لاہور: موٹر سائیکل سوار میاں بیوی فلائی اوور سے گر کر جاں بحق ہوگئے ، ابتدائی تحقیقات میں بتایا گیا کہ شہری کو دل کا دورہ پڑا اور موٹر سائیکل بے قابو ہو کر باؤنڈر وال سے ٹکرا گئی۔
تفصیلات کے مطابق صوبائی دارالحکومت لاہور میں ایک دلخراش واقعے پیش آیا، جہاں موٹرسائیکل سوار میاں بیوی اکبر چوک فلائی اوور سے گر کر جاں بحق ہو گئے۔
پولیس کا کہنا تھا کہ 65 سالہ شیخ افضل اور ان کی 60 سالہ اہلیہ عابدہ نور اقبال ٹاؤن سے فیروز پور روڈ پر واقع اپنی رہائش گاہ جا رہے تھے جب یہ سانحہ پیش آیا۔
حادثے کی ابتدائی اطلاعات کے مطابق فلائی اوور سے اترتے ہوئے شیخ افضل کو دل کا دورہ پڑا، جس کے باعث وہ موٹرسائیکل پر قابو نہ رکھ سکے اور تیز رفتاری کے باعث موٹرسائیکل باؤنڈری وال سے ٹکرا گئی ، جس سے دونوں میاں بیوی فلائی اوور سے نیچے گر گئے۔
عابدہ نور موقع پر ہی جاں بحق ہو گئیں، جبکہ شیخ افضل کو شدید زخمی حالت میں اسپتال منتقل کیا گیا، جہاں وہ جانبر نہ ہو سکے۔
دونوں میاں بیوی اقبال ٹاؤن میں واقع اپنے گھر واپس جا رہے تھے تاہم اہل خانہ نے غم کی حالت میں کسی بھی قانونی کارروائی سے انکار کر دیا ہے۔
پولیس نے جائے حادثہ کا معائنہ کر کے ابتدائی رپورٹ تیار کر لی ہے، جبکہ لاشیں ورثا کے حوالے کر دی گئی ہیں۔
ادھر لاہور کے مختلف علاقوں میں پیش آنے والے دیگر ٹریفک حادثات میں مزید پانچ افراد جاں بحق جبکہ متعدد زخمی ہو گئے۔ شاہکام فلائی اوور پر ایک کار کی ٹکر سے موٹرسائیکل سوار ہلاک اور دو افراد زخمی ہو گئے۔
یاد رہے گذشتہ روز کراچی کے علاقے گھگر پھاٹک کے قریب گھر میں میاں، بیوی اور بچے کو قتل کر دیا گیا تھا، پولیس کے مطابق مرنے والوں کا اصل تعلق بلوچستان سے تھا اور انہیں تیز دھار آلے سے قتل کیا گیا تھا۔
واقعہ کی مزید تفتیش کی تو نئے انکشافات سامنے آئے ہیں اور پولیس کا کہنا تھا کہ ماں باپ اور بچے کو بے دردی سے قتل کرنے والے قاتل ایک روز قبل ہی مقتولین کے گھر مہمان بن کر آئے تھے اور قتل کرنے کے بعد موقع سے فرار ہو گئے۔
پولیس کا بتانا تھا کہ مقتول جوڑے عبدالمجید اور سکینہ نے 6 سال قبل پسند کی شادی کی تھی اور ان کا ایک بیٹا عبدالنبی تھا۔ یہ خاندان ایک سال قبل ہی گھگر پھاٹک کے قریب رہائش اختیار کی تھی۔
فیصل آباد میں بھائی والا پھاٹک کے قریب میاں بیوی نے ٹرین کے نیچے آکر اپنی زندگی کا خاتمہ کرلیا۔
تفصیلات کے مطابق فیصل آباد کے رہائشی پاور لوم ورکر ساجد اور اس کی بیوی عدیل ٹاؤن کے رہائشی تھے، دونوں کی تین ماہ قبل شادی ہوئی تھی۔
پولیس کا کہنا ہے کہ مقتول میاں بیوی ساجد اور رضیہ کی لاشیں الائیڈ اسپتال منتقل کردی گئی ہیں، ساجد نے بھائی زاہد کو فون کر کے خود کشی کرنے کی اطلاع دی تھی۔
پولیس کے مطابق دونوں لاہور جانے والی بدر ایکسپریس کے آگے لیٹ گئے تھے اور زندگی کا خاتمہ کرلیا، مزید تحقیقات کا آغاز کردیا۔
اس سے قبل لاہور میں پیش آنے والے ایک اور واقعے میں سابق کسٹم افسر نے اہلیہ کوگولیاں مار کر قتل کردیا اور بعد میں خودکشی کرلی، پولیس نے جائے وقوع سے عثمان کا لائسنس یافتہ پستول برآمد کرلیا ہے۔
تفصیلات کے مطابق پنجاب کے دارلحکومت لاہور میں سندر کے علاقے میں سابق کسٹم افسر نے اہلیہ کو قتل کر کے خودکشی کرلی۔
پولیس نے بتایا کہ 36 سالہ عثمان ارشد نے ایک سال قبل پسند کی شادی کی تھی، عثمان نے رات کے آخری پہر پہلے بیوی کو 4 گولیاں ماریں اور پھر خودکشی کی۔
فائرنگ اورچیخوں کی آوازیں سن کر محلہ داروں نے پولیس کواطلاع دی، جس کے بعد پولیس موقع پر پہنچی تاہم عثمان ارشد نے موقع پر دم توڑا جبکہ اہلیہ کو شدید زخمی حالت میں اسپتال پہنچایا گیا۔
ڈاکٹرز نے بتایا کہ خاتون کی حالت زیادہ خون بہہ جانے کے باعث انتہائی تشویشناک ہے تاہم پولیس نے جائے وقوع سے عثمان کا لائسنس یافتہ پستول برآمد کرلیا اور مزید تحقیقات جاری ہے۔
محبت میں ساتھ جینے اور ساتھ مرنے کی قسمیں کھانے والے زیادہ تر لوگ اپنے اس وعدے کا پاس یا قول پر عمل نہیں کرپاتے لیکن کچھ ایسے بھی ہیں جو کہتے ہیں وہ کرکے دکھاتے ہیں جن میں برازیل کے میاں بیوی بھی شامل ہیں۔
برازیل سے تعلق رکھنے والے ایسے میاں بیوی بھی تھے کہ جہاں بیوی کی وفات کے چند گھنٹوں بعد ہی شوہر بھی اس دار فانی سے کوچ کرگیا۔
ایک رپورٹ کے مطابق برازیل میں 92 سالہ اوڈیلیتا پنزانی دی ہارو اور ان کے 94 سال کے شوہر بچوال دی ہارو اپنی شادی کی 74ویں سالگرہ منانے کے صرف دو دن بعد دس گھنٹے کے فرق سے انتقال کرگئے۔
اس واقعے نے برازیل کے معاشرے کو ہلا کر رکھ دیا، جوڑے کی ملاقات نوعمری میں ہوئی اور 1951 میں ان کی شادی ہوئی۔ ان کے چھ بچے ہیں۔ شوہر بچوال کپڑے کی دکان میں کام کرتے تھے اور اوڈیلیتا نے اپنے بچوں کی پرورش کی تھی۔
تاہم اپنے بعد کے سالوں میں اوڈیلیتا کو الزائمر کا مرض لاحق ہوا اور بچوال نے اپنی زندگی اس کی دیکھ بھال کے لیے وقف کر دی پھر اسے 2023 میں ٹرمینل کولون کینسر کی تشخیص ہوگئی۔
تب سے اس کی خواہش تھی کہ وہ اپنی بیوی کے مرنے کے بعد کبھی زندہ نہ رہے اور اس کی خواہش پوری ہوئی۔ اس کی بیوی پہلے مر گئی اور اس نے دس گھنٹے بعد اس کی پیروی کرتے ہوئے جان دے دی۔
یاد رہے اس واقعے نے برازیل کے حلقوں میں بڑے پیمانے پر ہنگامہ برپا کر دیا ہے اور زیادہ تر مقامی اخبارات نے اسے رپورٹ کیا تھا۔
کراچی: میاں بیوی کے جھگڑے میں سالے نے بہنوئی کو دھمکانے کے لیے 6 ماہ کے بچے کے منہ میں ہری مرچ ڈال دی اور اسے تشدد کا نشانہ بنایا۔
تفصیلات کے مطابق سفاک مامون نے اپنے 6 مال کے بھانجے کو تشدد کا نشانہ بنایا ہے، منہ میں مرچی ڈال کر ویڈیو کراچی بھینس کالونی میں موجود اس کے والد کو شیئر کی ہے۔
والد وارث نے پولیس کو بتایا کہ بیوی سے جھگڑا ہوا تو وہ میکے لاڑکانہ چلی گئی تھی، بیوی کے بھائی نے دھمکیاں دیں کہ اسے طلاق دو، مجھے واٹس ایپ پر معصوم بچے پر تشدد کی ویڈیو بھیجی ہے۔
وارث نے کہا کہ بیٹے کو جھنجھوڑ کر زبردستی منہ میں ہری مرچ بھی ڈالی گئی، میرے بچے پر تشدد کی ویڈیوز بھیج کر مجھے دھمکیاں دی جارہی ہیں، پولیس میری مدد کرکے انصاف دلائے۔
دوسری جانب ایس ایس پی لاڑکانہ احمد فیصل چوہدری نے واقعےکا سخت نوٹس لیتے ہوئے ملزم کی فوری گرفتاری کی ہدایت کی ہے ساتھ ہی انہوں نے انچارج مرکز شکایات سب انسپکٹر اختر علی کو حقائق معلوم کرنےکا ٹاسک دیا ہے۔
لاڑکانہ پولیس کی رپورٹ کے مطابق متاثرہ بچہ محمد وارث میرانی نامی شخص کا بیٹا ہے، محمد وارث میرانی بھینس کالونی کراچی کا رہائش ہے، اس کی اہلیہ ناراض ہو کر لاڑکانہ میں والد اور بھائی کے پاس مقیم ہے۔
رپورٹ کے مطابق بچے کے ماموں نے اس کے والد پر دباؤ ڈالنےکیلئے تشدد کر کے ویڈیو بنائی تاہم ملزم کی گرفتاری کے لیے ٹیمیں روانہ کردی گئی ہیں جبکہ واقعے سے متعلق مزید حقائق معلوم کیے جارہے ہیں۔
کراچی: شہر قائد کے علاقے ملیر ہالٹ میں تیز رفتار ٹینکر کے میاں، بیوی اور بچے کو کچلنے کے کیس میں ملزم ٹینکر ڈرائیور اور ہیلپر کو جوڈیشل مجسٹریٹ شرقی کی عدالت میں پیش کیا گیا۔
تفصیلات کے مطابق تفتیشی پولیس نے ملیر ہالٹ ٹینکر حادثے کے ذمہ دار ڈرائیور رحیم بادشاہ اور اس کے ہیلپر عمر وقاص کو مجسٹریٹ شرقی کے جج کے روبرو پیش کیا، تفتیشی افسر منصور علی کی جانب سے ملزم کے جسمانی ریمانڈ کی استدعا کی گئی۔
تفتیشی افسر نے عدالت کو بتایا کہ ملزم کے خلاف تھانہ ماڈل کالونی میں مقدمہ درج ہے، مقدمہ میں دفعہ 322 بھی شامل کر دی گئی ہے، اب ملزم سے تفتیش کرنی ہے کہ کہیں یہ واقعہ ذاتی دشمنی کا شاخسانہ تو نہیں، جس کے لیے ملزم کا جسمانی ریمانڈ چاہیے، ہم نے ٹینکر مالک کا بھی معلوم کرنا ہے۔
عدالت نے ریمارکس میں کہا کہ ہیوی ٹریفک کا تو ان اوقات میں داخلہ بھی ممنوع ہے، تاہم ملزم کے وکیل نے بتایا کہ واٹر ٹینکرز کو سڑکوں پر آنے کی اجازت ہے، جس پر عدالت نے نکتہ اٹھایا کہ یہ بھی معلوم کرنا ہوگا کہ جس روٹ سے ٹینکر آ رہا تھا وہاں اجازت تھی یا نہیں۔
جج اشفاق پنہور نے ملزم ڈرائیور رحیم بادشہ کو 3 روزہ جسمانی ریمانڈ پر پولیس کی تحویل میں دے دیا۔
ٹریفک پولیس کے خصوصی ’’کے راٹ‘‘ یونٹ نے رواں ماہ کے سب سے افسوس ناک حادثے پر اپنی تجزیاتی رپورٹ جاری کر دی ہے، جس میں ماہرین کی جانب سے نہ صرف حادثے کی وجوہ بتائی گئی ہیں، بلکہ سفارشات بھی پیش کی گئی ہیں کہ حادثات کی روک تھام کے لیے کیا کیا جائے۔
اس رپورٹ کا جائزہ لیا جائے تو حادثے کی ذمہ داری واٹر ٹینکر ڈرائیور کے ساتھ ان محکموں کی بھی بنتی ہے جنھوں نے اپنا کام پورا نہیں کیا، مثال کے طور پر رپورٹ میں انکشاف کیا گیا ہے کہ کہیں پر ٹریفک سائن کے بورڈ موجود نہیں تھے، نہ اسپیڈ لمٹ سائن موجود تھا، نہ ہی سڑک کے درمیان ٹھوس سیمنٹ کی رکاوٹ تھی، کہ اگر واٹر ٹینکر ٹکرا بھی جاتا تو وہیں رک جاتا۔ اسی طرح وہ ادارے جو اپنے ڈرائیور سے 24 گھنٹے کام کرواتے ہیں وہ بھی اصل ذمہ دار میں شامل ہیں۔ بہرحال اس رپورٹ سے یہ اندازہ لگایا جا سکتا ہے کہ ٹریفک پولیس کا یہ یونٹ اپنے منفرد اور معیاری کام کی وجہ سے جلد اپنا مقام بنا سکتا ہے۔
کے راٹ کی مکمل رپورٹ
ملیر میں ماڈل کالونی ٹریفک حادثے کے دوران میاں بیوی اور جنین کے جاں بحق ہونے کے بعد ٹریفک پولیس کے خصوصی یونٹ ’’کے راٹ‘‘ (کراچی روڈ ایکسڈینٹ اینالیسز ٹیم) نے تجزیاتی رپورٹ تیار کی ہے۔ اس رپورٹ میں ڈرائیور کے بریک فیل ہونے کے بیانیے کو مسترد کرتے ہوئے انکشاف کیا گیا ہے کہ یہ حادثہ نیند، تھکن، غفلت اور لاپرواہی کی وجہ سے پیش آیا، ڈرائیور رحیم بخش نے رانگ وے سڑک پر جا کر ایک ہائی ایس، 2 موٹر سائیکلوں کو ٹکر ماری، جس کے نتیجے میں عبدالقیوم، ان کی اہلیہ اور پیٹ میں بچہ جاں بحق ہوا۔
وہ واٹر ٹینکر جس نے حاملہ خاتون سمیت دو افراد جو میاں بیوی تھے، کو کچل دیا
واٹر ٹینکر ڈرائیور نے ’کے راٹ‘ کو بتایا کہ وہ 24 گھنٹے کام اور 24 گھنٹے آرام کرتے ہیں، کے راٹ کے مطابق مستقل کام سے تھکن اور غیر محفوظ کام سے شدید خدشات پیدا ہوتے ہیں، ڈرائیور نے بریک فیل ہونے کی وجہ سے دوسری سڑک پر جانے کا دعویٰ کیا لیکن معائنے کے دوران ٹینکر کے بریک صحیح حالت میں پائے گئے۔
رپورٹ کے مطابق ڈرائیور کے پاس درست ڈرائیونگ لائسنس موجود ہے، پانی سے بھرا واٹر ٹینکر صفورا ہائیڈرنٹ سے روانہ کیا گیا تھا، حادثہ بنیادی طور پر تیز رفتاری کی وجہ سے پیش آیا، واٹر ٹینکر فٹ پاتھ پر رکاوٹ توڑ کر مخالف لین میں داخل ہوا، سیمنٹ کی ٹھوس رکاوٹ نہ ہونے کی وجہ سے حادثے کی شدت میں اضافہ ہوا، اگر مضبوط رکاوٹیں ہوتی تو حادثہ نہ ہوتا اور ہلاکتیں روکی جا سکتی تھیں۔
ہلاکتیں روکی جا سکتی تھیں
کے راٹ نے رپورٹ کیا کہ حادثے کے مقام پر کوئی وارننگ یا اسپیڈ لمٹ سائن بورڈ بھی موجود نہیں تھا، جب کہ واٹر ٹینکر میں بھی حفاظتی شیلڈ موجود نہ ہونے کی وجہ سے بائیک اس کے ٹائر تلے آئی۔
کے راٹ کے مطابق کمرشل ڈرائیور کے لیے ڈیوٹی اوقات کے قوانین پر سخت پابندی عائد کی جائے، تاکہ تھکن کی وجہ سے ہونے والے حادثات سے بچا جا سکے، سڑک کے درمیان ٹھوس سیمنٹ کی رکاوٹ نصب کی جائے تاکہ حادثات کی صورت میں گاڑی کو مخالف لین میں داخل ہونے سے روکا جا سکے۔
ہیوی گاڑیوں کی رفتار کی حد پر سختی سے عمل درآمد کروایا جائے، گاڑیوں کے مکمل حفاظتی نظام کے لیے جامع معائنہ کیا جائے، ٹینکر روانہ ہونے سے پہلے بریک سمیت تمام حفاظتی میکانزم درست حالت میں ہوں، اہم مقامات پر مناسب سائن بورڈز نصب کیے جائیں، اور ہیوی گاڑیوں میں حفاظتی شیڈ لگائے جائیں تاکہ ٹائروں کے نیچے حادثات سے بچا جا سکے۔
رپورٹ میں سفارش کی گئی ہے کہ ایسی کمپنیوں کے خلاف قانونی کارروائی اور سخت سزائیں دی جائیں، جو ڈرائیور کے لیے غیر محفوظ کام کے حالات فراہم کرتے ہیں۔ واضح رہے کہ حادثے کی ذمہ داری کے لیے مزید تحقیقات کا عمل جاری ہے۔
کراچی : سہراب گوٹھ کچی آبادی میں میاں بیوی کے قتل کے واقعے میں فائرنگ سے دو نہیں بلکہ تین اموات ہونے کا انکشاف سامنے آیا۔
کراچی کے علاقے سہراب گوٹھ کچی آبادی میں میاں بیوی کے قتل کا مقدمہ درج کرلیا گیا مقدمہ مقتول اعظم کے بھائی ہاشم کی مدعیت میں درج کیا گیا۔
مدعی مقدمے نے بتایا کہ اعظم کی شادی 10 سے12 سال قبل گل بی بی سےہوئی تھی، میرے بھائی مقتول اعظم کے 2 بیٹے اور3 بیٹیاں تھیں۔
مقدمے میں کہا گیا کہ پہلی بیوی خال بی بی سے 25 سال پہلے شادی ہوئی تھی خال بی بی افغانستان میں رہتی ہیں جس سے 4 بیٹے اور1 بیٹی ہوئی۔
متن میں کہا گیا کہ مجھے محلے والوں نے بتایا کہ بھائی کے گھر پر فائرنگ ہوئی ہے میں گھر آیا تو بھائی بھابھی گولیاں لگنے سے فوت ہوچکے تھے۔
مدعی نے کہا کہ میری بھابھی 5 ماہ کی حاملہ بھی تھی ، نامعلوم رنجش پر نامعلوم ملزمان نے فائرنگ کرکے دونوں کو قتل کیا، اپیل ہے کہ ملزمان کیخلاف قانونی کارروائی کی جائے۔
یاد رہے دو روز قبل کراچی کے علاقے سہراب گوٹھ کے قریب کچی آبادی میں فائرنگ سے میاں بیوی جاں بحق ہوگئے تھے۔
پولیس کا کہنا تھا کہ میاں بیوی کے سروں پر گولیاں ماری گئی، مقتول کی شناخت محمد اعظم اور خاتون کی شناخت گل بی بی کے نام سے ہوئی ہے، دونوں کی عمریں 45 سے 50 سال کے درمیان ہیں۔
پولیس نے مزید بتایا تھا کہ مقتول نے دو شادیاں کر رکھی تھی اور پہلی بیوی افغانستان گئی ہوئی ہے، مقتول اعظم گارمنٹس فیکٹری میں کام کرتا ہے۔
حکام نے دعوی کیا تھا کہ افغانستان میں موجودپہلی بیوی نے اپنے شوہر اور سوتن کو قتل کرایا اور قتل کی واردات مکمل منصوبہ بندی سے کی گئی۔
کراچی: گھرخالی کروانے پر کرائے دار میاں بیوی نے خود کو آگ لگالی، جھلسنے والی خاتون اور مرد کو تشویشناک حالت میں اسپتال منتقل کردیا گیا ہے۔
تفصیلات کےمطابق کراچی کورنگی سو کوارٹر سی ایریا میں میاں بیوی نے مالک مکان کی جانب سے گھر خالی کرنے کے مطالبے پرخود سوزی کرلی۔
واقعے میں جھلسنے والی خاتون اور مرد کو تشویشناک حالت میں اسپتال منتقل کردیا ہے، پولیس کا کہنا ہے ابتدائی تفتیش کے مطابق کرایہ دار خاتون اور مرد نے معاشی حالات کے باعث انتہائی قدم اٹھایا۔
علاقہ مکین کا کہنا ہے کہ مکان مالک نے کرایہ نہ دینے پر گھر خالی کرنے کا کہا تھا تاہم پولیس نےمالک مکان کو حراست میں لیکر واقعے سے متعلق مزید تحقیقات شروع کردی ہے۔
کورنگی سو کوارٹر میں بیوی کے ساتھ خود سوزی کرنے والے شخص کی والدہ کا کہنا ہے کہ بیٹا نشہ کرتا تھا، پرسوں پولیس اسے پکڑکر لے گئی اورپوچھ گچھ کرکے چھوڑ دیا، جس پرمالک مکان نے گھر خالی کرنے کا کہا۔
والدہ نے بتایا کہ میں گھر ڈھونڈنے کیلئے نکلی تھی کہ محلے والوں نے بتایا میاں بیوی نے گھرمیں خود کو آگ لگالی ہے۔
بہن کا کہنا ہے مالک مکان کی بس اتنی غلطی ہے کہ اس نے اچانک گھر خالی کرنے کو کہا۔
