میرپور: جاتلاں عبدوپور میں گھر سے میاں بیوی کی لاشیں برآمد دونوں کو غیرت کے نام پر کلہاڑیوں کے وار سے قتل کیا گیا۔
تفصیلات کے مطابق اتوار کے روز میرپور آزاد کشمیر کے نواحی علاقے جتلاں عبدوپور میں مقامی افراد کی اطلاع پر پولیس نے پولٹری فارم کے رہائشی کوارٹر سے میاں بیوی کی نعشیں برآمد کیں، جنہیں کلہاڑیوں کے وار سے قتل کیا گیا تھا۔
نمائندہ اے آر وائی کو ایس پی میرپور زاہد مرزا سے حاصل ہونے والی ابتدائی معلومات کے مطابق مقتولین کی شناخت وزیرزادہ اور صبردانہ کے نام سے ہوئی، دونوں کا تعلق میرپور کے علاقے لوہر دھیر سے تھا۔
مقتول وزیرزادہ نے 6 سال قبل اپنے سگے بھائی بخت زادہ کی بیوی (صبرانہ) کے ساتھ فرار ہوکر بناء طلاق کے دوسرا نکاح کر کے آزاد کشمیر میں رہائش اختیار کرلی تھی، مقتولین کے 2 بچے ہیں جن کی عمریں 5 اور 3 سال ہیں۔
ایس پی نے مزید بتایا کہ گزشتہ رات دونوں میاں بیوی اپنے گھر میں سو رہے تھے کہ رات گئے کچھ لوگ گھر کی کھڑکی توڑ کر کمرے میں داخل ہوئے اور کلہاڑیوں کے وار سے دونوں کو موقع پر ہی قتل کردیا۔
پولیس نے مقتولین کی نعشوں کو قبضے میں لے کر پوسٹ مارٹم کے لیے میرپور ڈی ایچ کیو اسپتال منتقل کردیا ہے اور دہرے قتل کی واردات کا مقدمہ درج کرکے تفتیش شروع کردی۔
