لاہور: پنجاب کے 9 تعلیمی بورڈز میٹرک اور انٹر کے امتحانی شیڈول جاری کرنے میں ناکام رہے۔
تفصیلات کے مطابق پنجاب کے نو تعلیمی بورڈز نے میٹرک اور انٹر کے امتحانی شیڈول جاری نہیں کیے، امتحانی شیڈول جاری نہ ہونے سے 40 لاکھ سے زائد طلبہ کا مستقبل داؤ پر لگ گیا ہے۔
لاہور بورڈ کے تحت 5 لاکھ سے زائد طلبہ شدید ذہنی اذیت کا شکار ہیں، دوسری طرف سیکریٹری لاہور بورڈ اویس سلیم امتحانی شیڈول سے لا علم نکلے ہیں۔
لاہور بورڈ کے سیکریٹری نے کہا میں تو اضافی چارج پر ہوں اور مجھے کسی معاملے کا نہیں پتا، کرونا وبا کے بعد کچھ پتا نہیں کہ بورڈ کے معاملات کیسے چلانے ہیں۔
واضح رہے کہ لاہور بورڈ میں سیکریٹری اور کنٹرولر طویل عرصے سے عارضی طور پر تعینات کیے گئے ہیں، اور سیکریٹری لاہور بورڈ پی بی سی سی کے سیکریٹری بھی ہیں۔
میٹرک کے امتحانات کب ہوں گے؟ تاریخ کا اعلان ہوگیا
ادھر چیئرمین تعلیمی بورڈ کو بھی چارج سنبھالے ایک ہفتہ ہی ہوا ہے، ماضی میں لاہور بورڈ میں مبینہ گھپلوں کی وجہ سے آگ بھی لگ چکی ہے، واٹس ایپ پر پرچے لیک ہونے کے معاملے پر بورڈ انتظامیہ کی انکوائری بھی چل رہی ہے۔
خیال رہے کہ پنجاب کے تعلیمی بورڈز کے زیر اہتمام میٹرک امتحانات 4 مئی سے شروع ہوں گے جب کہ انٹر میڈیٹ سالانہ امتحان 12 جون 2021 سے شروع ہوں گے۔
