برطانیہ میں ’میگا اسٹارم‘ کے دوران گھر پر آسمانی بجلی گرنے کا خوفناک لمحہ ویڈیو میں قید ہو گیا ہے، یہ ویڈیو سوشل میڈیا پر وائرل ہو گئی ہے۔
برطانیہ زبردست طوفان کی زد پر ہے، اور ایک ماہ کی بارش محض چوبیس گھنٹوں کے درمیان برس پڑی ہے، جس سے لندن سمیت کئی علاقوں میں سیلابی صورت حال پیدا ہو گئی ہے۔
اسی دوران برطانوی شہر ’اسٹوک آن ٹرینٹ‘ میں ایک گھر پر آسمانی بجلی گر گئی، جس سے گھر میں آگ لگ گئی، یہ خوف ناک منظر ایک گھر میں لگے سیکیورٹی کیمرے میں قید ہو گیا۔
بجلی گرنے کے ساتھ ایک زبردست دھماکا ہوا، اور ویڈیو میں گھر کی چھت سے شعلے نکلتے دیکھے جا سکتے ہیں، 10 سیکنڈ کے کلپ میں پہلے بجلی سے اچانک آسمان روشن ہوتا ہے، اور پھر علاقے میں ایک زوردار پھٹنے والی آواز گونجتی ہے۔
یہ واقعہ ہفتے کی شام کو پیش آیا، واقعے کے فوراً بعد فائر فائٹرز اور پولیس جائے وقوعہ پہنچی، احتیاط کے طور پر متاثرہ گھر کے آس پاس گھروں کو خالی کیا گیا۔
