کیوی بولر میٹ ہنری کی تباہ کن بولنگ نے زمبابوین بیٹرز کو دن میں تارے دکھادیے، 4 بیٹرز کے سوا کوئی ڈبل فیگر میں داخل نہ ہوسکا۔
زمبابوے اور نیوزی لینڈ کےخلاف بدھ کو شروع ہونے والے پہلے ٹیسٹ میچ میں میٹ ہنری نے آغاز میں ہی اوپر تلے 3 وکٹیں لے کر میزبان سائیڈ کی کمر توڑ دی، انھوں نے نیوزی لینڈ کو زمبابوے کے خلاف تقریباً نو سالوں بعد پہلے ٹیسٹ میچ میں بہترین آغاز فراہم کیا۔
سات اوورز کے ابتدائی اسپیل میں ہینری نے برائن بینیٹ (6) اور بین کرن (13) کی وکٹیں حاصل کیں، اس کے بعد انھوں نے نک ویلچ (27) بھی پویلین بھیج دیا، اس وقت زمبابوے کا اسکور 67-4 تھا۔
میٹ ہنری نے تباہ کن بولنگ کرتے ہوئے صرف 39 رنز دے کر 6 وکٹیں حاصل کی، 3 وکٹیں ناتھن اسمتھ کے حصے میں آئیں، زمبابوے کی پوری ٹیم 149 رنز ڈھیر ہوگئی۔
جواب میں پہلے دن کے اختتام پر نیوزی لینڈ نے بغیر کسی نقصان کے 92 رنز بنالیے تھے، ڈیون کانوے 51 اور ول ینگ 41 رنز بنا کر ناٹ آئوٹ ہیں۔
نیوزی لینڈ نے زمبابوے کے خلاف اب تک 17 ٹیسٹ میچز کھیلے ہیں جس میں سے 11 میں اسے فتح ملی ہے جبکہ 6 مقابلے ڈرا ہوئے ہیں۔
دونوں ٹیموں کے درمیان 2016 کے بعد کرکٹ کے روایتی فارمیٹ میں یہ پہلا میچ ہے، زمبابوے کا ہوم ٹیسٹ ریکارڈ کافی خراب ہے، انھوں نے آخری جیت 2013 میں پاکستان کے خلاف حاصل کی تھی۔
