لاہور: اداکارہ اور ماڈل رحمت اجمل کی منگنی ایک سادہ تقریب میں انجام پا گئی۔
اے آر وائی نیوز کے مطابق ’میرے پاس تم ہو‘ میں عائشہ کا کردار ادا کرنے والی رحمت اجمل نے ایک سادہ تقریب میں طیب کے ساتھ لاہور میں منگنی کر لی۔
منگنی کی تقریب میں صرف خاندان کے افراد اور قریبی دوستوں نے شرکت کی۔
تین بہنوں میں سب سے چھوٹی رحمت اجمل نے اے لیول کرنے کے بعد لاہور کے نیشنل کالج آف آرٹس سے 2018 میں ٹیکسٹائل ڈیزائننگ میں گریجویشن کی ڈگری حاصل کی، خاص بات یہ تھی کہ انھوں نے ڈیپارٹمنٹ میں ٹاپ کر لیا تھا۔
تعلیم کے دوران ہی ان کی ایک ٹیچر نے انھیں ماڈلنگ کی طرف راغب کیا، اور یہیں سے انھوں نے ماڈلنگ کی چکاچوند دنیا میں قدم رکھ کر کئی برانڈز میں جلوے دکھائے، اور تعلیم مکمل کرنے سے قبل ہی رحمت اجمل بین الاقوامی پروجیکٹس کر چکی تھیں۔
ماڈلنگ کے علاوہ انھوں نے اداکاری میں بھی جوہر دکھانا شروع کر دیے ہیں، موسیقار علی سیٹھی کی دو ویڈیوز میں اداکاری کی، بلاک بسٹر ڈراما ’میرے پاس تم ہو‘ میں عائشہ کا کردار ادا کیا۔
رحمت اجمل نے جس طرح اداکاری کے حوالے سے کئی بار اپنے شوق کا اظہار کیا، اسی طرح کمرشل اور آرٹ سنیما پروجیکٹس سے متعلق بھی اپنی دل چسپی کا اظہار کیا ہے۔
اداکارہ ایک آن لائن کلاتھنگ اور ڈیکور برانڈ Rehstore کی مالک بھی ہیں، ان کا کہنا ہے کہ وہ ایک ٹیکسٹائل ڈیزائنر ہیں اس لیے یہ پروجیکٹ ان کے لیے بہت اہمیت رکھتا ہے۔ معروف پاکستانی اداکارہ ماہرہ خان بھی ان کی ڈیزائننگ کی تعریف کر چکی ہیں۔
رحمت اجمل خواتین کے حقوق کے لیے آواز اٹھانے کے لیے بھی ہر وقت تیار رہتی ہیں، می ٹو مہم میں انھوں نے سرگرمی سے حصہ لیا تھا، پاکستانی ماڈل ایمان سلیمان نے جب لکس اسٹائل ایوارڈز میں اپنی نامزدگی سے دست برداری کا اعلان کیا تو یہ رحمت تھیں جنھوں نے ان کا ساتھ دیا۔
