لاہور : اورنج لائن ٹرین اور میٹروبس میں ٹوکن سسٹم ختم کرکے کارڈ بیسڈ پیمنٹ سسٹم متعارف کرانے کا فیصلہ کرلیا گیا۔
تفصیلات کے مطابق پنجاب میں میٹرو بس اور اورنج لائن کے لئے ڈیجیٹل پیمنٹ سسٹم متعارف کرانے کا فیصلہ کرلیا گیا۔
اورنج لائن ٹرین اور میٹروبس میں ٹوکن سسٹم ختم کرکے کارڈ بیسڈ پیمنٹ کے ذریعے بار کوڈ سسٹم لایا جائے گا۔
کریڈٹ کارڈ، ڈیبٹ کارڈ/ اے ٹی ایم کارڈ اور موبائل اکاؤنٹ ایپ کے ذریعے کرائے کی ادائیگی ہوگی ، ماس ٹرانزٹ سسٹم میں این ایف سی یعنی کارڈ ٹیپ اور ٹیچ کے ذریعے بھی کرایہ ادا کیا جا سکے گا۔
لاہور، ملتان، راولپنڈی اور اسلام آباد میں میٹروبس پر کریڈٹ کارڈ اور ڈیبٹ کارڈ کے ذریعے ہی کرائے کی ادائیگی ممکن ہوگی۔
لاہور کی اورنج لائن ٹرین میں بھی ا ی پیمنٹ سسٹم لاگو ہوگا اور ٹوکن سسٹم جلد ختم کر دیا جائے گا، کریڈٹ کارڈ، ڈیبٹ کارڈ، پیمنٹ ایپس کے ذریعے کرایہ ادا کیا جاسکے گا۔
صوبے بھر میں ماس ٹرانزٹ سسٹم کے لئے ایک ہی کارڈ متعارف کرانے کا فیصلہ کیا ، وزیراعلیٰ مریم نواز شریف نے ماس ٹرانزٹ سسٹم کے لئے ٹی کیش کارڈ کی منظوری دے دی۔
ٹی کیش کارڈکے ذریعے صوبے بھر میں ہر میٹرو بس یا اورنج لائن پر سفر ممکن ہوگا جبکہ ماس ٹرانزٹ سسٹم میں اسٹوڈنٹس کے لئے الگ کارڈ متعارف کرایا جائے گا۔
ٹرانسپورٹ ڈیپارٹمنٹ میں گریڈ 5 سے 18 تک ٹیکنیکل آسامیوں پر بھرتیوں اور پنجاب میں پہلی مرتبہ انٹرنیشنل ٹرانسپورٹ کے لئے ایکسپو کے انعقاد کی اصولی منظوری دے دی گئی۔
گاڑیوں سے متعلق تمام امور کے لئے ایک ہی جامع آر ایف آئی ڈی سٹیکر متعارف کرانے کا اعلان کیا گیا جبکہ موٹر سائیکل رکشہ کے متبادل کے طور پر الیکٹرک رکشہ متعارف کرانے پر اتفاق ہوا۔
وزیراعلیٰ نے الیکٹرک رکشہ پراجیکٹ کے لئے تجاویز اور سفارشات طلب کر لیں ، اجلا میں ٹرانسپورٹ ڈیپارٹمنٹ کے بارے میں تفصیلی بریفنگ دی گئی۔
سیکرٹری ٹرانسپورٹ عمران سکندر بلوچ نے ییلولائن لاہور، گوجرانوالہ بی آر ٹی پر تفصیلی بریفنگ دیتے ہوئے کہا پنجاب کے اضلاع میں الیکٹرک بسوں کی فراہمی اگست سے شروع ہوگی۔
