Tag: میڈ ان پاکستان

اسلام آباد: وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ میڈ ان پاکستان میڈ ان چائنا سے بڑا برینڈ بن سکتا ہے۔

تفصیلات کے مطابق وزیراعظم عمران خان کی جانب سے سول ملٹری انٹر فیس قائم کرنےکی منظوری ملنے کے بعد ملکی تاریخ میں پہلی بار ڈرون ٹیکنالوجی ڈیفنس کے ساتھ سول اداروں کو منتقل ہو گی۔

فواد چوہدری نے کہا کہ ابتدائی طور پر ڈرون ٹیکنالوجی کا سول استعمال شروع کر رہے ہیں،موٹرویز اور ہائی ویز پر سرویلنس ڈرون کے ذریعے کریں گے۔انہوں نے بتایا کہ مراد سعید کے ساتھ مل کر پلان تیار کر لیا ہے۔

وفاقی وزیر کا کہنا تھا کہ ڈرون ٹیکنالوجی اسلام آباد پولیس کی پٹرولنگ کے لیے بھی استعمال ہوگی،ابتدائی طور پر اسلام آباد کے 10 تھانوں کو ٹیکنالوجی دی جائے گی۔

فواد چوہدری نے کہا کہ خطے میں بدلتے حالات نے ٹیکنالوجی وار شروع کردی ہے،چین اور امریکا کی ٹریڈ وار میں پاکستان اہم کردار ادا کر سکتا ہے،یورپ اور امریکامیں میڈ ان چائنا کو پذیرائی نہیں مل رہی۔

انہوں نے کہا کہ میڈ ان پاکستان کو بڑا برینڈ بنانے کا ارادہ کر لیا ہے،میڈ ان پاکستان میڈ ان چائناسے بڑا برینڈ بن سکتا ہے۔

وفاقی وزیر کا کہنا تھا کہ چینی کمپنیاں پاکستان میں آ کر امریکا سے ٹریڈ کرسکتی ہیں،امریکا پاکستان کے ذریعے چین سے ٹریڈ کرسکتا ہے، آئندہ 5 سے 10 سال کا پلان تیار کر لیا ہے۔

فواد چوہدری نے کہا کہ ڈرون کیمرے،الیکٹرانک گاڑیاں،زرعی ٹیکنالوجی سب پاکستان میں بنے گا، الیکٹرانکس کا سامان بھی پاکستان میں مقامی سطح پر تیارہوگا۔انہوں نے بتایا کہ معروف کمپنی فلپس سمیت بڑی کمپنیوں سے بات چیت شروع کر دی ہے۔

اسلام آباد: وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ فرانسیسی کمپنی سے پاکستان کو ایک ملین ماسک کی تیاری کا پہلا آرڈر مل گیا۔

تفصیلات کے مطابق وزیراعظم عمران خان کی ’’میڈان پاکستان‘‘مہم میں بڑی پیشرفت سامنے آئی ہے۔حکومت نے میڈ ان پاکستان طبی سامان کی ایکسپورٹ پر کام تیز کر دیا۔

وفاقی کابینہ نے تیار کیے گئے ہینڈ سینیٹائزرز برآمد کرنے کی منظوری دی ہے، ہینڈ سینیٹائزرز یورپی ممالک کو ایکسپورٹ کیے جائیں گے۔فرانیسی کمپنی سے پاکستان کو ایک ملین ماسک کی تیاری کا پہلا آرڈر بھی مل گیا۔

وفاقی وزیر برائے سائنس اینڈ ٹیکنالوجی فواد چوہدری نے ماسک کا آرڈر ملنے کی تصدیق کرتے ہوئے کہا کہ فیصل آباد کی 2 ملوں کو ماسک کی تیاری کا آرڈر دیا گیا ہے۔

انہوں نے بتایا کہ مقامی طور پر تیار سینیٹائزر امریکا،یورپی ممالک تک ایکسپورٹ ہوسکیں گے،میڈ ان پاکستان مہم عالمی سطح پر کامیابی حاصل کرے گی۔

فواد چوہدری کا کہنا تھا کہ کسی بھی ملک کا مستقبل اب سائنس وٹیکنالوجی کے ساتھ وابستہ ہے،وزیراعظم اور آرمی چیف کی مشترکہ کوشش نہ ہوتی تو یہ کام نہ ہوتا۔

وفاقی وزیر نے کہا کہ وزیراعظم،آرمی چیف،چیئرمین جوائنٹ چیفس آف اسٹاف کمیٹی نے مدد کی،ریسرچ اینڈ ڈیولپمنٹ کے لیے سول ملٹری انٹر فیس بنایا جا رہاہے،امریکا،اسرائیل، چین کی طرز پر سول ملٹری ریسرچ میکنزم بنا رہے ہیں۔

انہوں نے مزید کہا کہ صرف ڈیڑھ ماہ میں پاکستان کو کئی ملین ڈالرز کا فائدہ ہوا،پاکستان میں ٹیکنالوجی اینڈ سائنس کو مزید تقویت ملے گی۔