واشنگٹن: دو سالہ پابندی کے بعد آخر کار سابق امریکی صدر ڈونلڈ ٹرمپ کی فیس بک پر واپسی ہو گئی۔
تفصیلات کے مطابق سوشل میڈیا کمپنی میٹا نے اعلان کیا ہے کہ وہ اپنے فیس بک اور انسٹاگرام پلیٹ فارمز سے سابق امریکی صدر ڈونلڈ ٹرمپ کی دو سالہ معطلی ختم کر رہی ہے۔
میٹا نے بدھ کو اپنی ویب سائٹ پر ایک پریس ریلیز جاری کرتے ہوئے کہا کہ ٹرمپ کی معطلی ’غیر معمولی حالات‘ میں لیا گیا ’غیر معمولی فیصلہ‘ تھا، کمپنی نے کہا کہ اب ٹرمپ کو ’آنے والے ہفتوں میں‘ پلیٹ فارم پر واپس آنے کی اجازت دی جا رہی ہے۔
میٹا کے عالمی امور کے صدر نک کلیگ نے پریس ریلیز میں لکھا کہ ہم سوشل میڈیا پر کھلی بحث اور خیالات کا آزادانہ اظہار پر یقین سے جڑے ہوئے ہیں، خاص طور پر ایسے وقت میں جب دنیا بھر میں کئی جگہوں پر ان اقدار کو خطرہ لاحق ہے۔
فیس بک پر ٹرمپ کی معطلی ابتدائی طور پر 7 جنوری 2021 کو نافذ کی گئی تھی، جس دن ٹرمپ کے حامیوں نے بائیڈن سے ہارنے پر 2020 کے صدارتی انتخابات کی سرٹیفیکیشن میں خلل ڈالنے کی کوشش کرتے ہوئے امریکی کیپیٹل پر دھاوا بول دیا تھا۔
اپنی معطلی سے قبل فیس بک پر اپنے آخری پیغامات میں بھی ٹرمپ نے انتخابی نتائج کے بارے میں غلط معلومات پھیلانے کا سلسلہ جاری رکھا تھا، اور اس جھوٹ کو دہرایا تھا کہ ووٹنگ میں دھوکا دہی کی گئی ہے، انھوں نے ایک پوسٹ میں اپنے نائب صدر مائیک پینس کی بھی مذمت کی، جو ووٹ سرٹیفیکیشن کی نگرانی کر رہے تھے۔
میٹا نے اپنے بدھ کے فیصلے میں کہا ہے کہ ٹرمپ کو اجازت دینے سے قبل اس بات کا بہ غور جائزہ لیا گیا ہے کہ جنوری 2021 میں پبلک سیفٹی کا جو خطرہ موجود تھا، کیا وہ اب بھی ہے؟ اور میٹا نے پایا کہ ایسا کوئی خطرہ موجود نہیں ہے۔ تاہم میٹا نے کہا ہے کہ اگر خلاف ورزی دہرائی گئی تو پھر زیادہ سخت پابندی بھی عائد کی جا سکتی ہے۔
