دنیا کی امیر ترین شخصیات میں شامل جیف بیزوس اور لارین سانچیز کی شادی سے ایک روز قبل اٹلی میں عوامی احتجاج نے سب کو حیران کر دیا ہے۔
اس وقت پوری دنیا کی نظریں ایمازون کے بانی اور معروف کاروباری شخصیت 61 سالہ چیف بیزوس اور ان کی گرل فرینڈ ایمی ایوارڈ یافتہ صحافی 55 سالہ لارین سانچیز کی شادی پر لگی ہیں، جو جمعہ 27 جون کو اٹلی وینس میں ہو رہی ہے اور اس میں شرکت کے لیے دولہا دلہن سمیت مہمان بھی وینس پہنچ چکے ہیں۔
میڈیا رپورٹس کے مطابق اس شادی کو رواں سال کی مہنگی ترین اور پرتعیش شادی بھی کہا جا رہا ہے اور ایک اندازے کے مطابق اس شادی میں 56 ملین ڈالر (15 ارب روپے) سے زائد پیسہ لٹایا جائے گا۔
جیف بیزوس کی شادی کی تین روزہ تقریبات کا آغاز آج (جمعرات) کی شب ہوگا۔ تاہم شادی کی مرکزی تقریب سے ایک روز قبل شادی کے مقام اٹلی وینس میں اس مشہور شادی کے خلاف لوگ سڑکوں پر نکل آئے اور احتجاج کیا۔
برطانوی خبر رساں ادارے بی بی سی کے مطابق احتجاج کرنے والوں میں وینس کے دولت سے محروم لوگوں پر مشتمل فور بیزوس نامی گروپ سمیت دیگر کئی گروپس، سیاسی اور سماجی کارکن شامل ہیں۔
کچھ لوگ اس پر تعیش شادی کے خلاف ہیں تو کسی کو شادی کی تقریبات کے لیے وینس شہر کے کئی مقامات کے بند ہونے پر اعتراض ہے۔
اس احتجاج میں وہ گروپس بھی شامل ہیں جو وینس میں سیاحت کی زیادتی، ماحولیاتی آلودگی اور جیف بیزوس کی ڈونلڈ ٹرمپ کے لیے حمایت کے خلاف ہیں۔
واضح رہے کہ یہ جیف بیزوس اور لارین سانچیز دونوں کی دوسری شادی ہے اور دونوں کے پہلی شادیوں سے مشترکہ طور پر سات بچے ہیں۔
اطلاعات کے مطابق جیف بیزوس اور لورین سانچیز کی شادی کی تقریبات اٹلی کے مقامی وقت کے مطابق جمعرات کی رات میڈونا ڈیل اورتو کے قدیم چرچ میں شروع ہونی تھیں، جو کہ اپنی نائٹ لائف کے لیے مشہور علاقے کناریو میں واقع ہے۔
وینس سٹی ہال نے بدھ کو اس حوالے سے ایک ہدایت نامے میں کہا تھا کہ اس علاقے کو بند کر دیا جائے تاکہ شادی میں شرکت کرنے والے مہمانوں اور گذشتہ کئی ہفتوں سے احتجاج کرنے والے مظاہرین کو علیحدہ رکھا جا سکے۔
تاہم اس شادی کے شاہانہ اخراجات اور عوام کی زندگی پر پڑنے والے اس کے اثرات اور ان کے احتجاج کے باث منتظمین کو ان تقریبات کے مقامات بھی بدلنے پڑے ہیں۔
جیف بیزوس اور لورین سانچیز کی شادی تقریبات کے شاہانہ اخراجات کی ایک جھلک:
اطالوی میڈیا کے مطابق وینس میں تقریباً ہر لگژری ہوٹل اور واٹر ٹیکسیز کو شادی کی تقریبات کے لیے پیشگی بُک کر لیا گیا ہے۔
پانچ ہوٹل مکمل طور پر بک ہو چکے ہیں اور اطلاعات ہیں کہ سابق امریکی میرینز سکیورٹی فراہم کریں گے۔
وینس کے ایئرپورٹ پر پرائیویٹ جیٹ طیاروں کی آمد متوقع ہے جبکہ پرائیویٹ بحری جہاز بندرگاہ پر لنگر انداز ہوں گے۔
وینیتو کی مقامی حکومت کے صدر لوکا زئیا کے مطابق اس شادی پر پانچ کروڑ پچاس لاکھ ڈالرز اخراجات آئیں گے۔
اطلاعات کے مطابق اس شادی کی دنیا بھر سے 200 مشہور شخصیات کو مدعو کیا گیا ہے جو وینس پہنچ چکی ہیں۔ ان میں امریکی صدر ڈونلڈ ٹرمپ کی بیٹی ایوانکا ٹرمپ اور داماد جیرڈ کشنر بھی شامل ہیں۔
