ARYNews.tv | Urdu – Har Lamha Bakhabar

Tag: میجر جنرل آصف غفور

  • سال 2018 کے چند مقبول ترین ٹویٹس

    سال 2018 کے چند مقبول ترین ٹویٹس

    کراچی: دنیا بھر میں سوشل میڈیا کا استعمال تیزی سے بڑھ رہا ہے یہی وجہ ہے کہ اب صارفین اپنے مسائل اجاگر کرنے کے لیے سماجی رابطے کی ویب سائٹ پر آواز اٹھاتے ہیں۔

    آج ہم بات کررہے ہیں رواں سال مشہور ہونے والی شخصیات کے چند منفرد اور یادگار ٹویٹ کی۔

    وزیراعظم عمران خان

    وزیراعظم عمران خان نے 19 نومبر کو امریکی صدر کو دھمکی آمیز بیان کے بعد ٹویٹ کیا اور پاکستان کی قربانیوں کے حوالے سے آگاہ کیا۔

    سماجی رابطے کی ویب سائٹ پر عمران خان نے ایک نعت شیئر کی جسے صارفین نے بہت زیادہ پسند کیا۔

    اسی طرح وزیراعظم عمران خان نے 10 نومبر کو ایک تصویر شیئر کی جس میں بے گھر شخص اپنے دو کمسن بچوں کے ساتھ سڑک کنارے چادر اڑھے سورہا تھا، انہوں نے لکھا کہ ’آج میں نے بے گھر افراد کیلئے تعمیر کی جانی والی 5 پناہ گاہوں میں سے پہلی کا سنگ بنیاد لاہور میں رکھا۔ اسی طرح راولپنڈی اور پھر دیگر شہروں کی باری آئے گی، ہم اپنے نادار شہریوں کیلئے سماجی بہبود کا جال بچھانے کیلئے پرعزم ہیں تاکہ چھت کیساتھ انہیں صحت و تعلیم کی سہولیات بھی مل سکیں‘۔

    وزیراعظم نے ایک روز قبل اپنی تقریر میں مرغی اور انڈے کے ذریعے معیشت کو مستحکم کرنے کا طریقہ بتایا جس پر ناقدین نے مذاق بھی بنایا البتہ دنیا کی امیر ترین اور نامور شخصیت بل گیٹس نے اس فارمولے کو کامیاب قرار دیا۔ وزیراعظم نے بل گیٹس کا ایک انٹرویو شیئر کیا جو بہت زیادہ مشہور ہوا۔

    میجر جنرل آصف غفور

    ڈی جی آئی ایس پی آر نے پاک افغان بارڈر پر باڑ کی تنصیب کے حوالے سے فوجی جوانوں کی ایک ویڈیو شیئر کی جسے بہت زیادہ سراہا گیا۔

    کرتار پور راہداری منصوبے کی افتتاحی تقریب کی میجر جنرل آصف غفور نے ویڈیو شیئر کی جسے دنیا بھر میں پسند کیا گیا۔

    پاک فوج کی جانب سے دیامر اور بھاشا ڈیم فنڈ کے لیے ایک ارب روپے سے زائد رقم کے عطیات دیے گئے، آرمی چیف آف اسٹاف نے چیک چیف جسٹس آف پاکستان کے حوالے کیا. اس تصویر اور اعلان کو قوم نے بہت سراہا۔

    پاک فوج کے سپہ سالار جنرل قمر جاوید باجوہ کے صاحبزادے سعد صدیقی کی شادی کی تصاویر بھی سوشل میڈیا پر وائرل ہوئیں جو میجر جنرل آصف غفور نے اپنے اکاؤنٹ سے شیئر کی تھیں۔

    میجر جنرل آصف غفور نے سماجی رابطے کی ویب سائٹ پر صارفین کو خبردار کرنے کے لیے ایک ویڈیو جاری کی جس میں یہ بتایا گیا کہ ایک گروہ پاک فوج کا نام لے کر بذریعہ کال آپ کے بینک اکاؤنٹ کی تفصیلات جمع کررہا ہے، یہ ایک گروہ ہے جس سے خبردار رہیں۔

    فواد چوہدری

    وفاقی وزیر اطلاعات فواد چوہدری کے ٹویٹر اکاؤنٹ کو گزشتہ ماہ بلیو ٹک کا اعزاز ملا۔

    فواد چوہدری کا 15 نومبر کو ٹویٹ کردہ کارٹون بہت زیادہ وائرل ہوا۔ انہوں نے سینیٹ میں داخلے کی پابندی عائد ہونے کے اگلے روز یہ تصویر شیئر کی۔

    اعظم سواتی کے مستعفیٰ ہونے کے حوالے سے بھی فواد چوہدری نے ٹویٹ کیا جسے ہزاروں ری ٹویٹ اور لائیکس ملے۔

    وزیر اعظم عمران خان نے 18 نومبر کو خلیجی ممالک کا کامیاب دورہ کیا، ایسا پہلی بار دیکھنے میں آیا کہ دبئی کے حکمران کے آفیشل ٹویٹر اکاؤنٹ سے اردو زبان میں ٹویٹ گیا گیا ہو۔

    اس ٹویٹ میں شیخ محمد بن راشد المکتوم نے عمران خان کو خوش آمدید کہا اور پاکستان کے ساتھ تعلقات پر فخر کا اظہار بھی کیا۔

    اسلام آباد میں تعینات جرمن سفیر مارٹن کوبلر نے ایشیا کپ 2020 کی میزبانی ملنے پر پاکستانی قوم کو مبارک باد پیش کی۔

    پاکستان میں تعینات برطانوی سفیر نے برٹس ایئر ویز کی دوبارہ پروازوں کا آغاز ہونے پر اردو میں ٹویٹ کیا اور مبارک باد پیش کی۔

    وفاقی وزیر ریلوے شیخ رشید احمد نے دعویٰ کیا کہ شہباز شریف این آر او مانگ رہے ہیں۔

    قومی کرکٹ ٹیم کے سابق کپتان شعیب ملک نے بیٹے کی پیدائش کا اعلان سماجی رابطے کی ویب سائٹ پر کیا۔

    نوٹ: ٹویٹس کا انتخاب عوامی مقبولیت کی بنیاد پر کیا گیا۔

  • گولیاں نہتے بہادرآزادی کے متوالوں کے عز م کو دبانہیں سکتیں، ڈی جی آئی ایس پی آر

    گولیاں نہتے بہادرآزادی کے متوالوں کے عز م کو دبانہیں سکتیں، ڈی جی آئی ایس پی آر

    راولپنڈی : ڈی جی آئی ایس پی آر میجر جنرل آصف غفور نے بھارت کی مقبوضہ کشمیرمیں ریاستی جبرودہشت گردی کی مذمت کرتے ہوئے کہا گولیاں نہتے بہادرآزادی کے متوالوں کے عزم کو دبانہیں سکتیں۔

    تفصیلات کے مطابق ڈی جی آئی ایس پی آر میجر جنرل آصف غفور نے سماجی رابطے کی ویب سائٹ ٹویٹر پر اپنے بیان میں بھارت کی مقبوضہ کشمیرمیں ریاستی جبر و دہشت گردی اور بھارتی قابض افواج کی جانب سے کشمیری شہریوں کو ہدف بنانے کی شدید مذمت کی ہے۔

    ڈی جی آئی ایس پی آر کا کہنا تھا کہ گولیاں نہتے کشمیر میں  بہادر آزادی کے متوالوں کے عزم کو دبانہیں سکتیں، بھارتی فوج کو پیشہ وارانہ جنگی اخلاقیات کا مظاہرہ کرنا چاہئے۔

    یاد رہے گذشتہ روز وزیراعظم عمران خان نے بھی مقبوضہ وادی میں بھارتی فورسز کی جاری جارحیت کی مذمت کرتے ہوئے کہا تھا کہ کشمیر کا تنازع تشدد کے بجائے مذاکرات سے حل ہوسکتا ہے، کشمیریوں کو اپنے مستقبل کا تعین خود کرنے کی اجازت دی جائے۔

    مزید پڑھیں : کشمیر کا تنازع تشدد کے بجائے مذاکرات سے حل ہوسکتا ہے، وزیراعظم

    واضح رہے کہ دو روز قبل بھارتی فوج نے ضلع پلوامہ میں آپریشن کے نام پر بربریت کا مظاہرہ کرتے ہوئے گیارہ کشمیری نوجوانوں کو شہید کردیا تھا۔

    حریت قیادت کی کال پروادی میں سوگ اور ہڑتال ہے، تعلیمی ادارے، کاروباری مراکزبند ہیں اورٹرانسپورٹ معطل ہے جبکہ انٹرنیٹ اورموبائل سروس بھی بند کردی گئی ہے، کٹھ پتلی انتظامیہ نے مختلف علاقوں میں غیرعلانیہ کرفیولگا دیا۔

    حریت رہنماؤں نے عالمی برادری سے بھارتی مظالم کا نوٹس لینے کا مطالبہ کیا ہے۔

  • پاک افغان بارڈر پر باڑ لگانے کا سلسلہ جاری ہے، ڈی جی آئی ایس پی آر

    پاک افغان بارڈر پر باڑ لگانے کا سلسلہ جاری ہے، ڈی جی آئی ایس پی آر

    راولپنڈی: پاک فوج کے شعبہ تعلقاتِ عامہ (آئی ایس پی آر) کے ڈائریکٹر جنرل نے کہا ہے کہ پاک افغان بارڈر پر باڑ لگانے کا سلسلہ جاری ہے۔

    تفصیلات کے مطابق ڈی جی آئی ایس پی آر میجر جنرل آصف غفور نے کہا ہے کہ پاکستان اور افغانستان کی سرحد پر باڑ لگانے کا عمل جاری ہے۔

    [bs-quote quote=”دسمبر 2019 تک پاک افغان سرحد پر باڑ کا کام مکمل کر لیا جائے گا۔” style=”style-7″ align=”left” color=”#dd3333″ author_name=”آئی ایس پی آر”][/bs-quote]

    سماجی رابطوں کی ویب سائٹ ٹویٹر پر اپنے پیغام میں ڈی جی آئی ایس پی آر نے کہا کہ 843 قلعوں میں سے 233 قلعوں پر کام مکمل ہو گیا ہے۔

    پاک فوج کے شعبۂ تعلقاتِ عامہ کے مطابق 1200 کلو میٹر میں سے 802 کلو میٹر باڑ پر کام مکمل کر دیا گیا ہے۔

    ڈی جی آئی ایس پی آر نے کہا کہ دسمبر 2019 تک پاک افغان سرحد پر باڑ کا کام مکمل کر لیا جائے گا، باڑ لگانے سے دہشت گردوں کی نقل و حرکت محدود کی جا سکے گی۔

    میجر جنرل آصف غفور نے کہا کہ پاک افغان سرحد پر باڑ لگانے سے پاکستان اور افغانستان کے پُر امن لوگوں کو فائدہ ہوگا۔

    یہ بھی پڑھیں:  پاک افغان سرحد پر 70کلو میٹر تک خاردار تاریں نصب،25 چیک پوسٹیں بھی ختم

    یاد رہے کہ پاک افغان سرحد پر خاردار تاریں لگانے کا عمل کچھ عرصے سے جاری ہے، 5 مئی 2018 تک شمالی وزیرستان میں 70 کلو میٹر رقبے تک باڑ لگائی گئی تھی۔

    جون 2017 میں پاک افغان سرحد پر باڑ لگانے کا پہلا مرحلہ مکمل کیا گیا تھا، پہلے مرحلے میں باجوڑ، مہمند اور خیبر ایجنسی میں باڑ لگائی گئی۔

  • توقع ہے غیر ملکی صحافی پاکستان کے امن کو مثبت انداز میں اجاگر کریں گے: آصف غفور

    توقع ہے غیر ملکی صحافی پاکستان کے امن کو مثبت انداز میں اجاگر کریں گے: آصف غفور

    راولپنڈی: ڈی جی آئی ایس پی آر میجر جنرل آصف غفور سے غیر ملکی صحافیوں نے ملاقات کی، اس موقع پر انھوں نے کہا کہ توقع ہے غیر ملکی صحافی پاکستان کے امن کو مثبت انداز میں اجاگر کریں گے۔

    آصف غفور نے غیر ملکی صحافیوں کو سیکورٹی صورتِ حال اور جاری آپریشنز پر بریفنگ دی۔ پاک افغان بارڈر اور لائن آف کنٹرول کی صورتِ حال پر بھی اظہارخیال کیا گیا۔

    میجر جنرل آصف غفور نے کہا کہ پاکستان میں سیکورٹی کی صورتِ حال بہتر ہوئی ہے، کلیئرنس آپریشنز کے بعد صورتِ حال کو مستحکم کیا جا رہا ہے۔

    ڈی جی آئی ایس پی آر نے کہا کہ عالمی برادری صحافیوں کے ذریعے پاکستان کو دیکھ رہی ہے، توقع ہے غیر ملکی صحافی پاکستان کے امن کو مثبت انداز میں اجاگر کریں گے۔

    انھوں نے مزید کہا کہ پاکستان کے بہتر تشخص سے غیر ملکی سرمایہ کاروں کے لیے اقتصادی مواقع بڑھیں گے، پاکستان کا بہتر تشخص اجاگر کرنے میں میڈیا کا اہم کردار ہے۔

  • ڈی جی آئی ایس پی آر کا سندھی کلچرل ڈے پر ٹویٹ

    ڈی جی آئی ایس پی آر کا سندھی کلچرل ڈے پر ٹویٹ

    راولپنڈی: ڈائریکٹر جنرل آئی ایس پی آر میجر جنرل آصف غفور نے سماجی رابطوں کی ویب سائٹ ٹویٹر پر سندھی یومِ ثقافت کی مبارک باد پیش کی۔

    تفصیلات کے مطابق پاک فوج کے شعبۂ تعلقات عامہ کے سربراہ میجر جنرل آصف غفور نے ٹویٹ کے ذریعے سندھی کلچرل ڈے پر مبارک باد کا پیغام جاری کیا۔

    ڈی جی آئی ایس پی آر میجر جنرل آصف غفور نے ٹویٹ میں ایک خوب صورت تصویر بھی پوسٹ کی، جو سندھ کی ثقافت کے ساتھ ساتھ تاریخی اور تہذیبی رنگوں سے بھی مزین تھا۔

    آئی ایس پی آر کے ڈائریکٹر جنرل نے ٹویٹ میں یومِ ثقافت کی مبارک باد کے ساتھ ساتھ پاکستان زندہ باد کا نعرہ بھی درج کیا۔

    خیال رہے کہ آج سندھ بھر میں سندھی ٹوپی اجرک کا دن بھرپور جوش و خروش سے منایا گیا اور اس موقع پر مختلف ثقافتی و سماجی تنظیموں کے جانب سے ریلیاں بھی نکالی گئیں۔

    یہ بھی پڑھیں:  سندھ کی ثقافت : آج سندھی ٹوپی اجرک کا دن بھرپور جوش و خروش سے منایا جائے گا

    سندھ کی سرزمین ثقافتی ورثے سے مالا مال ہے، یہ دن منانے کی روایت نے سندھ کی دم توڑتی ثقافت میں نئی روح پھونک دی ہے، یہ دن منانے کا کا مقصد دنیا کو محبت و امن کا پیغام دینا بھی ہے۔

    ثقافتی دن کو منانے والے مہمانوں اور مقامی افراد کو آج کے دن کی مناسبت سے سندھی ٹوپی اور اجرک تحفے میں پیش کر کے محبت کا اظہار کرتے ہیں۔

  • پی ٹی وی کی 54 ویں سال گرہ پر ڈی جی آئی ایس پی آر کی مبارک باد

    پی ٹی وی کی 54 ویں سال گرہ پر ڈی جی آئی ایس پی آر کی مبارک باد

    راولپنڈی: پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل میجر جنرل آصف غفور نے پاکستان ٹیلی وژن کی 54 ویں سال گرہ پر مبارک باد کا پیغام جاری کیا۔

    تفصیلات کے مطابق ڈی جی آئی ایس پی آر نے سماجی رابطوں کی ویب سائٹ ٹویٹر پر ایک ٹویٹ کے ذریعے پی ٹی وی کو 54 ویں سال گرہ پر مبارک باد دی۔

    میجر جنرل آصف غفور نے ٹویٹ کیا کہ پی ٹی وی کو سال گرہ کی دلی مبارک باد، پی ٹی وی ذمہ داری کے ساتھ خبریں عوام تک پہنچا رہا ہے۔

    ڈی جی آئی ایس پی آر نے کہا کہ ہمارے ریاستی ٹیلی وژن نیٹ ورک نے ذمہ داری کے ساتھ خبریں دیتے ہوئے ایک طویل سفر طے کر لیا ہے۔

    میجر جنرل آصف غفور کا کہنا تھا کہ پی ٹی وی نہ صرف پاکستانی عوام بلکہ ملک سے باہر ناظرین کو بھی بہترین اور معیاری تفریح فراہم کرتا آ رہا ہے۔

    یہ بھی پڑھیں:  پی ٹی وی کرپشن کیس ، ڈاکٹر شاہد مسعود کا 5روزہ جسمانی ریمانڈ منظور

    آئی ایس پی آر کے ڈائریکٹر جنرل نے اپنے ٹویٹ میں پی ٹی وی کی، مستقبل میں مزید ترقی کے لیے نیک تمناؤں کا بھی اظہار کیا۔

  • دہشت گردی کو روکنے میں پولیس کا نمایاں کردار سامنے آیا ہے، ڈی جی آئی ایس پی آر

    دہشت گردی کو روکنے میں پولیس کا نمایاں کردار سامنے آیا ہے، ڈی جی آئی ایس پی آر

    راولپنڈی: ڈی جی آئی ایس پی آر میجر جنرل آصف غفور نے کہا ہے کہ چینی قونصلیٹ پر دہشت گردوں کا حملہ ناکام بنانے پر پولیس اور شہداء کو سلام پیش کرتے ہیں۔

    ان خیالات کا اظہار انہوں نے سماجی رابطے کی ویب سائٹ ٹویٹر پر اپنے پیغام میں کیا، ڈی جی آئی ایس پی آر میجر جنرل آصف غفور نے کہا کہ پولیس سروس میں وقت کے ساتھ بہتری آئی ہے۔

    ڈی جی آئی ایس پی آر میجر جنرل آصف غفور نے کہا کہ پولیس کا کسی واقعے میں فوری ردعمل وقت کے ساتھ بہت بہتر ہوا ہے، دہشت گردی کو روکنے میں پولیس کا نمایاں کردار سامنے آیا ہے۔

    مزید پڑھیں: چینی قونصل خانے پرحملے کی کوشش ناکام ‘ 2 پولیس اہلکار شہید ‘ 3 دہشت گرد ہلاک

    واضح رہے کہ دہشت گردوں نے آج صبح سوا نو بجے کے قریب کراچی میں چینی قونصل خانے پر حملہ کیا، جسے پولیس اور رینجرز نے ناکام بنادیا تھا، کارروائی کے دوران 3 دہشت گرد ہلاک جبکہ 2 اہلکار شہید ہوئے تھے۔

    فورسز کے فوری ایکشن کی وجہ سے دہشت گرد احاطے میں ہی محصور رہے اور عمارت کے اندر داخل نہیں ہوسکے، کارروائی کے دوران تین دہشت گرد باہر احاطے میں ہی مارے گئے جن سے بھاری اسلحہ اور خودکش جیکٹس برآمد ہوئے۔

    جس کے بعد صوبہ خیبر پختونخواہ کے ضلع اورکزئیکے علاقے کلایا بازار میں بم دھماکے ہوا، جس کے نتیجے میں 30 افراد کے جاں بحق ہوگئے تھے۔

    یاد رہے کہ وزیراعظم عمران خان کا کہنا تھا کہ چینی قونصلیٹ پر حملہ سی پیک کے خلاف سازش ہے، واقعے میں ملوث عناصر کو بے نقاب کیا جائے گا، پاک چین تعلقات ہمالیہ سے بلند اور سمندر سے گہرے ہیں۔

  • افغان رویے سے لگتا ہے، طاہر داوڑ کا قتل صرف دہشت گرد تنظیم کا کام نہیں: پاک فوج

    افغان رویے سے لگتا ہے، طاہر داوڑ کا قتل صرف دہشت گرد تنظیم کا کام نہیں: پاک فوج

    راولپنڈی: ڈی جی آئی ایس پی آر میجر جنرل آصف غفور نے کہا ہے کہ افغان حکام کے رویے سے لگتا ہے، طاہر  داوڑ کا قتل صرف دہشت گرد تنظیم کا کام نہیں.

    ڈی جی آئی ایس پی آر کے مطابق افغانستان میں ایس پی طاہر داوڑ کا بہیمانہ قتل قابل مذمت ہے، ایس پی طاہرداوڑ کی صورت میں ایک بہادر پولیس افسر سے محروم ہوگئے.

    میجر جنرل آصف غفور نے کہا کہ طاہرداوڑ کا اغوا، افغان حکام کےمؤقف نے کئی سوالوں کوجنم دیا، افغانستان کے رویے سے لگتا ہے کہ معاملہ صرف دہشت گرد تنظیم کا کام نہیں.

    ڈی جی آئی ایس پی آر کے مطابق اس بات کا اعادہ کرتے ہیں کہ افغان فورسزسرحدی باڑ، بہترسیکیورٹی کے لئے تعاون کریں گے.

    مزید پڑھیں: ایس پی طاہر داوڑ کا جسد خاکی پاکستان کے حوالے، میت پشاورروانہ

    ڈی جی آئی ایس پی آر نے کہا کہ افغان سرزمین پاکستان کے خلاف استعمال نہ ہو، اس کے لئے سیکیورٹی تعاون بڑھایا جائے، بہتراقدامات سے افغان سرزمین کو پاکستان کے خلاف استعمال ہونے سے روکا جاسکتا ہے.

    میجر جنرل آصف غفور کا کہنا تھا کہ طاہرداوڑ کا قتل اور بعد کی صورت حال سے لگتا ہے کہ کئی قوتیں ملوث ہیں.

    یاد رہے کہ آج افغان حکام نے مذاکرات کے بعد طاہر داوڑ کی میت پاکستانی حکام کے حوالے کی تھی، جسے پشاور روانہ کردیا گیا.

  • دہشت گردی کے خلاف جنگ: قوم کا ایک اور فرزند کیپٹن زرغام شہید

    دہشت گردی کے خلاف جنگ: قوم کا ایک اور فرزند کیپٹن زرغام شہید

    راولپنڈی : ڈی جی آئی ایس پی آر میجر جنرل آصف غفور کا کہنا ہے کہ قوم کے ایک اور بیٹے نے ملک کے لیے شہادت نوش کیا، کیپٹن زرغام فرید بارودی سرنگ ناکارہ بناتے ہوئے شہید ہوئے۔

    تفصیلات کے مطابق ڈی جی آئی ایس پی آر میجر جنرل آصف غفور نے سماجی رابطے کی ویب سائٹ ٹویٹرپراپنے بیان میں کہا کہ قوم کے ایک اور بیٹے نے ملک کے لیے جام شہادت نوش کیا، کیپٹن زرغام فرید بارودی سرنگ ناکارہ بناتے ہوئے مہمند میں شہید ہوئے جبکہ سپاہی ریحان بارودی سرنگ ناکارہ بنانے کے دوران زخمی ہوئے تھے۔

    ڈی جی آئی ایس پی آر کا کہنا تھا کہ 25 سال کے شہید کیپٹن زرغام کا تعلق سرگودھا سے تھا۔

    یاد رہے 27 ستمبر کو صوبہ بلوچستان کے علاقے قلات میں سیکیورٹی فورسز نے آپریشن کے دوران 4 دہشت گردوں کو ہلاک جبکہ دو جوان بھی شہید ہوگئے تھے۔

    مزید پڑھیں : سیکیورٹی فورسزکا قلات میں آپریشن‘ 4 دہشت گرد ہلاک‘ 2 جوان شہید

    آپریشن کے دوران شہید ہونے والے سپاہی محمد وارث کا تعلق جھنگ جبکہ سپاہی میرعالم کا تعلق گلگت بلتستان سے تھا۔ اس سے قبل شمالی وزیرستان میں سیکیورٹی فورسز کے آپریشن کے دوران ایک افسرسمیت 7 اہلکار شہید جبکہ 9 دہشت گرد ہلاک ہوگئے تھے۔

    آئی ایس پی آر کے مطابق آپریشن کے دوران شہید ہونے والے جوانوں میں کیپٹن جنید، حوالدار عامر، حوالدار عاطف، حوالدار ناصر، حوالدار عبد الرزاق، سپاہی سمیع اور سپاہی انور شامل تھے۔

  • میڈیا کا شہدا کی قربانیوں کو اجاگر کرنے میں اہم کردارہے، شکریہ پاکستانی میڈیا، ڈی جی آئی ایس پی آر

    میڈیا کا شہدا کی قربانیوں کو اجاگر کرنے میں اہم کردارہے، شکریہ پاکستانی میڈیا، ڈی جی آئی ایس پی آر

    راولپنڈی : یومِ دفاع و شہداء 2018 کے حوالے سے پاکستانی میڈیا کو خراج تحسین پیش کرتے ہوئے ڈی جی آئی ایس پی آر میجر جنرل آصف غفور کا کہنا ہے کہ میڈیا کا شہدا کی قربانیوں کو اجاگر کرنے میں اہم کردارہے، شکریہ پاکستان میڈیا، ہمیں پیار ہے پاکستان سے۔

    تفصیلات کے مطابق پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے سماجی رابطے کی ویب سائٹ ٹوئٹر پر یومِ دفاع و شہداء 2018 کے حوالے سے پاکستانی میڈیا کو خراج تحسین پیش کرتے ہوئے پرومو جاری کیا، جس میں پاکستانی میڈیا سے وابستہ صحافیوں کے پیغامات شامل ہیں۔

    ڈی جی آئی ایس پی آر میجر جنرل آصف غفور نے کہا پاکستانی میڈیا نے پاکستان شہدا کی قربانیوں کو اجاگر کرنے اور قوم کو آگاہ کرنے میں کلیدی کردار ادا کیا، شکریہ پاکستان میڈیا۔

    یاد رہے ڈی جی آئی ایس پی آر میجر جنرل آصف غفور نے خصوصی پرومو جاری کیا تھا، جس میں نشانِ حیدر حاصل کرنے والے شہداء کو خراج عقیدت پیش کیا گیا تھا۔

    مزید پڑھیں : پاک فوج نے ’ہمیں پیار ہے پاکستان سے‘ کا نیا پرومو جاری کردیا

    اس سے قبل بھی پاک فوج کی جانب سے ہمیں پیار ہے پاکستان سے‘ مہم کے سلسلے میں ایک نئی ویڈیو جاری کی تھی، جس میں پہلی بار ملک کے ان سیاست دانوں کو بھی خراجِ عقیدت پیش کیا گیا ہے جو دہشت گردوں کے حملوں میں شہید ہوئے۔

    واضح رہے پاک فوج نے یوم دفاع و شہدا 2018 کو ’ہمیں پیار ہے پاکستان ’سے کے نام سے منفرد انداز میں منانے اعلان کیا تھا اور اس حوالے سے آئی ایس پی آر اس نے نیا نغمہ بھی جاری کیا تھا۔

    ڈی جی آئی ایس پی آر کا کہنا تھا کہ یومِ دفاع و شہدا 2018 پر قوم کے شہیدوں اور ان کے گھر والوں کو یاد کیا جائے گا اور   قوم سے درخواست کی تھی کہ وہ 6 ستمبر یومِ دفاع و شہدا پر تمام شہدا کے گھر جا کر انھیں خراجِ عقیدت پیش کریں۔

    خراج عقیدت پیش کیا جائے گا، جس کا عنوان ہمیں پیار ہے پاکستان سے ہے۔ اس حوالے سے آئی ایس پی آر اس نے نیا نغمہ بھی جاری کیا تھا۔اس سے قبل ڈی جی آئی ایس پی آر میجر جنرل آصف غفور نے خصوصی پرومو میں نشانِ حیدر حاصل کرنے والے شہداء کو خراج عقیدت پیش کیا تھا۔