Tag: میکا سنگھ

معروف بھارتی گلوکار میکا سنگھ نے انکشاف کیا ہے کہ ریاست پنجاب میں پنجابی فنکار گینگسٹرز کے نشانے پر ہیں، جرائم پیشہ افراد کو پیسہ نہ دینے پر فنکاروں کو دھمکیاں ملتی رہتی ہیں۔

بھارتی میڈیا کے مطابق گلوکار سدھو موسے والا کے قتل کے بعد معروف گلوکار میکا سنگھ نے پنجابی سنگرز کو لاحق خطرات کا ذکر چھیڑ دیا ہے۔

سدھو موسے والا کی فائرنگ کے واقعے میں ہلاکت پر میکا سنگھ بہت افسردہ ہیں اور انہوں نے ملک میں سلیبریٹیز کو گینگسٹرز سے لاحق خطرات پر اپنی پریشانی کا اظہار کیا۔

وہ کہتے ہیں کہ انڈسٹری میں ہر کوئی اس المناک حادثے کے بعد صدمے کا شکار ہے، تاہم میں یہ بتانا چاہتا ہوں کہ یہ صرف سدھو نہیں تھے جنہیں دھمکیاں مل رہی تھیں، بلکہ گپی گریوال اور منکریت اولکھ سمیت بے شمار پنجابی گلوکاروں کو دھکمیاں ملی ہیں۔

ان کا کہنا ہے کہ سدھو موسے والا کے قتل کا واقعہ ہر ایک کے لیے ویک اپ کال ہونی چاہیئے۔

واضح رہے کہ سدھو کے قتل کے بعد احتیاطی تدابیر کے طور پر میکا سنگھ کی سیکیورٹی میں بھی اضافہ کردیا گیا ہے۔

میکا سنگھ کا مزید کہنا تھا کہ گینگسٹرز پیسے طلب کرتے ہیں، اور جو پیسے دے دیتا ہے وہ ٹھیک، نہیں تو دوسروں کو اسی طرح کے انجام سے ڈراتے ہیں۔

انہوں نے کہا کہ پنجاب میں گلوکاروں کو اس قسم کی دھمکیاں اکثر ملتی رہتی ہیں، لوگ بہت پریشان ہیں، جیسے ہی آپ ہٹ ہوتے ہیں، یا شوز چلنا شروع ہوتے ہیں، ساتھ ہی دھکمیاں آنا شروع ہوجاتی ہیں۔

میکا سنگھ کا کہنا تھا کہ اس سے قبل ہم ممبئی کے انڈر ورلڈ کا نام سنتے تھے، اور اب وہ انڈر ورلڈ پنجاب میں بھی شروع ہوگیا ہے، جو کہ بہت غلط پیغام ہے۔

میکا سنگھ جو اس وقت ایک ریالٹی شو کی شوٹنگ کے سلسلے میں جودھ پور میں ہیں کا کہنا ہے کہ کل کو سلیبریٹیز شوٹنگ اور شوز کے لیے پنجاب میں آنا چھوڑ دیں گی۔

انہوں نے یہ بھی کہا کہ مجھے اس بات کا افسوس رہے گا کہ میں مئی میں سدھو موسے والا سے ہونے والی آخری ملاقات میں انہیں ممبئی منتقل ہونے کا نہیں کہہ سکا، جب وہ مجھے ممبئی میں ملنے آئے تو وہ بہت خوش تھے کہ وہ ایئرپورٹ سے تنہا سفر کر کے میرے گھر پہنچے تھے۔

میکا سنگھ نے انکشاف کیا کہ پنجاب میں گینگسٹرز گزشتہ 6 برس کے دوران متحرک ہوئے ہیں، اس سے پہلے سب اچھا تھا۔