Tag: میرپور ماتھیلو

کراچی: سندھ حکومت نے ڈسٹرکٹ ہیڈ کوارٹر اسپتال 4 گھوٹکی کو اپ گریڈ کرنے کے لیے کام شروع کر دیا۔

تفصیلات کے مطابق ڈسٹرکٹ ہیڈ کوارٹر گھوٹکی اسپتال کو انسٹی ٹیوٹ آف میڈیکل سائنسز میرپور ماتھیلو کا درجہ دیا جائے گا، وزیر اعلیٰ ہاؤس نے محکمہ صحت کو اس سلسلے میں ہدایت جاری کر دی۔

ہدایات میں کہا گیا ہے کہ متعلقہ اسپتال کو انسٹیٹیوٹ کا درجہ دینے کے لیے جلد از جلد درکار اور ضروری اقدامات کیے جائیں۔

واضح رہے کہ محکمہ لائیو اسٹاک نے وزیر اعلیٰ ہاؤس کو ڈسٹرکٹ اسپتال گھوٹکی کو اپ گریڈ کرنے کی سفارش کی تھی، بھیجے گئے مراسلے میں کہا گیا تھا کہ غریب مریضوں کو ضلعی اسپتال میں علاج کی بہتر سہولیات میسر نہیں۔

مراسلے کے مطابق اس وقت غریب مریضوں کو 200 کلو میٹر دور جانا پڑتا ہے، ایمرجنسی کے مریضوں کو رحیم یار خان اور دیگر اسپتالوں میں لایا جاتا ہے۔

مراسلے میں سفارش کی گئی کہ ضلعی اسپتال کو انسٹی ٹیوٹ کا درجہ دیا جائے تاکہ غریب مریضوں کو علاج کی بہتر سہولیات میسر ہو سکیں۔

وزیر اعلیٰ ہاؤس نے صوبائی وزیر عبد الباری پتافی کے مراسلے پر فوری اقدامات کا آغاز کر دیا ہے۔