واشنگٹن: امریکی صدر ڈونلڈ ٹرمپ نے روئٹرز، نیویارک ٹائمز سمیت میڈیا اداروں کو بری طرح لتاڑ دیا ہے۔
غیر ملکی میڈیا رپورٹس کے مطابق ڈونلڈ ٹرمپ نے میڈیا اداروں سے لاکھوں ڈالر واپس کرنے کا مطالبہ کر دیا ہے، امریکی صدر نے روئٹرز، پولیٹیکو، نیویارک ٹائمز سمیت دیگر اداروں پر سخت تنقید کی۔
انھوں نے کہا جو بائیڈن کے دور میں عوامی فنڈز کا استعمال پریس کو خریدنے کے لیے کیا گیا، میڈیا ادارے حکومت سے وصول لاکھوں ڈالر واپس کریں، پولیٹیکو کو لاکھوں ڈالر بغیر کسی وجہ کیوں ادا کیے گئے؟ کیا پریس کو خریدنا تھا؟
امریکی صدر نے مطالبہ کیا کہ تمام میڈیا ادارے ٹیکس دہندگان کے پیسے واپس کر دیں، انھوں نے کہا ناکام نیو یارک ٹائمز نے کتنی رقم واپس کی؟ کیا اسی وجہ سے ابھی تک چل رہا ہے؟ ایسا لگتا ہے کہ ریڈیکل لیفٹ روئٹرز کو دھوکا دہی کے لیے 90 لاکھ ڈالر دیے گئے، اب یہ تمام ادارے امریکی حکومت سے لیے گئے پیسے واپس کر دیں۔
ٹرمپ انتظامیہ پر تارکین وطن کے بنیادی حقوق سلب کرنے کا مقدمہ دائر
واضح رہے کہ ڈونلڈ ٹرمپ ان 9 ملین ڈالرز کے بارے میں غصے میں ہیں، جو روئٹرز کو ’’بڑے پیمانے پر سماجی دھوکا دہی‘‘ کے مسئلے کی اسٹڈی کرنے کے لیے دیے گئے تھے، حالاں کہ یہ رقم خود ٹرمپ کے پہلے دور میں ایک کمپنی کو دی گئی تھی جو روئٹرز نیوز ایجنسی سے الگ سے کام کرتی ہے۔
ٹرمپ کا یہ بیان ایلون مسک کی سربراہی میں ڈیپارٹمنٹ آف گورنمنٹ ایفیشینسی کی جانب سے رپورٹ پیش کرنے کے بعد سامنے آیا ہے، جس میں بتایا گیا تھا کہ نیوز ایجنسی ایک بڑے اسکینڈل میں ملوث ہے۔
