پشاور: پاکستان تحریک انصاف کی جانب سے پنجاب کیلئے نامزد وزیراعلیٰ میاں اسلم اقبال نے کہا ہے کہ عوام نے پی ٹی آئی کو مینڈیٹ دیا ہے، ہمیں حکومت بنانے دی جائے۔
تفصیلات کے مطابق پاکستان تحریک انصاف کے رہنما میاں اسلم اقبال نے پشاور میں پریس کانفرنس کرتے ہوئے کہا کہ ن لیگ، نگراں حکومت، الیکشن کمیشن سے مطالبہ ہے مینڈیٹ کا احترام کیا جائے، عوام نے پی ٹی آئی کو مینڈیٹ دیا ہے ہمیں حکومت بنانے دی جائے۔
میاں اسلم اقبال نے کہا کہ عوام نے جنہیں مینڈیٹ دیا انہیں آنے دیں اگرہم نے پرفارم نہ کیا تو عوام دوبارہ ووٹ نہیں دیں گے، خدارا عوام پر رحم کریں ہم پریہ لوگ مسلط نہ کریں، یہ پی ڈی ایم 2 آ رہا ہے۔
پنجاب کیلئے نامزد وزیراعلیٰ میاں اسلم نے کہا کہ 9 مئی سے متعلق سیف سٹی کیمروں کی فوٹیجز موجود ہیں، 9 مئی کے واقعات میں ملوث ن ہیں میری کوئی فوٹیج یا کال کاریکارڈ نہیں ہے، ہم پر امن شہری ہیں یہ ادارے ہمارے ہیں۔
میاں اسلم نے کہا کہ سیاست میں 25 سال ہوگئے، یہ میرا چھٹا الیکشن ہے میں ایک سیاسی ورکر ہوں میں نے کبھی کوئی ایسی بات نہیں کی جس سے ضمیر مطمئن نہ ہو نہ میں نے کبھی ایسی کوئی بات کی جس سے پاکستان کا جھنڈا نیچے ہو۔
انہوں نے کہا کہ بانی پی ٹی آئی کی سیاست نے الیکٹبلز کی سیاست ختم کردی ہے اور میری درخواست ہے کہ اس مینڈیٹ کا احترام کیا جائے، جا کر دیکھیں عوام کے دلوں میں کونسی جماعت راج کرتی ہے، راولپنڈی میں پی ٹی آئی نے کلین سوئپ کیا ہے۔
