باغ آزادکشمیر : ریڈ فاؤنڈیشن نے میٹرک نتائج میں میدان مار لیا، 8 پوزیشنیں ریجن باغ لے اڑا، ریجن باغ کے قائمقام ریجنل منیجر کا کہنا ہے کہ ریڈ فاؤنڈیشن ایک تعلیمی تحریک ہے ،جو شروع دن سے معیاری، با مقصد اور اقدار پر مبنی تعلیم و تربیت کے ذریعے معاشرے کی تعمیر میں کوشاں ہے۔
تفصیلات کے مطابق ریڈ فاؤنڈیشن ریجن باغ کے قائمقام ریجنل منیجر راجہ شفاعت نے پریس کانفرنس سے خطاب کرتے ہوئے ریڈ فاؤنڈیشن اسکول غربی باغ کی طالبہ نتاشہ فائق عباسی نے 1077نمبرات لیکر تعلیمی بورڈ میں دوسری ، نازیہ شبیر نے 1074لیکر چوتھی ، انوشہ زبیر کیانی ریڈ فاؤنڈیشن ہائی اسکول کہوٹی جنوبی باغ نے 1072نمبرات لیکر 5ویں پوزیشن حاصل کی۔
راجہ شفاعت نے بتایا کہ نبغہ سجاد نے 1069نمبرات لیکر بورڈ میں 8ویں ،عائشہ شفیق عباسی ریڈ فاؤنڈیشن اسکول ہل غربی باغ 1063نمبرات لیکر 14ویں ،سعد بشارت ریڈ فاؤنڈیشن ہائی اسکول نیلہ بٹ نے 1062نمبرات لیکر15ویں ، روزمہ سرفراز ریڈ فاؤنڈیشن ہائی اسکول ہاڑی گہل نے 1062نمبرات لیکر 15ویں اور عذرہ ریڈ فاؤنڈیشن اسکول دھیرکوٹ نے 1058نمبرات لیکر 19ویں پوزیشن حاصل کیں۔
ریڈ فاؤنڈیشن ریجن باغ کے قائمقام ریجنل منیجر کا کہنا تھا کہ مجموعی طور پر میرپور تعلیمی بورڈ میں پہلی 20پوزیشنوں پر 64طلبہ و طالبات میں سے 34طلبہ و طالبات ریڈ فاؤنڈیشن سے وابستہ ہیں، میرپور بورڈ کا نتیجہ جموعی طور پر 69 فیصد رہا اور 62382 طلبہ و طالبات میں سے 43158 طلبہ و طالبات کامیاب ہوئے۔
انہوں نے ریجن باغ کی طرف سے تمام والدین ،بچوں ، پرنسپلز ،اساتذہ کرام ، تمام سٹاف اور ہیڈ آفس کی ساری ٹیم کو اس شاندار کامیابی پر مبارکباد پیش کی۔
اس موقع پر ان کے ہمراہ ایجوکیشن اینڈ ٹریننگ آفیسران نعیم حمید ، اشتیاق احمد صادق ، میجر آزاد ، عامر ،جاوید اور دیگر بھی موجود تھے۔
راجہ شفاعت نے کہا کہ ریڈ فاؤنڈیشن ایک تعلیمی تحریک ہے ،جو شروع دن سے معیاری، با مقصد اور اقدار پر مبنی تعلیم و تربیت کے ذریعے معاشرے کی تعمیر میں کوشاں ہے ،اس کیساتھ موجودہ دور کے چیلنجز کا مقابلہ کرنے کے لیے نسل نو کی تیاری میں سر گرم عمل ہے۔
ان کا کہنا تھا کہ ریجنل منیجر سید ظہیر گردیزی اور ان کی ساری ٹیم کی شب و روز کی محنت سے ریڈ فاؤنڈیشن نے پورے آزاد کشمیر بالخصوص باغ کے لوگوں کا ہمیشہ سر فخر سے بلند کیا، ریڈ فاؤنڈیشن محدود وسائل کے اندر کوالٹی آف ایجوکیشن پر بھرپور انداز میں کام کر رہی ہے۔
انہوں نے کہا کہ بورڈ پوزیشن کی بھی ادارے کی کوالٹی آف ایجوکیشن کو ناپنے کا ذریعہ ہوتی ہیں، تقریباََ 62382 بچوں اور آزاد کشمیر کے انتہائی مہنگے تعلیمی اداروں کے مقابلے میں دور دراز تعلیمی اداروں کے بچوں کو جن کو ساری سہولیات بھی میسر نہیں ان سے پوزیشنز حاصل کروانا یقیناََ یہ سارا کریڈٹ ریڈ فاؤنڈیشن کے سسٹم کو جاتا ہے۔
انہوں نے کہا کہ تعلیم کی ترقی میں میڈیا کا کردار کسی طور پر بھی نظر انداز نہیں کیا جا سکتا ہے، آپ تمام دوستوں نے باغ کے اندر ریڈ فاؤنڈیشن کی نمایاں تعلیمی کامیابیوں کو اجاگر کرنے میں ہمیشہ بھرپور کردار ادا کیا۔
تقریب کے آخر میں ریڈ فاؤنڈیشن انتظامیہ نے بہترین تعلیمی نتائج پر کیک کاٹا ۔
دریں اثناء صدر پریس کلب باغ راجہ عبد الحفیظ نے ریڈ فاؤنڈیشن کے بہترین نتائج پر انہیں مبارکباد پیش کی اور نمایاں کامیابی لینے والے طلباء و طالبات کے اعزاز میں پریس کلب کی طرف سے استقبالیہ کا اعلان بھی کیا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
