Tag: نئی دہلی

بھارتی کرکٹ بورڈ کےصدرانوراگ ٹھاکربرطرف

نئی دہلی: بھارتی سپریم کورٹ نے انڈین کرکٹ بورڈ کے صدر انوراگ ٹھاکر اورسیکریٹری اجے شرکے کو عہدے سے ہٹا دیا ہے۔

تفصیلات کےمطابق بھارتی سپریم کورٹ نے آج چیف جسٹس ٹی ایس ٹھاکر کی سربراہی میں کیس کی سماعت کے دوران لودھا پینل کی سفارشات پر عمل نہ کرنے پر بی سی سی آئی کے صدر اور سیکریٹری کو عہدے سے ہٹانے کا فیصلہ سنایا۔

عدالت ان دو عہدوں پر تقرری کے حوالے سے دو ہفتے بعد سماعت میں فیصلہ سنائے گی جب تک نائب صدور بورڈ کے معاملات چلائیں گے۔

بھارتی کرکٹ بورڈ کےسابق صدرانوراگ ٹھاکرکوعہدے سے ہٹاتےہوئے ان کو 19 جنوری کےلیے شوکاز نوٹس جاری کیا گیا ہے اور اسی سماعت کے دوران بورڈ کے نئے حکام کا بھی فیصلہ ہو گا۔

خیال رہےکہ اس سےقبل عدالت نے حکم جاری کیا تھا کہ ٹیسٹ میچوں کی میزبانی کرنے والی ریاستوں کوفنڈز جاری کرنے سے قبل بورڈ کو اس کے انتظامی معاملات کی تفتیش کرنے والےخصوصی پینل سے منظوری لینی ہوگی۔

یاد رہےکہ سیاستدانوں اور کاروباری شخصیات کی جانب سے چلائے جانے والے دنیا کے امیر ترین کرکٹ بورڈ کے نظام میں شفافیت کی کمی کی وجہ سےبھارتی کرکٹ بورڈ کو تنقید کا نشانہ بنایا جاتا رہا ہے۔

واضح رہے کہ اس سےقبل ہندوستان کے چیف جسٹس ٹی ایس ٹھاکرنے جسٹس آر ایم لودھا کی سربراہی میں ایک کمیشن قائم کرتے ہوئے بی سی سی آئی میں اصلاحات کے لیے تجاویز پیش کرنے کی ہدایت کی تھی۔

جنوری 2, 2017
را بلوچستان کا افسرادارے کا سربراہ مقرر

نئی دہلی: بھارتی خفیہ ادارے را کے بلوچستان ڈیسک کے سربراہ کو را کا سربراہ بنادیا گیا۔ اب بھارت کی جانب سے پاکستان اور بلوچستان میں سازشیں تیز کرنے کا سلسلہ بڑھنے کا امکان ہے۔

تفصیلات کے مطابق انیل دھسمانا نامی افسر بھارت کی خفیہ ایجنسی ’ را ‘ کا نیا سربراہ جبکہ راجیو جین کو انٹیلی جنس بیورو کا نیا سربراہ مقرر کیا گیا ہے۔

را کا نیا چیف جنوری میں راجندر کھنا کی جگہ لے گا۔ بھارتی میڈیا کا کہنا ہے کہ1981ءمیں مدھیا پردیش پولیس ڈپارٹمنٹ میں شامل ہونے والے انیل کمار دھسمانا کو ایوی ایشن ریسرچ سینٹر کے سربراہ ہونے کے ساتھ ’ را ‘ میں نمبر ٹو کی حیثیت حاصل رہی ہے۔

بلوچستان کے معاملات اور انسداد دہشت گردی پر عبور دھسمانا کے تقرر کی بڑی وجہ بنا، وہ پاکستان اور افغانستان کی اندرونی معاملات میں کردار ادا کر چکا ہے۔

نیل کمار دھسمانا نے یورپی ممالک میں ’ را ‘ آپریشنز کی سربراہی بھی کی۔ اطلاعات کے مطابق بلوچستان میں گوادر بندرگاہ کی تعمیر کو روکنے میں بھی دھسمانا کا اہم کردار رہا ہے۔

دسمبر 18, 2016
کرنسی نوٹوں کی بندش بھارت کی تاریخ کا بڑا گھپلا ہے، راہول گاندھی

نئی دہلی : کانگریس کے نائب صدر راہول گاندھی نے پانچ سو اور ہزار روپے کے نوٹوں کی بندش کو بھارت کی تاریخ کا سب سے بڑا گھپلا قرار دے دیا۔ نریندر مودی کو ڈرپوک کہتے ہوئے ان کا کہنا تھا کہ ملک بھر میں بھاشن دینے والے مودی ایوان میں آنے سے خوف زدہ ہیں۔

تفصیلات کے مطابق بھارتی حکومت کی جانب سے پانچ سو اور ہزار روپے کے نوٹوں پر پابندی کے فیصلے سے عوام رُل گئے اور بینکوں کے باہرلائنوں میں لگے دھکے کھاتے رہے۔

بھارت میں حزب اختلاف کی جماعت کانگریس کے رہنما راہول گاندھی نے موجودہ حکومت کی جانب سے کرنسی نوٹوں پر پابندی کے فیصلے کو ملکی تاریخ کا سب سے بڑا گھپلہ قرار دیا ہے۔ جمعے کو صحافیوں سے گفتگو کرتے ہوئے راہول گاندھی نے کہا کہ وزیر اعظم نریندر مودی کرنسی کے معاملے پر پارلیمان میں ہونے والی بحث میں حصہ لینے سے خوفزدہ ہیں۔

ان کا کہنا تھا کہ ‘حکومت مجھے بولنے سے روک رہی ہے کیونکہ انہیں معلوم ہے کہ اگر وہ مجھے بولنے دیں گے تو حقیقت سامنے آجائے گی۔ ملک میں زلزلہ آ جائے گا۔ میں بتاؤں گا کہ یہ اقدام کس کو فائدہ پہنچانے کے لیے اٹھایا گیا ہے۔

بھارتی پارلیمنٹ کے باہر کانگریس کے نائب صدر راہول گاندھی نے مودی سرکار کو شدید تنقید کا نشانہ بنایا۔ نریندر مودی کو ڈرپوک کہتے ہوئے ان کا کہنا تھا کہ ملک بھر میں بھاشن دینے والے مودی ایوان میں آنے سے خوف زدہ ہیں۔

واضح رہے کہ بھارتی حکومت نے آٹھ نومبر کو پانچ سو اور ہزار روپے کے کرنسی نوٹوں پر پابندی کا فیصلہ کیا تھا۔ اس کے بعد پارلیمنٹ کا اجلاس شروع ہونے کے بعد سے اب تک ایوان کی کارروائی اسی تنازع کی وجہ آگے نہیں بڑھ سکی۔

مزید پڑھیں : کرنسی نوٹوں پر پابندی، بھارتی عوام اذیت میں مبتلا

اس حوالے سے مشہور بھارتی ماہر اقتصادیات بھارت جھنجھنوالا نے کہا ہے کہ ملکی معیشت کساد بازاری کا شکار ہوسکتی ہے۔ انہوں نے برطانوی نشریاتی ادارے بی بی سی کو بتایا کہ ‘میں نوٹ بندی کے فیصلے کے خلاف ہوں، سرکار کالا دھن ختم کرنا چاہتی تھی لیکن اسے کوئی کامیابی نہیں ملی ہے۔

ہنس مکھ آدھیا نے بھی اعتراف کیا ہے کہ جتنی بھی کرنسی ختم کی گئی تھی، اب امکان ہے کہ وہ ساری بینکنگ کے نظام میں لوٹ آئے گئی۔ ساڑھے گیارہ لاکھ کروڑ روپے پہلے ہی بنکوں میں جمع کرائے جا چکے ہیں اور اب صرف تقریباً چار لاکھ کروڑ روپے باقی بچتے ہیں۔ عام تاثر ہے کہ اس پالیسی پر وزیر اعظم کا سیاسی مستقبل داؤ پر لگا ہوا ہے۔

دسمبر 9, 2016
نئی دہلی: امریکی سیاح خاتون سے اجتماعی زیادتی

نئی دہلی: بھارتی دارالحکومت نئی دہلی میں سیاحت کےلیے آنے والی امریکی خاتون کومبینہ طوراجتماعی زیادتی کا نشانہ بنایاگیا۔

تفصیلات کےمطابق بھارتی دارالحکومت نئی دہلی کے فائیو اسٹار ہوٹل میں سیاحت کے لیے آنے والی امریکی خاتون کو اجتماعی زیادتی کا نشانہ بنایاگیا۔

امریکی خاتون سیاح کا کہناہے کہ ہوٹل کےسیاحتی گائیڈ نے 4 ساتھیوں کے ساتھ مل کر زیادتی کی۔انہوں نے کہا کہ وہ رواں سال مارچ میں اس حادثے کےبعد صدمے کی وجہ سے فوراََبھارت چھوڑکرچلےگئی تھی۔

امریکی خاتون نے نئی دہلی پولیس کوحال ہی میں ای میل کی جس میں اس نے بتایا کہ ان کے ساتھ اجتماعی زیادتی رواں سال مارچ میں نئی دہلی کے فائیواسٹار ہوٹل میں کی گئی۔

انہوں نےپولیس سے مقدمہ درج کرنے کا مطالبہ کیا ہے اور کہا ہے کہ اب وہ بیان درج کرانے کے لیے بھارت آنے کو تیار ہیں۔

مزید پڑھیں:ہماچل پردیش،منالی میں اسرائیلی سیاح سے اجتماعی زیادتی

واضح رہے کہ اس سے قبل رواں سال جولائی میں بھارت کی شمالی ریاست ہماچل پردیش میں سیاحت کے لیے آنے والی اسرائیلی خاتون کومبینہ طور اجتماعی زیادتی کانشانہ بنایا گیاتھا۔

دسمبر 3, 2016
بھارت پاکستان سے جامع مذاکرات کے لیے تیار نظر نہیں آتا، عبد الباسط

نئی دہلی: بھارت میں پاکستانی سفیر عبد الباسط کا کہنا ہے کہ ایسا لگتا ہے بھارت جامع مذاکرات کے لیے تیار نہیں۔ پاکستان کشمیریوں کی اخلاقی اور سفارتی مدد جاری رکھے گا۔

نئی دہلی میں تعینات پاکستانی سفیر عبد الباسط نے بھارتی اخبار کو انٹرویو دیتے ہوئے کہا کہ اسلام آباد کی خواہش ہے کہ معاملات آگے بڑھیں تاہم ہم صبر سے انتظار کی پالیسی اپنائے ہوئے ہیں۔

انہوں نے کہا کہ ہارٹ آف ایشیا کانفرنس کے دوران دونوں ممالک کے سرد تعلقات میں کسی پیش رفت کا ہونا ممکن نہیں۔ اگر ہارٹ آف ایشیا کانفرنس میں تعلقات پر جمی برف نہیں پگھلتی تو پھر کسی اور موقع کا انتظار کرنا ہوگا تاہم انہوں نے واضح کیا کہ پاکستان بھارت سے مذاکرات کے لیے بھیک نہیں مانگ رہا۔

پاکستانی فوج کو تیاری کے لیے وقت درکار نہیں، عبد الباسط *

ان کا کہنا تھا کہ بظاہر بھارت پاکستان سے جامع مذاکرات کے لیے تیار نظر نہیں آرہا۔

عبد الباسط نے انٹرویو میں مزید کہا کہ دونوں ممالک مذاکرات کی راہ میں ایک قدم آگے اور دو قدم پیچھے چل رہے ہیں۔

مقبوضہ کشمیر کے حوالے سے انہوں نے کہا کہ وہاں کی صورتحال نے معاملات کو مشکل بنا دیا ہے۔ انہوں نے کشمیریوں کی اخلاقی اور سفارتی مدد جاری رکھنے کے عزم کا اظہار کرتے ہوئے کہا کہ دو طرفہ مذاکرات سے قبل ایل او سی پر فائرنگ فوری طور پر بند ہونی چاہیئے۔

دسمبر 2, 2016
جب بھارتی وزیر نے موچی سے اپنی چپل مرمت کروائی

نئی دہلی: بھارتی وزیر سمرتی ایرانی اس وقت مشکل کا شکار ہوگئیں جب ایک تقریب کے لیے جاتے ہوئے ان کی چپل ٹوٹ گئی اور انہیں مجبوراً سڑک کنارے بیٹھے ایک موچی سے اپنی چپل کی مرمت کروانی پڑی۔

سابق بھارتی اداکارہ اور وزیر سمرتی ایرانی نئی دہلی سے تامل ناڈو کے ایک شہر پہنچیں جہاں انہیں ایک تقریب میں شرکت کرنی تھی۔ لیکن آدھے راستے میں ان کی چپل ٹوٹ گئی۔ مجبوراً انہیں سڑک کنارے بیٹھے ایک موچی سے اپنی چپل کی مرمت کروانی پڑی۔

موچی نے ان کی چپل مرمت کرنے کا معاوضہ صرف 10 روپے طلب کیا لیکن سمرتی نے کمال سخاوت سے اسے 100 روپے عنایت کیے۔

موقع پر موجود افراد نے واقعہ کی ویڈیو بنا کر انٹرنیٹ پر اپ لوڈ کی جہاں یہ وائرل ہوگئی اور اسے متعدد بار دیکھا گیا۔

واضح رہے کہ سمرتی ایرانی انڈین ڈراموں کی مشہور اداکارہ ہیں تاہم سنہ 2014 کے عام انتخابات میں انہوں نے بی جے پی کے ٹکٹ پر الیکشن لڑا جہاں سے فتح یاب ہو کر وہ راجیہ سبھا کی رکن منتخب ہوئیں۔ بعد ازاں انہیں یونین منسٹر مقرر کردیا گیا۔

نومبر 28, 2016
خالصتان آزادی تحریک کے سربراہ ہرمندر سنگھ گرفتار

نئی دہلی: بھارتی پنجاب کی نابھا جیل سےفرار ہونے والےخالصتان لبریشن فورس کے سربراہ ہرمندر سنگھ کونئی دہلی سے گرفتار کرلیاگیا۔

تفصیلات کےمطابق گزشتہ روز بھارتی پنجاب کی نابھا جیل سےفرار ہونے والےخالصتان لبریشن فورس کے سربراہ ہرمندر سنگھ کوپنجاب اور نئی دہلی پولیس کے جوائنٹ آپریشن میں نئی دہلی ریلوے اسٹیشن سے آج گرفتار کیاگیا۔

یاد رہے کہ گزشتہ روز پولیس کی وردی میں ملبوس 10 مسلح افراد نے بھارتی پنجاب کے ضلع پٹیالہ میں نبھا جیل پر حملہ کر کے اندھا دھند فائرنگ کی جس کا فائدہ اٹھاتے ہوئے خالصتان لبریشن فورس کے سربراہ ہرمندر سنگھ منٹو 5 ساتھیوں سمیت جیل سے فرار ہو گئےتھے۔

بھارتی پولیس حکام نےاتوار کے روزہرمندر سنگھ منٹوکےجیل سے فرار ہونے کےبعدپنجاب کی سرحد ہریانہ اور جموں کشمیر جانے والے راستوں پر سیکیورٹی ہائی الرٹ کر دی تھی۔

خیال رہےکہ49 سالہ سربراہ ہرمندرسنگھ 2014 سے جیل میں تھے،ان کی گرفتاری کو بھارتی سرکار کی جانب سے دہشت گردی کے خلاف بھارتی پنجاب میں کیے جانے والے آپریشن کی سب سے بڑی فتح قرار دیا گیا تھا۔

مزید پڑھیں:خالصتان آزادی تحریک کے سربراہ ہرمندر سنگھ بھارتی جیل سے فرار

ہرمندر سنگھ 90 کی دہائی کے اوائل سے سکھ علیحدگی پسندوں کے ساتھ شامل تھے اور انہوں نے بھارتی حکومت کو اپنی کارروائیوں میں بھاری نقصان پہنچایا تھا۔

خالصتان لبریشن فورس کے سربراہ اور ان کےقریبی ساتھی گرپیت سنگھ عرف گوپی کو 2014 میں تھائی لینڈ میں پکڑا گیا تھا اور انہیں دہلی ایئرپورٹ سے بھارتی پولیس نے حراست میں لیا تھا۔

واضح رہے کہ خالصتان کی آزادی کی تحریک کے سربراہ کم از کم دہشت گردی کی 10 بڑی وارداتوں میں مطلوب تھے۔

نومبر 28, 2016
نئے پاکستانی آرمی چیف سے محتاط رہنے کی ضرورت ہے، سابق بھارتی آرمی چیف

نئی دہلی : سابق بھارتی آرمی چیف بکرام سنگھ نے کہا ہے کہ انڈیا کو نئے پاکستانی آرمی چیف سے محتاط رہنا ہوگا جنگی مہارت میں ان کا ذاویہ نگاہ نہایت بلند اور انتہائی ماہرانہ ہے۔

بھارتی میڈیا کے مطابق جنرل ریٹائرڈ بکرام سنگھ نے کہا کہ پاکستان کے نئے چیف جنرل قمر باجوہ اپنے وژن اور، صلاحیت میں مشاق ہیں وہ جنگی امور میں بھرپور دسترس اور کسی بھی بڑی طاقت کو شکست دینے کی صلاحیت رکھتے ہیں۔

انہوں نے بھارتی فوج کو مخاطب کرتے ہوئے کہا کہ نئے پاکستانی آرمی چیف سے کے حوالے سے بھارتی فوج کو دیکھو اور انتظار کرو کی پالیسی اختیار کرنی چاہیے تا ہم بھارتی فوج کو جنرل قمر جاوید باجوہ کی پروفیشنل صلاحیتوں اور مہارت سے چوکنا رہنے کی ضرورت ہے۔

سابق بھارتی آرمی چیف نے دعوی کیا کہ وہ نئے پاکستانی آرمی چیف کے ہمراہ بین الاقوامی مشقوں میں شرکت کر چکا ہوں جہاں جنرل قمر باجوہ نے اعلیٰ جنگی مہارت کا مظاہرہ کیا تھا، اس دوران میں نے جنرل قمر ندیم باجوہ کو کسی بھی ملک کے آرمی چیف کے مقابلے میں نہایت ماہر، بہادر اور پیشہ ور فوجی پایا۔

اسی سے متعلق : قمرباجوہ آرمی چیف، زبیر حیات چیئرمین جوائنٹ چیفس مقرر

واضح رہے گزشتہ روز وزیراعظم پاکستان کی ایڈوائس پر صدرِ مملکت ممنون حسین نے قمر ندیم باجوہ کو نیا آرمی چیف مقرر کردیا ہے وہ 29 نومبر کو جنرل راحیل شریف کی جگہ سنبھال لیں گے۔

نئے آرمی چیف قمر ندیم باجوہ کون ہیں ؟

قمر ندیم جاوید باجوہ وہ اس وقت جی ایچ کیو میں انسپکٹرجنرل آف ٹریننگ اینڈ ایویلوئیشن ہیں اور یہ وہی عہدہ ہے جو آرمی چیف بننے سے قبل جنرل راحیل شریف کے پاس تھا۔

جنرل قمر باجوہ پاک فوج کی سب سے بڑی 10 کور کی کمانڈ کرچکے ہیں، قمر باجوہ کے پاس لائن آف کنٹرول کی ذمہ داری تھی۔ اس کے علاوہ جنرل قمر جاوید باجوہ بطور بریگیڈ کمانڈر کانگو میں اقوام متحدہ کے امن مشن کی کمانڈ بھی کر چکے ہیں۔

جنرل قمر آرمی کی سب سے بڑی دسویں کور کو کمانڈ کرچکے ہیں جو کنٹرول لائن کے علاقے کی ذمہ داری سنبھالتی ہے۔جنرل قمر جاوید باجوہ کشمیر اور شمالی علاقہ جات میں معاملات کو سنبھالنے کا وسیع تجربہ رکھتے ہیں بطور میجر جنرل انہوں نے فورس کمانڈ ناردرن ایریاز کی سربراہی کی۔

کشمیر اور شمالی علاقوں میں تعیناتی کا وسیع تجربے کے سبب جنرل قمر دہشت گردی کو پاکستان کے لیے ہندوستان سے بھی بڑا خطرہ سمجھتے ہیں۔ جنرل قمر جاوید باجودہ نے دسویں کور میں لیفٹیننٹ کرنل کے عہدے پر بھی بطور جی ایس او خدمات انجام دی ہیں۔

نومبر 27, 2016
کرنسی نوٹوں پر پابندی، بھارتی عوام اذیت میں مبتلا

نئی دہلی : بھارت میں پانچ سو اور ایک ہزار روپے کے کرنسی نوٹوں پر پابندی لگنے کے بعد عوام نئی اذیت میں مبتلا ہوگئے، اپنی نوکری اور کاروبار کو پس پشت ڈال کر اپنے نوٹ بچانے کے لیے بینکوں میں قطاریں بنا کر کھڑے ہوگئے، اے ٹی ایم مشینوں نے بھی کام کرنا بند کردیا۔

تفصیلات کے مطابق بھارت میں حکومت کی جانب سے پانچ سو اور ہزار روپے کے کرنسی نوٹ پر پابندی لگائے جانے کے تین روز بعد بھی لاکھوں لوگ نقد پیسوں کے لیے مارے مارے پھر رہے ہیں اور بینکوں کے باہر لوگوں کی لمبی قطاریں لگی ہیں۔

برطانوی نشریاتی ادارے بی بی سی نے دہلی اور ممبئی شہر میں نصب کی گئی متعدد اے ٹی ایم پوائنٹس کا دورہ کیا اور یہ بات مشاہدے میں آئی ہے کہ اے ٹی ایم یا تو بند ہیں یا پھر اس میں نوٹ نہیں نکل رہے ہیں۔ حکومت نے کرنسی نوٹ پر پابندی کے بعد فوری طور پر اے ٹی ایم مشینیں بند کر دی تھیں جن کے کھلنے کے بعد رقم نکالنے کے لیے صبح سے سینکڑوں لوگ قطار میں کھڑے ملے۔

حکومت کا کہنا ہے کہ اس نے پانچ سو اور ایک ہزار روپے کے نوٹ کو بلیک منی یا کالے دھن پر قابو پانے کے لیے ختم کیا ہے لیکن اس سے عام آدمی بری طرح متاثر ہوا ہے۔ کم آمدن والے کاروباری، بڑے تاجر اور وہ عام لوگ جن کی زندگی اور کاروبار نقد پیسوں پر منحصر ہے حکومت کے اس قدم سے بری طرح متاثر ہوئے ہیں۔

نوٹوں کی تبدیلی کے سلسلے میں ممبئی اور دہلی میں بینکوں کے باہر زبردست بدنظمی کے مناظر دیکھے گئے۔ دوسری جانب حکومت کا کہنا ہے کہ لوگوں کے پاس کرنسی نوٹ تبدیل کرنے کے لیے 30 دسمبر تک کا وقت ہے اس لیے پریشان ہونے کی ضرورت نہیں ہے۔ لیکن عوام کو اس سلسلے میں کافی شکایتیں ہیں۔

ان کا کہنا ہے کہ ایسا پہلے بھی ہوا ہے تاہم اس بار حکومت نے وقت بہت کم دیا اس لیے لوگ زیادہ پریشان ہیں۔ واضح رہے کہ بھارتی وزیراعظم نریندر مودی نے منگل کی رات کو اچانک ایک ہزار روپے اور پانچ سو کے کرنسی نوٹوں کو فوری طور پر ختم کرنے کا اعلان کیا تھا جس کے بعد بدھ کے روز بینک بند کر دیئے گئے تھے۔

مزید پڑھیں : بھارت : پانچ سو اورایک ہزارکے نوٹوں کی قانونی حیثیت ختم

اب لاکھوں لوگ نوٹ تبدیل کرنے کے لیے بینکوں کا چکر لگا رہے ہیں اور بینکوں میں زبردست رش دیکھا جا رہا ہے۔ بازار میں اب کوئی ہزار روپے اور پانچ سو کا نوٹ نہیں لے رہا ہے جس کی وجہ سے افراتفری کا ماحول ہے۔

اس دوران حکومت نے دو ہزار روپے کا جو نیا کرنسی نوٹ تیار کیا ہے وہ بازار میں آگیا ہے اور حکومت کا کہنا ہے کہ بعض تبدیلیوں کے ساتھ نیا ہزار روپے کا نوٹ بھی چند ماہ میں تیار ہوکر آ جائے گا۔ لیکن یہ نیا کرنسی نوٹ ابھی بڑے شہروں کے بعض علاقوں تک ہی پہنچا پایا ہے جبکہ بیشتر علاقوں میں کرنسی نوٹ دستیاب نہیں ہیں۔

نومبر 11, 2016
بھارت : پانچ سو اورایک ہزارکے نوٹوں کی قانونی حیثیت ختم

نئی دہلی : بھارت میں پانچ سو اورایک ہزار کے کرنسی نوٹوں کی قانونی حیثیت ختم کردی گئی، بڑے پیمانے پرجعلی کرنسی اورکالے دھن کو جواز بنا کر مودی سرکار نے عوام کو مشکل میں ڈال دیا۔

تفصیلات کے مطابق بھارت میں مودی حکومت نے کالے دھن کے مسئلے پر قابو پانے کے لیے آٹھ اور نو نومبر کی درمیانی رات سے پانچ سو اور ایک ہزار روپے کے کرنسی نوٹ ختم کرنے کا اعلان کیا ہے۔

اس اقدام کیلیے مودی سرکار نے بڑے پیمانے پرجعلی کرنسی اورکالے دھن کو جواز بنایا ہے۔ بھارتی وزیراعظم نریندرمودی کا خطاب عوام کو بھاری پڑگیا۔ بھارت میں پانچ سواُورایک ہزارکے کرنسی نوٹوں کی قانونی حیثیت ختم کر دی گئی۔

یہ غیرمعمولی اعلان وزیراعظم نریندر مودی نے پیر کی شب قوم سے خطاب کرتے ہوئے کیا۔ اربوں روپے مالیت کے پانچ سو اُورایک ہزار کے نوٹوں کی تبدیلی کیلئےعوام کو صرف پچاس دن کا وقت دیا گیا ہے۔ آج سےبھارت میں پانچ سو اُور ایک ہزار کے کرنسی نوٹوں کی قانونی حیثیت ختم ہوگئی۔

پچاس دن بعد یہ نوٹ ردی ہوجائیں گے۔ وزیر اعظم مودی کا کہنا تھا کہ یہ رقم آپ کی ہی رہے گی۔ لیکن جن لوگوں کے پاس کالا دھن ہے، اگر وہ یہ رقم بینکوں میں جمع کراتے ہیں تو انہیں محکمہ انکم ٹیکس کو جواب دینا ہوگا کہ یہ رقم ان کے پاس کہاں سے آئی اور اس پر انہوں نے ٹیکس کیوں جمع نہیں کرایا تھا۔

بینکوں میں یہ سہولت دس نومبر سے تیس دسمبر تک دستیاب رہے گی۔ اس کے علاوہ بھارتی حکومت نے دو ہزار روپے کا نیا نوٹ بھی متعارف کرانے کا فیصلہ کیا ہے۔

واضح رہے کہ انڈیا میں بدعنوانی ایک بڑا مسئلہ ہے اور بعض تخمینوں کے مطابق ملک کی متوازی معیشت کی مالیت بھی کھربووں ڈالر ہے۔

نومبر 9, 2016

Tag: نئی دہلی

مزید پڑھیں : بھارت : پانچ سو اورایک ہزارکے نوٹوں کی قانونی حیثیت ختم