغوثی ہاروڈ یونیورستی، نیویارک یونیورسٹی اور شکاگو میں بائیں بازو کی جانب جھکاؤ رکھنے والے یہودی معبد میں اپنی مہم کے سلسلے میں بدھ کے روز امریکا روانہ ہونے والے تھے۔

غیر ملکی میڈیا کا کہنا ہے کہ امریکی حکام نے عین موقع پر رضاکار کو طیارے میں سوار ہونے سے روک دیا۔

خبر رساں ادارے کے مطابق برغوثی نے ایک بیان میں کہا کہ اسرائیل نہ صرف امتیازی سلوک، نسلی تطہیر اور کئی دہائیوں پر محیط فوجی تسلط پر مبنی نظام کو جاری رکھے ہوئے ہے۔

رضاکار کا کہنا تھا کہنا تھا کہ اسرائیل اپنے برانگیختہ کرنے والے ظالمانہ طریقوں کی امریکا اور دائیں بازو کے نظریات رکھنے والے اپنے قوم پرست ساتھیوں کے توسط سے مسلسل تکمیل کر تا چلا آ رہا ہے۔

عمر برغوثی نے بتایا کہ انہیں امریکا میں اپنی اسرائیل بائیکاٹ مہم کے حق میں رائے عامہ ہموار کرنے کے ساتھ وہاں مقیم اپنی بیٹی کی شادی میں بھی شرکت کرنا تھی۔

غیر ملکی میڈیا کے مطابق انھوں نے کہا کہ امریکا سفر کی اجازت نہ ملنے پر میرا دل دکھا ہے تاہم میں ڈرا نہیں ہوں۔

امریکی عرب انسٹی ٹیوٹ کے مطابق عمر برغوثی کے پاس امریکا کا باقاعدہ ویزہ تھا، جو جنوری 2021ء تک کارآمد ہے۔

تل ابیب کے بن گورین ہوائی اڈے پر فضائی کمپنی کے عملے نے انہیں بتایا کہ امریکی حکام نے ہدایت کی ہے کہ عمر برغوثی سفر کی اجازت نہ دی جائے۔

مزید پڑھیں : امریکا نے ’اونروا’ کی امداد بند کردی، فلسطینی پناہ گزین مشکل کا شکار

امریکی دفتر خارجہ کے ترجمان رابرٹ پیلاڈینو کے مطابق ان کا ملک ویزوں سے متعلق انفرادی فیصلوں کے بارے میں وضاحت جاری نہیں کرتا۔

پیلاڈینو نے برغوثی کے امریکی ویزہ مسترد کئے جانے کی وجہ بتائے بغیر کہا کہ اگر امریکی قانون کے تحت سیاسی بیان اور نقطہ نظر جائز ہو تو ایسے خیالات کی بنا پر امریکی قانون ویزہ سے انکار کا حق نہیں دیتا۔

اپریل 13, 2019
خاشقجی قتل سے قبل بن سلمان نے ناقدین کو خاموش کرانے کیلئے مہم کا آغاز کیا تھا، رپورٹ

واشنگٹن/ریاض : امریکی اخبار نے دعویٰ کیا ہے کہ محمد بن سلمان نے اپنے ناقدین کو خاموش کرانے کیلئے ایک سال قبل ’سعودی رپیڈ انٹر وینشن گروپ‘ کے نام سے ایک مہم شروع کی تھی۔

تفصیلات کے مطابق سعودی عرب کے ولی عہد محمد بن سلمان کی جانب سے خفیہ طور پر ایک مہم کا آغاز کیا گیا تھا جس کا مقصد اپنے ناقدین کو خاموش کرانا تھا۔

امریکی خبر رساں ادارے ’نیویارک ٹائمز‘ کی رپورٹ کے مطابق سعودی حکام نے اس منصوبے کو ’سعودی رپیڈ انٹر وینشن گروپ‘ کا نام دیا تھا جس کی مقصد سعودی شہریوں کی نگرانی، ناقدین کا اغواء، گرفتار اور ان پر تشدد تھا۔

امریکی خبر رساں ادارے کا کہنا تھا کہ مذکورہ ٹیم کی سربراہی شاہی عدالت کے رکن سعودی القحطانی کررہے تھے۔

امریکی میڈیا کا کہنا ہے کہ اسی ٹیم کے کارندوں نے گزشتہ برس استنبول میں محمد بن سلمان کی پالیسیوں کے سخت ناقد صحافی جمال خاشقجی کو قتل کیا تھا۔

امریکی خفیہ ایجنسیوں کی جانب سے سینیٹر کو بتایا گیا تھا کہ انہیں جمال خاشقجی کے قتل میں ولی عہد محمد بن سلمان ملوث ہونے پر یقین ہے تاہم سعودی حکومت مسلسل اس سے انکاری ہے۔

غیر ملکی میڈیا کا کہنا ہے کہ بعدازاں سعودی حکومت نے عالمی دباؤ پر صحافی کے قتل کا اعتراف کرتے ہوئے جمال خاشقجی کے قتل میں ملوث خفیہ ایجنسی کے اہلکاروں پر فرد جرم عائد کرتے ہوئے سزا دینے کی یقین دہانی کروائی تھی۔

امریکی خبر رساں ادارے کا کہنا ہے کہ سعودی ریپڈ انٹروینشن گروپ نے ہی خواتین اور انسانی حقوق کے لیے کام کرنے والی خواتین رضاکاروں کو گرفتار کیا تھا اور اب تک انہیں ذہنی اور جسمانی طور پر تشدد کا نشانہ بنایا جارہا ہے۔

غیر ملکی خبر رساں ادارے کا کہنا ہے کہ سعودی حکومت کی جانب سے ابھی تک سعودی رپیڈ انٹر وینشن گروپ کی تشکیل سے متعلق تردید یا تصدیق نہیں کی گئی ہے۔

مارچ 18, 2019
میڈیا مخالف بیانات، 300 اخبارات کی صدر ٹرمپ کے خلاف مہم

واشنگٹن : امریکی صدر ڈونلڈ ٹرمپ کی میڈیا مخالف بیانات پر امریکی اخبار دی بوسٹن گلوب کی صدر ٹرمپ کے خلاف اور میڈیا کے آزادی کے لیے شروع کی گئی مہم میں 300 سے زائد اخبارات شامل ہوگئے۔

تفصیلات کے مطابق امریکی صدر ڈونلڈ ٹرمپ کی جانب سے میڈیا کے خلاف ’تضحیک آمیز جنگ‘ پر امریکی اخبار دی بوسٹن گلوب نے گذشتہ ہفتے ملک گیر مہم کا اعلان کیا تھا اس سلسلے میں ‘#EnemyOfNone’ بھی استعمال کیا جار ہا ہے۔

برطانوی خبر رساں ادارے کا کہنا تھا کہ ڈونلڈ ٹرمپ کی جانب سے متعدد مرتبہ میڈیا کی رپورٹس کو جھوٹ پر مبنی قرار دیتے ہوئے میڈیا اور صحافیوں کو ’عوام کا دشمن‘ کہا گیا ہے۔

ڈونلڈ ٹرمپ کی جانب سے جمعرات کے روز سماجی رابطے کی ویب سایٹ ٹویٹر پر ٹویٹ کیا گیا تھا کہ ’جھوٹی خبریں دینے والا میڈیا اپوزیشن جماعت ہے، جو ہمارے عظیم ملک کے لیے بہت برا ہے لیکن ہم جیت گئے‘۔

THE FAKE NEWS MEDIA IS THE OPPOSITION PARTY. It is very bad for our Great Country….BUT WE ARE WINNING!

— Donald J. Trump (@realDonaldTrump) August 16, 2018

برطانوی نشریاتی ادارے کے مطابق اقوام متحدہ کے ماہرین کا کہنا ہے کہ ٹرمپ کے اس بیان نے صحافیوں کے خلاف تشدد کو بڑھایا ہے۔

غیر ملکی خبر رساں ادارے کا کہنا تھا کہ دی بوسٹن گلوب نے 16 اگست کو ’انتظامیہ کے پریس پر حملوں کے خطرات‘ پر اداریہ لکھنے کا اعلان کرتے ہوئے دیگر خبر رساں اداروں کو بھی مذکورہ موضوع پر اداریہ لکھنے کی درخواست کی تھی۔

جس کے بعد ابتدائی طور پر بوسٹن گلوب کو 100 صحافتی اداروں کی جانب سے مثبت ردعمل ملا جو اب بڑھ کر 350 تک جا پہنچا ہے، اس مہم میں امریکا کے نامور قومی اخبارات اور چھوٹے مقامی اخبارات شامل ہیں، اس مہم میں بین الاقوامی اشاعتی ادارے بھی شامل ہیں جن میں برطانوی اخبار دی گارجین بھی اس مہم کا حصہ ہے۔

ڈونلڈ ٹرمپ کے میڈیا مخالف بیانات کے رد عمل میں اخبارات نے کیا لکھا؟

امریکی خبر رساں ادارے دی بوسٹن گلوب نے ’انتظامیہ کے پریس پر حملوں کے خطرات‘ کے موضوع پر لکھے گئے اداریے کی سرخی شائع کی کہ ’صحافی دشمن نہیں ہیں‘ اور آزاد میڈیا امریکا کے 200 برس سے قائم اصولوں کا اہم جز پے۔

امریکی اخبار نیو یارک ٹائمز نے مہم میں حصّہ لیتے ہوئے اداریہ تحریر کیا جس کی سرخی یہ تھی کہ ’آزاد میڈیا کو آپ کی ضرورت ہے اور ڈونلڈ ٹرمپ کو طنز کے نشتر چلاتے ہیں وہ جمہوریت کے لیے شدید خطرے کا باعث ہے‘۔ امریکی اخبار نے اداریے میں مختلف اخبارات کے نمونے بھی شائع کیے۔

خیال رہے کہ امریکی صدر ڈونلڈ ٹرمپ کے سماجی رابطے کی ویب سایٹ ٹویٹر پو موجود آفیشل اکاؤنٹ کے مطابق صدر ٹرمپ 281 مرتبہ میڈیا کے خلاف بیان دے چکے ہیں۔

اگست 17, 2018
بحریہ ٹاؤن اور بلدیہ عظمیٰ کی کلین کراچی مہم

کراچی: بحریہ ٹاؤن اور بلدیہ عظمیٰ نے رضا کارانہ کلین کراچی مہم کے آغاز کا اعلان کردیا جس کے تحت کراچی سے یومیہ 12 ہزار ٹن کچرا صاف کیا جائے گا۔

تفصیلات کے مطابق چیئرمین بحریہ ٹاؤن اور میئر وسیم اختر کے درمیان کلین کراچی معاہدے پر دستخط کردیے گئے۔

مہم کے تحت کراچی سے یومیہ 12 ہزار ٹن کچرا صاف کیا جائے گا۔

اس موقع پر میئر کراچی وسیم اختر کا کہنا تھا کہ کراچی کے لوگوں کی جانب سے ملک ریاض کا شکریہ ادا کرتا ہوں۔ شہر تباہ و برباد ہوگیا ہے، ایسا معلوم ہوتا ہے کراچی کو دیکھنے والا کوئی نہیں۔

وسیم اختر کا کہنا تھا کہ 10 ماہ سے کراچی کی بہتری کی کوشش کی جارہی ہے۔

مہم کی تفصیلات بتاتے ہوئے انہوں نے کہا کہ ڈسٹرکٹ سینٹرل سے کلین کراچی مہم کا آغاز کریں گے۔ عید کے بعد کلین کراچی مہم کے تحت کام شروع کردیا جائے گا۔

انہوں نے کہا کہ معاہدے میں ہے کہ روزانہ کا کچرا اٹھانے کے لیے سندھ حکومت پالیسی بنائے۔ سندھ حکومت تعاون کرے، وزیر اعلیٰ ہمیں بلائیں مل کر بیٹھیں گے۔

بحریہ ٹاؤن کے چیئرمین ملک ریاض کا گفتگو کرتے ہوئے کہنا تھا کہ ہم میئر یا کراچی والوں پر احسان نہیں کر رہے۔ یہ سب اللہ اور عوام کی امانت ہے جو ہم کرنے جا رہے ہیں۔

انہوں نے کہا کہ آصف زرداری نے واضح کہا ہے کہ میئر کراچی کے ساتھ مل کر کام کریں۔ میئر وسیم اختر کی قیادت میں کراچی کی بہتری کے لیے کام کریں گے۔

ملک ریاض کا کہنا تھا کہ کراچی کی بہتری کے لیے 10 ارب تک کام کرنے کے لیے تیار ہیں۔

اگست 23, 2017