Tag: میڈیا ٹاک

راولپنڈی: وفاقی وزیر ریلوے شیخ رشید کا کہنا ہے کہ 30 مارچ کو لاہور سے جناح ایکسپریس چلے گی، وزیر اعظم افتتاح کریں گے۔ ہم ایک نیا شہر آباد کریں گے، وزیر اعظم نے منظوری دے دی ہے۔

تفصیلات کے مطابق وفاقی وزیر ریلوے شیخ رشید نے میڈیا سے گفتگو کرتے ہوئے کہا کہ جو ٹریک ٹھیک نہیں وہ پہلے ٹھیک کریں گے، ہم اسٹینڈرڈ ٹریک ڈالنے جا رہے ہیں، ریلوے میں جو بھی نیا ٹریک بچھائیں گے وہ اسٹینڈرڈ ٹریک ہوگا۔

شیخ رشید نے کہا کہ ہم ایک اور نرسنگ اسپتال بنانے جارہے ہیں۔ 4 سال پہلے ہم نے اس کالج کی بنیاد رکھی تھی۔ چیف جسٹس صاحب کا شکریہ، ان کے فیصلے کے بعد تیزی آئی۔ اسپتال پاکستان کا سب سے جدید اسپتال ہوگا۔ نرسنگ ٹریننگ اسپتال کے لیے ٹینڈر الاٹ ہوگیا ہے۔

انہوں نے کہا کہ نالہ لئی ہمارا اہم پراجیکٹ ہے، منصوبے کا ڈیزائن منتخب کرلیا گیا ہے۔ نالہ لئی کا منصوبہ شہر کا نقشہ بدل دے گا۔ منصوبے کا افتتاح وزیر اعظم کریں گے۔

وفاقی وزیر کا کہنا تھا کہ 7 کروڑ سے حیدر آباد میں اسٹیشن بنانے جا رہے ہیں، ایسے حکمران برسر اقتدار آئے جنہوں نے شہر کے ساتھ ظلم کیا۔ جناح ایکسپریس لاہور سے 30 تاریخ کو چلے گی، وزیر اعظم افتتاح کریں گے۔ ہم ایک نیا شہر آباد کریں گے، وزیر اعظم نے منظوری دے دی ہے۔

انہوں نے کہا کہ ایران کا دورہ بڑا کامیاب رہا، سارے تھنک ٹینکز سے ملاقاتیں ہوئیں، اپنے طور پر ایران کی غلط فہمیاں دور کرنے کی کوشش کی۔ ایم ایل ون پر چین کے ساتھ چیزیں طے ہیں۔ روس اور ایران کے ساتھ بھی منصوبہ کرنے جا رہے ہیں۔

شیخ رشید کا کہنا تھا کہ نیب زدہ لوگوں کے ملنے سے عمران خان حکومت کو خطرہ نہیں، ملکی معیشت کو بہتر کرنے کی کوشش کر رہے ہیں۔ گیس و بجلی کی قیمتیں کنٹرول کر رہے ہیں۔ عمران خان کی پوری کوشش ہے کہ لوٹی ہوئی دولت واپس آئے۔

انہوں نے کہا کہ 15 مارچ کو دن 11 بجے نیب میں پیش ہونے جا رہا ہوں۔ سیاسی مخالفین کے بارے میں انہوں نے کہا کہ میں نے ساری قوم کو کہا تھا کہ ان کا علاج لال حویلی میں ہے، لیکن ان لوگوں کو لندن کی ہوا پسند ہے۔

شیخ رشید نے مزید کہا کہ لندن میں علاج کروانے کا فیصلہ وزیر اعظم ہی کر سکتے ہیں۔ شہباز شریف کو اپنی صحت کی فکر ہے۔ میں نے مارچ میں جھاڑو پھرنے کا انکشاف کیا تھا، ن لیگ اور پیپلز پارٹی کی سیاست نہیں دیکھ رہا باقی اللہ کو علم ہے۔

اسلام آباد: وزیر ریلوے شیخ رشید کا کہنا ہے کہ وزیر اعظم اور وزیر اعلیٰ پنجاب نے کئی ٹرینوں کی منظوری دی ہے، ایران اور ترکی نے ریلوے میں تعاون کی یقین دہانی کروائی ہے۔

تفصیلات کے مطابق وزیر اعظم عمران خان سے وزیر ریلوے شیخ رشید احمد کی ملاقات ہوئی، وفاقی وزیر نے وزیر اعظم کو اپنے محکمے سے متعلق بریفنگ دی۔

شیخ رشید نے وزیر اعظم کو ریلوے کی اپ گریڈیشن اور نئی ٹرینیں چلانے سے متعلق آگاہ کیا، انہوں نے ریلوے میں نئی بھرتیوں سے متعلق بھی وزیر اعظم کو اعتماد میں لیا۔ وزیر اعظم نے شیخ رشید کی کارکردگی پر اطمینان کا اظہار کیا۔

ملاقات کے بعد شیخ رشید نے میڈیا سے گفتگو کرتے ہوئے کہا کہ وزیر اعظم اور وزیر اعلیٰ پنجاب نے کئی ٹرینوں کی منظوری دی، ایران اور ترکی نے ریلوے میں تعاون کی یقین دہانی کروائی ہے۔ ہم ایران اور ترکی کے ساتھ نیا سلسلہ شروع کرنا چاہتے ہیں۔

انہوں نے کہا کہ ایرانی صدر سے ملاقات ہوئی انہوں نے ریلوے میں تعاون کی یقین دہانی کروائی، وزیر اعظم عمران خان کو دورے پر ملاقاتوں سے آگاہ کیا ہے۔ وزیر اعظم بھی آئندہ چند روز میں ایرانی صدر سے ٹیلفونک رابطہ کریں گے۔

وفاقی وزیر کا کہنا تھا کہ وزیر اعظم سے نالہ لئی، پوسٹ گرلز کالج راولپنڈی کی باضابطہ منظوری لی۔ وزیر اعظم 30 مارچ کو لاہور اسٹیشن پر جناح ایکسپریس کا افتتاح کریں گے، جناح ایکسپریس کے افتتاح پر وزیر اعلیٰ پنجاب بھی ہوں گے۔ سرسید ایکسپریس کو بھی جلد 10 ہزار کرائے کے ساتھ شروع کریں گے۔

انہوں نے کہا کہ عمران خان کو اب ان لوگوں سے کوئی خطرہ نہیں، یہ چلے ہوئے کارتوس ہیں ان سے کوئی خطرہ نہیں۔ نواز شریف اور آصف زرداری کو صحت پر توجہ دینی چاہیئے۔ ’ان لوگوں کو سمجھنا چاہیئے جان ہے تو جہان ہے‘۔

شیخ رشید نے مزید کہا کہ بلاول نواز شریف سے ملتے ہیں تو عمران خان کے لیے اچھا ہی ہے، ان کی ملاقات سے عوام کو پتہ چل جائے گا تمام کرپٹ اکٹھے ہو رہے ہیں۔

فیصل آباد: وفاقی وزیر ریلوے شیخ رشید کا کہنا ہے کہ ریلوے چلانے کے لیے بہت پیچھے رہ گئے ہیں اسپیڈ بڑھانی ہوگی، اپنی مدد آپ کے تحت 20 ٹرینیں چلائی ہیں۔ 2 بلین ڈالر کی اورنج لائن ٹرین بنا رہے ہیں۔

تفصیلات کے مطابق وفاقی وزیر ریلوے شیخ رشید نے میڈیا سے گفتگو کرتے ہوئے کہا کہ عوام نے وزیر اعظم اور وزیر خزانہ کے فیصلوں کو سراہا ہے، کشمیریوں کو آزادی کی جدوجہد جاری رکھنے پر سلام پیش کرتا ہوں۔

شیخ رشید کا کہنا تھا کہ آزاد خارجہ پالیسی کے لیے ضروری ہے کہ معیشت مضبوط ہو، ریلوے کے 35 ارب پنشن اور 21 ارب روپے تنخواہوں میں چلے جاتے ہیں۔ 2 بلین ڈالر کی اورنج لائن ٹرین بنا رہے ہیں۔

انہوں نے کہا کہ فریٹ ٹرینیں تیار ہیں بہت اچھے سرمایہ کاروں کی ضرورت ہے، فیصل آباد کے تاجر چاہیں تو اپنی ٹرین لے آئیں میں تیار ہوں۔ ایم ایل ون بنانے جا رہے ہیں جس سے لاہور اور کراچی میں فاصلہ کم ہوگا۔

شیخ رشید کا کہنا تھا کہ اسپیڈ سے پٹری کا بڑا تعلق ہے، پٹری اچھی ہوگی تو اسپیڈ بھی ہوگی۔ اپنی مدد آپ کے تحت 20 ٹرینیں چلائی ہیں۔ ریلوے نہیں چلے گی تو معیشت بھی کمزور ہوگی، ریلوے چلانے کے لیے بہت پیچھے رہ گئے ہیں اسپیڈ بڑھانی ہوگی۔

انہوں نے کہا کہ سر سید ایکسپریس ٹرین ہم سے لے لیں فیول اور کرایہ دے دیں، عمران خان کا حوصلہ ہے ملک کو آگے لے کر چل رہے ہیں۔ وزیر اعظم عمران خان وزیر اعلیٰ پنجاب عثمان بزدار کے ساتھ کھڑے ہیں۔

وفاقی وزیر کا کہنا تھا کہ بلاول کو میں نے معاف کردیا ہے، بلاول بھٹو کے ساتھ صلح ہوگئی ہے۔