ابوظبی ٹرانسپورٹ سینٹر نے عوام کی سہولت کو مد نظر رکھتے ہوئے جدید ترین سمارٹ میٹرو بس سروس کا تجرباتی طور پر آغاز کر دیا ہے۔
بین الاقوامی خبر رساں ادارے کی رپورٹ کے مطابق ابوظبی ٹرانسپورٹ سینٹر کا کہنا ہے کہ متعلقہ ٹیموں نے مسافروں کی سلامتی کو یقینی بنانے کی خاطر اعلٰی معیار کا مکمل بنیادی ڈھانچہ تیار کیا ہے۔
ابوظبی ٹرانسپورٹ سینٹر کے مطابق اس کی بدولت ٹرانسپورٹ سیکٹر میں ترقی یافتہ ٹیکنالوجی کا نیا منفرد مرحلہ شروع ہو گا، پروجیکٹ کا تجرباتی مرحلہ ’ریلوے ٹریک‘ کے بغیر ٹرانسپورٹ سسٹم سے چلنے والی بسوں سے کیا گیا ہے۔ابتدائی طور پر تجرباتی مرحلے میں 27 کلو میٹر طویل ٹریک پر 25 اسٹیشنز کا قیام عمل میں لایا گیا ہے۔
پہلی بس ریم مال سے مارینا مال تک جائے گی یہ زاید سٹریٹ اول اور جزیرہ ابوظبی میں کورنیش سٹریٹ سے ہوکر گزرے گی،یہ سروس جمعہ سے اتوار تک تجرباتی مرحلے میں مہیا ہو گی۔
واضح رہے کہ ابوظبی میں سمارٹ ٹرانسپورٹ حکمت عملی کا مقصد پائیدار اور موثر نئے طرز کا ٹرانسپورٹ سیکٹر قائم کرنا نیز معاشرے کی خاطر جدید ٹیکنالوجی سے بھرپور فائدہ اٹھانا ہے۔
