Tag: مہنگائی کی شرح

اسلام آباد : ملک میں ایک ہفتے کے دوران مہنگائی کی شرح میں9.95فیصد کا تاریخی اضافہ سامنے آیا ہے۔

ادارہ شماریات کے جاری اعداد و شمار کے مطابق ہفتہ وار مہنگائی40 فیصد سے تجاوز کرگئی،
جس کے مطابق مہنگائی کی سطح41.90فیصد ریکارڈ کی گئی۔

ایک ہفتے میں 25 اشیاء کی قیمتوں میں اضافہ ریکارڈ کیا گیا، گیس کی قیمت میں 1416 روپے فی ایم ایم بی ٹی یو اضافہ ہوا، 190گرام چائے کا پیکٹ 49روپے94پیسے مہنگا ہوا۔

ادارہ شماریات کے مطابق دال مسور16روپے36پیسے، چکن14روپے2پیسے فی کلو مہنگی جبکہ 20کلو آٹے کا تھیلا72روپے55پیسے مہنگا ہوا۔

ایک ہفتے میں ایل پی جی سلنڈر کی قیمت63روپے37پیسے بڑھی، بجلی ایک روپے32پیسے فی یونٹ سستی ہوئی، چینی فی کلو6روپے8پیسے سستی ہوئی،ایک ہفتے میں 13 اشیائے ضروریہ کی قیتموں میں استحکام رہا۔

اسلام آباد : وزارت خزانہ نے ملک میں افراط زر کی شرح 27 سے بڑھ کر 31 تک فیصد تک جانے کا خدشہ ظاہر کردیا اور کہا پٹرولیم مصنوعات اور بجلی کی قیمتوں میں اضافے کے باعث مزید مہنگائی بڑھے گی۔

تفصیلات کے مطابق وزارت خزانہ نے ملکی معاشی صورتحال پر ماہانہ رپورٹ جاری کر دی، جس میں بتایا گیا کہ رواں مالی سال جولائی میں ترسیلات زر 19.3فیصدکم ہوگئیں ، پٹرولیم مصنوعات اور بجلی کی قیمتوں میں اضافے کےباعث مزید مہنگائی بڑھے گی۔

رپورٹ میں کہا گیا کہ ملک میں افراط زر کی شرح 27 سے بڑھ کر 31 تک فیصد تک جانے کا خدشہ ہے، پٹرولیم قیمتوں میں حالیہ 2باراضافے سے ٹرانسپورٹ کے کرائے بڑھے۔

وزارت خزانہ کا کہنا تھا کہ درآمدات پر پابندیاں ہٹانےسے تجارتی خسارہ 1.4 سے بڑھ کر 2.4 ارب ڈالر تک پہنچ گیا، جولائی میں کرنٹ اکاؤنٹ خسارہ 50 کروڑ ڈالر سے بڑھ کر 81 کروڑ ڈالر تک پہنچ گیا جبکہ مالیاتی دباؤ کی وجہ سےبجٹ خسارہ 7.7 فیصد تک پہنچا۔

رپورٹ میں بتایا گیا کہ مختص کردہ بجٹ سےزائد اخراجات نہ کرنا معاشی حکمت عملی کا حصہ ہے، شرح سود میں اضافے سےمجموعی حکومتی اخراجات پر دباؤ بڑھ گیا۔

وزارت خزانہ کے مطابق گزشتہ مالی سال کےدوران درآمدات میں کمی ٹیکس وصولیاں کم ہوئیں تاہم کسان پیکج سےزرعی شعبے پر مثبت اثرات مرتب ہونے کی امید ہے، کسان پیکج کی وجہ سےزرعی پیداواری ہدف حاصل ہو سکے گا۔

رپورٹ میں کہنا ہے کہ بڑی صنعتوں کی پیداوار میں منفی سےمثبت بہتری کی امید ہے، ماہانہ معاشی اعدادوشمار ملک میں معاشی بنیادوں کی بہتری کےاعشاریے ہیں، سیلاب زدہ علاقوں میں بحالی کیلئے بڑے وسائل درکار ہیں۔

اسلام آباد: ملک میں بے لگام مہنگائی نے غریب طبقے کو بے حال کردیا ہے، ہوشربا مہنگائی میں روز بروز اضافہ ہورہا ہے، ملک میں حالیہ ہفتے کے دوران مہنگائی کی شرح میں 1.30 فیصد اضافہ ہوا، جبکہ سالانہ بنیادوں پر مہنگائی کی شرح 29.83 فیصد ریکارڈ کی گئی۔

ملک میں حالیہ ہفتے کے دوران 23 اشیائے ضروریہ مہنگی،7 سستی ہوئیں جبکہ 21 کی قیمتیں مستحکم رہی ہیں،29ہزار 518 روپے سے 44 ہزار 175روپے ماہانہ آمدن والوں کیلئے مہنگائی کی شرح 33فی صد رہی ہے۔

وفاقی ادارہ شماریات کی ہفتہ وار رپورٹ میں بتایا گیا ہے کہ ملک میں حالیہ ایک ہفتے کے دوران دال چنا،دال مونگ،چکن،آٹا،ویجی ٹیبل گھی اور سرسوں کے تیل سمیت 7 اشیاء ضروریہ کی قیمتوں میں کمی آئی اور21 کی قیمتوں میں استحکام رہا۔

جبکہ دال ماش، دال مسور، آلو، ٹماٹر، لہسن، انڈے، چینی، بیف، مٹن، کھلا دودھ،دہی، گڑ، سرخ مرچ پاوڈر اور پٹرولیم مصنوعات سمیت بنیادی ضروریات زندگی کی 23 اشیاء کی قیمتیں مزید بڑھ گئیں۔

باسمتی ٹوٹا چاول کی قیمت میں 5 روپے،گڑ کی فی کلو قیمت میں 3 روپے کا اضافہ دیکھنے کو ملا، اسی طرح پیاز 3 روپے فی کلو،انڈے فی درجن 10 روپے مہنگے ہوئے۔

گزشتہ ہفتے 200 گرام پسی ہوئی مرچ 25 روپے مہنگی ہوئیں جبکہ لہسن فی کلو 20 روپے مہنگا ہوا، ایل پی جی کے 11.67 کلو گھریلو سلنڈر کی قیمت میں 255 روپے کا اضافہ ہوا۔

گزشتہ ہفتے سرسوں کا تیل 9 روپے سستا ہوا،برائلر زندہ مرغی فی کلو 6 روپے سستی ہوئی، ویجیٹبل گھی 3 روپے،دال چنا اور دال مونگ ایک ایک روپیہ فی کلو سستی ہوئیں۔