لاہور: نیٹ فلکس پر 21 اگست 2025 کو نئی برطانوی سیاسی تھرلر منی سیریز ‘ہوسٹیج’ ریلیز کر دی گئی ہے، سیریز 5 حصوں پر مشتمل ہے۔
سارین جونز اور جولی ڈیلپی نے اس پانچ حصوں پر مشتمل سیریز میں مرکزی کردار ادا کیے ہیں، نیٹ فلکس پر ہوسٹیج کی ریلیز کے بعد اسے ناظرین اور ناقدین کی جانب سے ملے جلے ردعمل کا سامنا ہے۔
سیریز کی کہانی اور کاسٹ
‘ہوسٹیج’ کی کہانی برطانوی وزیر اعظم ایبی گیل ڈالٹن اور فرانسیسی صدر ویوین ٹوسینٹ کے گرد گھومتی ہے، کہانی اس وقت ایک نیا موڑ لیتی ہے جب برطانوی وزیر اعظم کے شوہر، جو فرانسیسی گیانا میں ڈاکٹرز ودآؤٹ بارڈرز کے ساتھ ایک مشن پر ہوتے ہیں، انھیں اغوا کر لیا جاتا ہے۔
اسی دوران فرانسیسی صدر کو بھی بلیک میل کیا جاتا ہے، جس سے دونوں رہنماؤں کے درمیان ایک پیچیدہ مقابلہ شروع ہو جاتا ہے۔
اغوا کار برطانوی وزیراعظم کے استعفیٰ کا مطالبہ کرتے ہیں، سیریز میں دکھایا گیا ہے کہ کس طرح یہ دونوں طاقتور خواتین ذاتی اور سیاسی دباؤ کا سامنا کرتے ہوئے اپنے پیاروں اور کیریئر کو بچانے کے لیے ناممکن فیصلے کرتی ہیں۔
سیریز کی کاسٹ میں سارین جونز (برطانوی وزیر اعظم ایبی گیل ڈالٹن)، جولی ڈیلپی (فرانسیسی صدر ویوین ٹوسینٹ) اور ایشلے تھامس (وزیر اعظم کے شوہر ڈاکٹر الیکس اینڈرسن) شامل ہیں۔
دیگر اہم اداکاروں میں کوری مائل کریسٹ، لوسیئن مساماتی، جیمز کاسمو اور جینی بیتھ بھی شامل ہیں، مذکورہ سیریز کو میٹ چارمین نے تخلیق کیا ہے، جو ‘برج آف اسپائیز’ کے مصنف بھی ہیں۔
‘ہوسٹیج’ کو نیٹ فلکس پر منی سیریز کے طور پر پیش کیا گیا ہے، جس کا مطلب ہے کہ یہ ایک مکمل کہانی ہوگی، تاہم مثبت ردعمل کی صورت میں اس کے دوسرے سیزن کا امکان بھی موجود ہے۔
سیریز کو ابتدائی طور پر ملے جلے تاثرات ملے ہیں کچھ ناقدین نے سارین جونز اور جولی ڈیلپی کی زبردست اداکاری کو سراہا ہے لیکن سیریز کی کہانی کو ایسا قرار دیا گیا ہے جس کے اگلے مناظر کے بارے میں آسانی سے پیشگوئی کی جاسکتی ہے۔
اس کے باوجود، یہ سیریز ایک تیز رفتار سیاسی تھرلر کے طور پر دیکھی جا رہی ہے جو ناظرین کو اسکرین سے جوڑے رکھتی ہے۔