کراچی : میئر کراچی وسیم اختر نے کہا ہے کہ شہر سے کچرا اٹھانے کے لیے ہر قسم کی دستیاب سہولیات کو بروئے کار لا رہے ہیں جس کے لیے ابتدائی مرحلے میں 2 ضلعوں کو آؤٹ سورس کیا ہے۔

یہ بات انہوں نے ضلع وسطی میں کچرے کی صورتِ حال کا جائزہ لیتے ہوئے میڈیا سے گفتگو میں کہی گئی انہوں نے کہا کہ سابق حکومت نے 8 سال میں کچرا اٹھانے کا نظام درست نہیں کیا اور نہ ہی اس حوالے سے کوئی منصبہ بندی کی۔

میئر کراچی وسیم اختر نے کہا کہ مشکلات ضرور ہیں لیکن میسر وسائل میں زیادہ سے زیادہ کام کرنے کی ٹھانی ہے اس لیے ابتدائی طور پر 2 ضلعوں کو آؤٹ سورس کیا ہے اور اپنے وسائل میں رہتے ہوئے ان دونوں ضلعوں میں سے کچرا اٹھا لیں گے۔

انہوں نے کہا ہے کہ کراچی میں پرانے درخت دوبارہ لگانےکی کوشش کر رہے ہیں تاکہ بساط بھر تک شہر میں آلودگی اور درجہ حرارت میں اضافے کو روکنے میں کامیاب رہ سکیں۔

وسیم اختر نے کہا کہ سڑکوں پر جو لائٹس نظر آرہی ہیں پہلے وہ بھی نہیں تھیں یہ 8 سال کا بگاڑ ہے جو آہستہ آہستہ بہتر کر رہے ہیں اور پُر امید ہیں کہ اس شہر کی رونقیں دوبارہ بحال کرنے میں کامیاب رہیں گے۔

کراچی: میئرکراچی وسیم اختر نے محکمہ فوڈ اینڈ کوالٹی کنٹرول کی ناقص کارکردگی پر ڈائریکٹر فوڈ کو سبکدوش جب کہ متعدد افسران کو معطل کر دیا۔

تفصیلات کے مطابق مسلسل عوامی شکایات پر نوٹس لیتے ہوئے میئر کراچی وسیم اختر نے محکمہ فوڈ اینڈ کنٹرول کے ڈائریکٹر ڈاکٹر رضی الرحمان کو عہدے سے فارغ کردیا ہے اور انہیں ایم ایس عباسی اسپتال کو رپورٹ کرنے کی ہدایت کی گئی ہے۔

ذرائع کے مطابق میئر کراچی کی جانب سے عہدوں سے سبکدوش کیے گئے افسران میں ڈاکٹر آصف سعید اور ڈاکٹر طارق مصطفیٰ بھی شامل ہیں جب کہ فوڈانسپکٹر ظفرشاہ، طارق جاوید، اشرف گل، صاحب نسیم کو بھی معطل کردیا گیا ہے۔

ڈائریکٹر فوڈ کو عہدے سے ہٹانے جب کہ محمکہ فوڈ اینڈ کنٹرول کے دیگر افسران کی معطلی کے بعد میئر کراچی نے متعلقہ افسران کے خلاف تحقیقات کا حکم دے دیا ہے جس کے لیے ایک انکوائری کمیٹی تشکیل دے دی گئی ہے۔

واضح رہے میئر کراچی کا عہدہ سنبھالنے کے بعد وسیم اختر کا یہ سب سے بڑی انتظامی کارروائی ہے جس میں پورے محکمے کے اعلیٰ ترین افسران کو عوامی شکایات کی بناء پر معطل کردیا ہے۔

کراچی : میئرکراچی وسیم اختر نے کہا ہے کہ شہر کے تیس بڑے نالوں کی صفائی کے لیے یکمشت فنڈز مہیا کیا جائے، تمام نالوں کی ایک ساتھ صفائی کرنے سے شہر سے نکاسی آب کا مسئلہ حل ہو جائے گا۔

یہ بات میئر کراچی نے شارع فیصل، ضیاالدین روڈ، کلفٹن اور نہرخیام کے دورے کے موقع پر صحافیوں سے بات کرتے ہوئے کہی، انہوں نے اختیارت کی کمی اور ناکافی فنڈز کی قلت کا تذکرہ کرتے ہوئے کہا مطالبہ کیا کہ کراچی کے 30 نالوں کی صفائی کے لیے فنڈز کا فوری اجراء کیا جائے۔

میئر کراچی وسیم اختر نے کہا کہ ناکافی سہولیات ہونے کے باوجود بلدیاتی نمائندے نکاسی آب کے لیے اپنی مدد آپ کے تحت دن و رات کام کر رہے ہیں تاہم مسئلے کے حل کے لیے ضروری ہے کہ نالوں کی صفائی کا کام مستقل بنیادوں پرکیا جائے۔

انہوں نے کہا کہ لینڈ مافیا نہر خیام کی زمین پر قبضے کے لیے سرگرم ہیں کیوں کہ نہر خیام کے اطراف کی زمین نہایت قیمتی ہے جس پر قبضے کی کوشش کو پہلے بھی ناکام بنا چکا ہوں اور آئندہ بھی قیمتی سرکاری زمینوں پر قبضے کی ہر کوشش کو ناکام بنادیا جائے گا۔

میئر کراچی کا کہنا تھا کہ با اختیار بلدیاتی اداروں کے بغیر شہر کے بنیادی مسائل کا حل ممکن نہیں، بلدیاتی نمائندے گلی محلوں سے منتخب ہوئے ہیں اور وہاں کے مسائل سے باخوبی واقف ہیں اور ان کے حل کے لیے کوشاں بھی ہیں تا ہم فنڈز کی کمی آڑے آرہی ہے۔

کراچی : دہشت گردوں کو علاج کی سہولت فراہم کروانے سے متعلق ڈاکٹر عاصم کیس میں ضمانت پر رہا میئر کراچی وسیم اختر کو انسداد دہشت گردی کی عدالت نے حاضری سے استثنیٰ دے دیا ہے۔

تفصیلات کے مطابق میئر کراچی وسیم اختر کی عدالت میں حاضری سے استثنیٰ حاصل کرنے کی درخواست انسداد دہشت گردی کی عدالت نے قبول کرتے ہوئے انہیں عدالت میں حاضری سے مستثنیٰ قرار دے دیا ہے۔

اس موقع پر وسیم اختر نے عدالت کا شکریہ ادا کرتے ہوئے کہا کہ معزز عدالت جب بھی بلائے گی حاضر ہوجاؤں گا اور اب مزید تندہی اور جانفشانی سے اہلِ کراچی کے لیے کام کروں گا۔

گزشتہ روز کراچی میں آگ لگنے کے واقعہ پر پوچھے گئے سوال کے جواب میں ان کا کہنا تھا شہر میں کیمیکل مواد اور اس سے جڑی چیزیں نہ رکھی جائیں ایسے ذخائر کو شہر سے باہر منتقل کردیا جائے تو زیادہ بہتر ہو گا۔

میئر کراچی نے کہا کہ بلدیہ عظمی کراچی نے محدود اختیارات اور فنڈز کی کمی کے باوجود شہر کی خدمت کرنے کا عزم کر رکھا ہے جس کے لیے پہلے مرحلے میں سو دن کی خدمتی مہم کا آغاز کردیا ہے جس کا دائرہ کار مزید یو سیز اور ضلعی حکومتوں تک پھیلایا جائے گا۔

کراچی : میئر کراچی اور تحریکِ انصاف کے رہنما عمران اسماعیل نے کراچی کی تعمیر اور ترقی کے لیے مل کر کام کرنے کے عزم کا اظہار کرتے ہوئے مشترکہ کوششوں کو جاری رکھنے کا فیصلہ کیا ہے۔

میئر کراچی وسیم اختر عہدہ سنبھالنے کے بعد پہلی مرتبہ پاکستان تحریک انصاف کراچی کے مرکزی دفتر انصاف ہاؤس پہنچےتھے جہاں ان کا استقبال تحریکِ انصاف کے رہنماؤں عمران اسماعیل، رکن صوبائی اسمبلی خرم شیر زمان اور یو سی چیئرمین فردوس شمیم نقوی نے کیا۔

ملاقات کے بعد میڈیا سے گفتگو کرتے ہوئے میئر کراچی وسیم اختر نے کہا کہ کراچی کے مسائل کے حل اور بلدیاتی نمائندوں کے اختیارات کے حصول کے لیے مشترکہ حکمتِ عملی طے کرنے کے لیے ہر جماعت سے رابطہ کریں گے خوشی ہے کہ بلدیاتی اداروں کے اختیارات کے مسئلے پر تحریک انصاف سمیت دیگر جماعتیں ایک صفحے پر ہیں۔

انہوں نے کہا کہ وزیراعلٰی سندھ سے ملاقات اچھی رہی وہ کراچی کے مسائل سے آگاہ ہیں اور ان کے حل کا یقین بھی دلایا ہے بلدیاتی نمائندے بھی سندھ حکومت کی ٹیم کا حصہ ہیں اور اپنی کارکردگی سے حکومت کا اچھا چہرہ سامنے لانا چاہتے ہیں اگر کراچی ترقی کا کرے گا تو اس کا کریڈٹ وزیراعلٰی سندھ کو بھی جائے گا۔

میئر کراچی نے کہا کہ ہم نے لیڈر نہیں بننا ہے بلکہ عوام کی خدمت کرنی ہے سیاست کرنے کے لیے پارلیمنٹ اور صوبائی اسمبلیاں موجود ہیں ہمیں اختیارات دے کر کام کرنے کا موقع دیا جائے۔

اس موقع پر تحریک انصاف کے رہنما عمران اسماعیل نے میڈیا سے گفتگو کے دوران وسیم اختر کی آمد پر شکریہ ادا کرتے ہوئے کہا کہ بلدیاتی مسائل کے حل کے لیے مل کر کام کریں گے اور شہر کراچی کی تعمیر و ترقی کی خاطر آج ہماری ملاقات ہوئی ہے۔

عمران اسماعیل ایک سوال کے جواب میں کہا کہ ہماری اس ملاقات کو آئندہ کا انتخابی اتحاد یا کچھ اور نہ سمجھا جائے عین ممکن ہے کہ اگلے انتخابات میں ہم ایک دوسرے کے مد مقابل ہوں گے سب جانتے ہیں کہ نائن زیرو سے انصاف ہاؤس تک کے سفر میں تلخیاں ہیں۔

کراچی : میئر کراچی وسیم اختر نے کہا ہے کہ کراچی کے مسائل کے حل کے لیے تمام توانائیاں بروئے کار لائیں گے اختیارات محدود صحیح لیکن عزم اور حوصلہ لا محدود ہے۔

وہ کراچی میں پریس کانفرنس سے خطاب کر رہے تھے انہوں نے بتایا کہ بلدیہ عظمی کراچی اپنے شہر کی تعمیر اور ترقی کے لیے 100 دن کا پلان ترتیب دیا ہے جس کے لیے بجٹ کا انتظام کرپشن کی روک تھام کر کے کی گئی ہے۔

اسی سے متعلق : عوامی رابطہ اورسو دن کی خدمتی مہم کا آغاز کریں گے،فاروق ستار

میئر کراچی کا کہنا تھا کہ مرحلے میں کراچی کے چار اضلاع میں ترقیاتی کاموں کا جال بچھانا چاہتے ہیں جس کے لیے ابتدائی طور پر بہ طور نمونہ عمل 15 سے 20 یو سیز میں اسکول، ڈسپینسری اور پلے گراؤنڈ بنانے جا رہے ہیں ہے۔

انہوں نے کہا کہ صوبائی حکیومت کی جانب سے اب تک فنڈز جا ری نہیں کیے ہیں اس لیے ان کاموں کے لیے بجٹ پارکنگ چارجز، فیولنگ، ٹھیکوں کی کوٹیشن وغیرہ میں لیکیج کو روک کر اور دیگر غیر ضروری اخراجات میں کمی کر کے اکھٹے کیے ہیں۔

انہوں نے کہا کہ تعمیراتی کاموں میں ہمارے یوسی چیئرمین، وائس چیئرمین،بلدیہ عظمی کے ملازمین،میری پارٹی کے کارکنان، مخیر حضرات اور دیگر رفاعی ادارے ہمارے معاون و مددگار ہوں گے کیونکہ یہ شہر سب کا ہے تو کام بھی سب نے ہی مل کے کرنا ہے۔

کراچی میں ترقی ہو گی تو ہر شخص اس سے مستفید ہو گا اس لیے سب نے کردار ادا کرنا ہے پورے پاکستان میں اس کا اثر پڑے گا۔

انہوں نے کہا کہ کراچی پورے ملک کو چلاتا ہے لیکن صوبائی اور وفاقی حکومت اس کا جائز حق تک دینا گوارا نہیں کر رہی ہیں جس کے باعث شہر میں کچرے کے انبار لگ گئے ہیں اور سڑکیں موہنجو ڈارو کے کھنڈرات کا منظر پیش کر رہے ہیں۔

ہمارے پاس تجربہ کار ٹیم ہے جسے عوام نے منتخب کیا ہے تا کہ ہم عوام کو سہولیات کو مہیا کر سکیں عوام ہم سے سوال کرتے ہیں ہمیں موقع دیا جائے کہ ہم عوام کو ڈلیور کر سکیں۔

کراچی : وزیراعلیٰ سندھ مرادعلی شاہ کا کہنا ہے کہ وہ کراچی کی تعمیر اور ترقی میں میئر کراچی وسیم اختر کے ساتھ کھڑے ہیں،سندھ حکومت اور شہری حکومت مل کام کریں گی۔

یہ بات انہوں نے میئرکراچی وسیم اختر سے ملاقات میں کہی،اُن کا کہنا تھا کہ کراچی میرا شہر ہے میں یہاں پلا بڑھا ہوں اور یہی تعلیم حاصل کی ہے اپنی زندگی کا بیشتر حصہ کراچی میں ہی گذارا ہے اس لیے کراچی کی تعمیر اور ترقی میں حصہ ڈال کر حق ادا کرنا چاہتا ہوں۔

دورانِ ملاقات میئر کراچی وسیم اختر نے بلدیہ عظمی کراچی اور کراچی ڈیولپمنٹ اتھارٹی کے درمیان تنازعات سمیت شہری حکومت کو درپیش مالی اور انتظامی مسائل ، کراچی میں کچرے کے انبار اور ٹرانسپورٹ کی کمیابی سے وزیراعلیٰ کو آگاہ کیا اور ان کے حل کے لیے تجاویز بھی دیں۔

وزیراعلیٰ سندھ نے میئر کراچی کو اپنی ہر ممکن تعاون کی یقین دہانی کرتے ہوئے کہا کہ کراچی کی تعیر اور ترقی کے حوالے سے شہری حکومت کے ہر مسئلے کو حل کریں گے اور جو بھی تجاویز دی جائیں گی ان پر غور کیا جائے گا۔

جس پر وسیم اختر نے وزیراعلیٰ سندھ کی حمایت کو سراہا اور دونوں رہنماؤں نے کراچی کی ترقی کے لیے مل کر کام کرنے پر اتفاق کیا۔

واضح رہے میئر کراچی حال ہی میں سینٹرل جیل سے ضمانت پر رہا ہو کر اپنی ذمہ داریاں نبھا نا شروع کردی ہے اور آج وزیر اعلیٰ سندھ سے بہ طور میئر کراچی پہلی ملاقات کی ہے۔