کراچی: جماعت اسلامی کراچی نے مہنگائی کے خلاف آج شام شارع فیصل پر احتجاج کا اعلان کر دیا ہے۔
تفصیلات کے مطابق حافظ نعیم الرحمان نے کراچی میں پریس کانفرنس میں کہا کہ آئی ایم ایف کے ایجنڈے کو پوری طاقت سے آگے بڑھایا جا رہا ہے، اس کے خلاف کراچی سمیت پورا پاکستان میدان میں نکلے اور احتجاج کرے۔
انھوں نے کہا ہم پر مسلط آئی ایم ایف کی کٹھ پتلی حکومت انتخابات کرانے کے علاوہ سب کچھ کر رہی ہے، اس کا مینڈیٹ لوگوں کو خود کشی کرنے پر مجبور کرنا اور بجلی کے بلوں سے تنگ آئے لوگوں پر پیٹرول بم گرانا ہے، اس وقت ملکی صورت حال کسی ڈیفالٹ سے کم نہیں ہے۔
حافظ نعیم الرحمان نے کہا عوام کو اپنے حق کے لیے باہر نکلنا ہوگا، پرامن مزاحمت اور زبردست احتجاج کرنا ہے، کراچی سمیت پورا پاکستان میدان میں نکلے اور احتجاج کرے۔
انھوں نے مزید کہا کل سراج الحق کی سربراہی میں دھرنا ہوگا، اور آج شارع فیصل اسٹار گیٹ پر ہمارا احتجاج ہوگا، نوجوانوں سے گزارش ہے شام 5 بجے سڑکوں پر نکلیں، ہم 15 پوائنٹ بتا رہے ہیں نوجوان وہاں پر کھڑے ہو کر احتجاج کریں۔
حافظ نعیم نے خبردار کیا ہے کہ اگر حکومت نے مزاحمت کرنے کی کوشش کی تو منہ کی کھانا پڑے گی۔
