پشاور: وزیر اعلیٰ خیبر پختونخواہ محمود خان نے قبائلی علاقے مہمند میں 2 ارب روپے کی لاگت سے تعمیر گورسل اور سرلڑہ روڈ کا افتتاح کردیا، انہوں نے کہا کہ ہم نے تمام پسماندہ علاقوں کو ترقی یافتہ بنانا ہے۔
تفصیلات کے مطابق وزیر اعلیٰ خیبر پختونخواہ محمود خان نے قبائلی علاقے مہمند کا دورہ کیا، وزیر اعلیٰ نے 2 ارب روپے کی لاگت سے تعمیر گورسل اور سرلڑہ روڈ کا افتتاح کیا۔
اس موقع پر وزیر اعلیٰ کا کہنا تھا کہ 10 سالہ ترقیاتی منصوبوں کے پہلے 2 سال پلاننگ میں لگنے تھے، اب ہم سرمایہ کاری کی طرف جا رہے ہیں۔
انہوں نے کہا کہ موجودہ ترقیاتی منصوبوں سے علاقے کی تقدیر بدل جائے گی، آج کے دورے میں مامد گٹ اسپتال کا افتتاح بھی ہوگا۔
وزیر اعلیٰ کا مزید کہنا تھا کہ ہم نے تمام پسماندہ علاقوں کو ترقی یافتہ بنانا ہے، تمام وعدے پورے کریں گے۔
اس سے قبل وزیر اعظم نے مہمند کے لیے صحت انصاف کارڈ کے اجرا کا اعلان کرتے ہوئے کہا تھا کہ صحت کارڈ سے عام آدمی کی زندگی بہتر ہوگی۔
وزیر اعظم نے قبائلی عمائدین سے گفتگو کرتے ہوئے کہا تھا کہ قبائلی علاقوں کی روایتیں تبدیل نہیں ہوں گی، قبائلی علاقوں میں انضمام کے بعد ترقی اور خوشحالی آئے گی۔
انہوں نے کہا تھا کہ قبائلی اضلاع میں سیاحت کو بھی فروغ دیا جائے گا، طے کیا جا رہا ہے ترقیاتی کاموں پر فنڈز کا کیسے استعمال کیا جائے۔
