ARYNews.tv | Urdu – Har Lamha Bakhabar

Tag: مین ہول

  • لاہور کی سڑک پر کئی فٹ برساتی پانی، شہری موٹرسائیکل سمیت کھلے مین ہول میں غائب، ویڈیو

    لاہور کی سڑک پر کئی فٹ برساتی پانی، شہری موٹرسائیکل سمیت کھلے مین ہول میں غائب، ویڈیو

    لاہور: رسول پارک شاہدرہ میں کئی فٹ بارش کی پانی کی وجہ سے شہری کھلے مین ہول میں گرگیا، واقعے کی ویڈیو سوشل میڈیا پر وائرل ہوگئی۔

    اے آر وائی نیوز کے مطابق سیکریٹری ہاؤسنگ نورالامین مینگل نے حادثے کا نوٹس لیتے ہوئے ایکسین واسا کو معطل کردیا ہے، متعلقہ کنٹریکٹر کےخلاف ایف آئی آر درج کرنے کا حکم دیا گیا ہے، نورالامین مینگل نے کہا کہ حفاظتی کوتاہیوں پر زیرو ٹالرنس ہے، سخت کارروائی ہوگی۔

    یہ بھی پڑھیں: لاہور میں مون سون کا تیسرا اسپیل رات 9 بجکر 10 منٹ پر شروع، علاقے زیر آب

    تمام تعمیراتی مقامات پر حفاظتی پروٹوکولز کی سختی سے ہدایت کی گئی ہے، ترجمان نے بتایا کہ حادثہ بارشی پانی کی نکاسی کےلیے گٹر کھولنے کے باعث پیش آیا۔

    محکمہ ہاؤسنگ نے بتایا کہ گٹر کھولنے کے بعد وارننگ بورڈ نصب نہیں کیا گیا تھا، سائٹس پر بیریئرز، وارننگ بورڈز اور لائٹس نہ لگانا مجرمانہ غفلت ہے۔

    ترجمان نے بتایا کہ حفاظتی اقدامات کا نوٹیفکیشن 23 جون کو جاری کیا جاچکا ہے، تمام واسا زونز اور کنٹریکٹرز کو ہدایات پر عملدرآمد کا حکم جاری کردیا گیا۔

  • رحیم یار خان : 7 سالہ بچہ مین ہول میں گر کر جاں بحق

    رحیم یار خان : 7 سالہ بچہ مین ہول میں گر کر جاں بحق

    رحیم یار خان : نیازی کالونی میں 7 سالہ بچہ مین ہول میں گر کرجاں بحق ہوگیا تاہم واقعے کا مقدمہ مین ہول کا ڈھکن ہٹانے والے شہری کیخلاف درج کرلیا گیا ہے۔

    تفصیلات کے مطابق رحیم یار خان کے علاقے نیازی کالونی میں7 سالہ بچہ مین ہول میں گر کرجاں بحق ہوگیا۔

    ریسکیو حکام نے بتایا کہ 7 سالہ حارث بھائی کے ساتھ گھر سے دکان پر چیز لینے گیا تھا، 3 گھنٹے بعد بچے کو گٹر سے باہرنکال کر اسپتال منتقل کیا گیا مگر جانبرنہ ہوسکا۔

    ضلعی انتظامیہ نے کہا کہ اہل علاقہ نے بارش کے پانی کی نکاسی کیلئے گٹرکا ڈھکن ہٹایا تھا جو واپس نہیں رکھا تاہم واقعے کی تحقیقات کیلئے کمیٹی قائم کردی گئی ،ذمہ داروں کے خلاف کارروائی ہوگی۔

    نیازی کالونی میں کھلے مین ہول میں گر کر بچہ جاں بحق ہونے کے واقعے کا مقدمہ درج کرلیا گیا ، مین ہول کا ڈھکن ہٹانے والے شہری محمد فہیم پر مقدمہ درج کیا گیا۔

    میونسپل کمیٹی کی مدعیت میں مقدمہ درج کیا گیا، جس میں کہا گیا کہ ملزم نے ذاتی غرض سےگٹرکاڈھکن ہٹایا اور بعد میں نہ رکھا، گزشتہ رات 7سالہ بچے کھلے مین ہول میں گرکرجان سے گیا۔

  • کراچی: مواچھ گوٹھ میں کمسن بچے کی مین ہول میں گرنے کی فوٹیج سامنے آگئی

    کراچی: مواچھ گوٹھ میں کمسن بچے کی مین ہول میں گرنے کی فوٹیج سامنے آگئی

    کراچی کے علاقے بلدیہ مواچھ گوٹھ میں 3 سال کا بچہ کھلے مین ہول میں گر کر جاں بحق ہوگیا جس کی فوٹیج سامنے آگئی۔

    پولیس کے مطابق گزشتہ روز مواچھ گوٹھ کے نورشاہ محلے میں کھلے گٹر میں گرنے سے ایک معصوم بچہ جاں بحق ہوگیا، اطلاع ملنے پر مقامی افراد نے لاش گٹر سے نکالی، تاہم بدقسمتی سے بچہ پہلے ہی دم توڑ چکا تھا۔

    اب اس افسوسناک واقعے کی سی سی ٹی وی فوٹیج اےآروائی نیوز نے حاصل کرلی ہے، فوٹیج میں مواچھ گوٹھ کے رہائشی 3 سالہ عبدالرحمان کو جاتے دیکھا جاسکتا ہے۔

    فوٹیج میں دیکھا جاسکتا ہے کہ بچہ مین ہول کی طرف پہنچتے وقت کسی اور جانب دیکھ رہا تھا، بے دھیانی کی وجہ سے بچہ مین ہول میں گر گیا۔

    خیال رہے کہ اس واقعے کے بعد بچے کے اہل خانہ نے الزام عائد کیا تھا کہ مین ہول پر ڈھکن نہ ہونے کی وجہ سے بچہ کھیلتا ہوا گٹر میں گرا۔

  • کراچی میں کھلا مین ہول 3 سالہ بچے کی جان نگل گیا

    کراچی میں کھلا مین ہول 3 سالہ بچے کی جان نگل گیا

    کراچی: مین ہولز میں گر کر بچوں کے جاں بحق ہونے کے واقعات میں اضافہ ہوتا جارہا ہے۔

    تفصیلات کے مطابق کراچی کے علاقے سرجانی ٹاون حسن بروہی گوٹھ میں ایک افسوسناک واقعہ پیش آیا ہے جہاں مین ہول میں ڈوب کر تین سالہ بچہ جاں بحق ہوگیا۔

    ریسکیو حکام کا کہنا ہے کہ بچےکی شناخت 3 سال کے اسداللہ کے نام سے ہوئی ہے،  بچےکی لاش کو ضابطےکی کارروائی کیلئے اسپتال منتقل کردی گئی ہے۔

    پولیس کا اس حوالے سے کہنا تھا کہ متوفی بچہ گھرکے باہر کھیل رہا تھا اچانک سیوریج مین ہول میں گر گیا، بچے کے والد نے مین ہول کی صفائی کیلئے خاکروب کو بلایا ہوا تھا۔

    پولیس نے مزید بتایا کہ بچے کا والد اپنےکام پر چلاگیا، خاکروب بھی صفائی کے بعد روانہ ہوگیا، خاکروب کے جانے کے بعد بچہ کھیلتے ہوئے مین ہول میں گر کر جاں بحق ہوا، بچہ 6 بہن بھائیوں میں چوتھے نمبر پر تھا، واقعےکی مزید تفتیش جاری ہے۔

    دوسری جانب والد کے مطابق میرا بچہ مین ہول میں ڈوب کر جاں بحق ہوا ہے، کئی بار انتظامیہ کو شکایت کی لیکن کوئی سنوائی نہیں ہوئی ہے۔

  • کراچی : مین ہول میں گر کر بچے کی موت، انتظامیہ کو ہوش آگیا

    کراچی : مین ہول میں گر کر بچے کی موت، انتظامیہ کو ہوش آگیا

    کراچی: شاہ فیصل کالونی گٹر میں گر کر بچے کی موت کے بعد انتظامیہ نے ڈھکن لگانے کا کام شروع کر دیا، مختلف مقامات پرکئی سال سے گٹر کےڈھکن نہیں تھے۔

    تفصیلات کے مطابق کراچی کے علاقے شاہ فیصل کالونی میں مین ہول میں گر کر بچے کے جاں بحق ہونے کے بعد انتظامیہ کو ہوش آگیا اور ڈھکن لگانے کا کام شروع کر دیا گیا۔

    شاہ فیصل کالونی کے مختلف مقامات پر کئی سال سے گٹر کے ڈھکن نہیں لگے تھے تاہم شاہ فیصل کالونی دو نمبر کے قریب کھلے مین ہولز پر ڈھکن لگانے کا کام جاری ہے۔

    کھلے مین ہول میں ڈوب کر جاں بحق ہونے والے بچے کے والدین غم سے نڈھال ہیں، ان کا ایک مطالبہ ہے ذمہ داران کے قانونی کارروائی کی جائے.

    یاد رہے گزشتہ روز بھی ایک ننھی جان غفلت لاپرواہی کی بھینٹ چڑھ گئی تھی ، شاہ فیصل کالونی میں کھیلتے ہوئےدوبچے کھلےمین ہول میں گرگئے تھے ، جس میں ایک بچے کو علاقہ مکینوں نے بچالیا تھا جبکہ ریسکیو آپریشن کے دوران آٹھ سال کے عباد کی لاش چار گھنٹے بعد کورنگی ندی سے نکالی گئی۔

    مزید پڑھیں : کراچی میں کھلا مین ہول ایک اور بچے کی جان نگل گیا

    چیئرمین شاہ فیصل ٹاؤن گوہرعلی خٹک نے کہا تھا کہ گٹر کے ڈھکن لگانا ہماری ذمہ داری نہیں۔۔واٹر بورڈ ذمہ دار ہے، دو سال میں گٹر کا ایک ڈھکن نہیں دیا گیا۔

    دوسری جانب میئر کراچی مرتضی وہاب کی جانب سے کئی موقع پر ترقیاتی کاموں کے ساتھ گٹر کے ڈھکن بنانے اور انھیں شفاف طریقے سے یو سی یوسی پہنچانے کے دعوے کیے گئے، ان کا دعوی تھا کہ انھوں نے گٹر کے ڈھکن بنانے کا پلانٹ لگا کر فی ڈھکن آٹھ سو سے نو سو روپے بچائے ہیں۔

    ۔میئر کراچی کا کہنا تھا کہ حفاظت عوام کی ذمہ داری ہے اور چوری سے بچانا پولیس کی ذمہ داری ہے. عوام سے گزارش ہے بچوں کا خیال رکھیں اور آنکھیں کھلی رکھیں کیونکہ انتظامیہ کی آنکھیں بند اور کراچی میں مین ہول کھلے ہیں۔

  • وائرل ویڈیو : لڑکی چلتے چلتے گہرے مین ہول میں جاگری، پھر کیا ہوا؟

    وائرل ویڈیو : لڑکی چلتے چلتے گہرے مین ہول میں جاگری، پھر کیا ہوا؟

    راہ چلتے ایک لڑکی کھلے مین ہول میں اچانک گرگئی، واقعے کی ویڈیو سوشل میڈیا پر وائرل ہوگئی۔

    تفصیلات کے مطابق جنوب مغربی چین کے شہر چونگ کنگ میں ایک ایسا واقعہ پیش آیا جسے دیکھنے والے دنگ رہ گئے، یہ خوفناک منظر سی سی ٹی وی کیمرے میں محفوظ ہوگیا۔

    ویڈیو میں دیکھا جاسکتا ہے کہ اپنے بیگ میں کچھ ڈھونڈنے میں مگن ایک لڑکی فٹ پاتھ پر چل رہی تھی کہ اس کا ایک قدم کھلے مین ہول میں گیا اور دوسرے ہی لمحے پلک جھپکتے وہ اندر جاگری اور بروقت اسے کوئی نہ دیکھ سکا۔

    اس کا بیگ بھی مین ہول کے باہر ہی رہ گیا، کافی دیر بعد وہاں سے گزرنے والے طالب علموں کے ایک گروپ نے اس کی چیخ و پکار کی آواز سنی تو اس کی مدد کو پہنچ گئے۔

    چند طلباء نے اسے بازوؤں سے پکڑ کر گٹر سے باہر نکالا خوش قسمتی سے اسے کوئی گہری چوٹ نہیں لگی تاہم کچھ خراشیں آئیں اور وہ اپنا بیگ اٹھا کر چلی گئی۔

    اس سے قبل بھارت میں ایک خاتون جو موبائل فون میں مگن تھی اور بچے کے ساتھ جارہی تھی کہ چلتے چلتے اسی طرح کھلے گٹر میں گرگئی تھی۔

  • لاہور: مین ہول میں گرنے والے 2 افراد چل بسے

    لاہور: مین ہول میں گرنے والے 2 افراد چل بسے

    لاہور: گجو متہ میں صفائی کے دوران مین ہول میں گرنے والے 2 افراد اپنی جان کی بازی ہار گئے۔

    تفصیلات کے مطابق لاہور کے گجو متہ کے علاقے میں صفائی کے دوران مین ہول میں 2 افراد  گرگئے، دونوں افراد میں ہول میں گرنے کے باعث دم توڑ گئے۔

    پولیس کے مطابق امدادی ٹیموں نے مین ہول سے دونوں افراد کی لاشیں نکالی لی، پولیس نے لاشیں تحویل میں لے کر تحقیقات شروع کردیں۔

    اس سے قبل ہی لاہور کے علاقے غازی روڈ پر صفائی کے غرض سے مین ہول میں اترنے والےت واسا کے 2 اہلکار اپنی جان کی بازی ہار گئے تھے۔

    اُس واقعے پر ریسکیوذرائع کا کہنا تھا کہ واسا اہلکارجومین ہولزمیں اتر کر صفائی ستھرائی کا کاکام کرتے ہیں واسا کی جانب سے انہیں کوئی حفاظتی کٹ تک مہیا نہیں کی جاتیں جس کی وجہ سے ایسے افسوسناک حادثات پیش آتے ہیں۔

    عوام کا کہنا تھا کہ مون سون بارشوں کا سلسلہ جب سے شروع ہوا ہے لاہور میں مین ہولز کی صفائی پرزیادہ توجہ نہیں دی جا رہی اس لئے جگہ جگہ کوڑے کرکٹ کے ڈھیر لگے ہیں، گٹر ابل رہے ہیں ۔

  • زیر علاج پولیس ہیڈ کانسٹیبل کھلے مین ہول میں گر کر جاں بحق

    زیر علاج پولیس ہیڈ کانسٹیبل کھلے مین ہول میں گر کر جاں بحق

    ملتان: نشتر اسپتال میں زیر علاج پولیس ہیڈ کانسٹیبل کھلے مین ہول میں گر کر جاں بحق ہو گیا۔

    تفصیلات کے مطابق ملتان کے نشتر اسپتال میں زیر علاج پولیس ہیڈ کانسٹیبل کھلے مین ہول میں گر کر جاں بحق ہو گیا، پولیس کے مطابق ہیڈ کانسٹیبل عمار یاسر وارڈ سے منتقلی کے دوران مین ہول میں گر کر جاں بحق ہوا۔

    پولیس حکام کے مطابق ڈینگی میں مبتلا عمار یاسر نامی اہل کار وارڈ نمبر 27 میں زیر علاج تھا۔

    کراچی: کھلے مین ہول میں گرنے والے بچے کو تاحال نکالا نہ جاسکا

    واضح رہے کہ کراچی کے علاقے گلشن اقبال میں بھی گزشتہ روز کھلے مین ہول میں گرنے والے بچے کو تاحال تلاش نہیں کیا جا سکا ہے۔

  • خطرناک ٹرینڈ نے بچوں کی جانیں خطرے میں ڈال دی، ویڈیو وائرل

    خطرناک ٹرینڈ نے بچوں کی جانیں خطرے میں ڈال دی، ویڈیو وائرل

    سوشل نیٹ ورکنگ سائٹس پر اکثر اوقات مختلف چیلنجز اور ٹرینڈز جاری رہتے ہیں جس کے مطابق نوجوان ویڈیوز بنا کر اپ لوڈ کرتے ہیں، تاہم اب چین میں ایک خطرناک ٹرینڈ نے لوگوں کو تشویش میں مبتلا کردیا ہے۔

    چین میں مشہور ہونے والے اس ٹرینڈ کو بچے تیزی سے فالو کر رہے ہیں اور اس کی ویڈیوز بنا رہے ہیں۔

    اس کے لیے بچے کسی مین ہول میں پٹاخہ پھینک دیتے ہیں، اگلے ہی لمحے مین ہول میں زور دار دھماکہ ہوتا ہے اور مین ہول کا ڈھکن اور قریب کھڑا بچہ دھماکے سے فضا میں اڑتے ہیں۔

    اس شرارت میں بچے کو شدید جسمانی نقصان کا خطرہ رہتا ہے جبکہ آس پاس کھڑے دیگر افراد بھی متاثر ہوسکتے ہیں۔

    اس ٹرینڈ کے تحت بنائی جانے والی ویڈیوز سوشل میڈیا پر وائرل ہورہی ہیں، ایسی ہی ایک ویڈیو میں 3 بچے مین ہول میں پٹاخہ پھینکتے ہیں، دھماکہ ہونے پر ایک بچہ فضا میں اڑ کر کر نیچے گرتا ہے جبکہ دوسرا بچہ بھی زمین پر گر جاتا ہے۔

    ایک اور ویڈیو میں کچھ بچے مین ہول میں پٹاخہ پھینکتے ہیں جس کے بعد 3 مین ہولز میں دھماکہ ہوتا ہے۔

    حکام کے مطابق اب تک اس نوعیت کی 5 ویڈیوز منظر عام پر آچکی ہیں، خوش قسمتی سے کسی کے زخمی ہونے کا واقعہ سامنے نہیں آیا۔

    ان کے مطابق سیوریج میں موجود میتھین گیس پٹاخے کی چنگاری سے آگ پکڑ لیتی ہے اور اس کا دھماکہ خطرناک ہوسکتا ہے۔

    ان ویڈیوز نے جہاں ایک طرف تو والدین کو پریشان کردیا ہے، تو دوسری جانب دیگر افراد نے بھی اس رجحان پر تشویش کا اظہار کیا ہے۔