اسلام آباد: ملک میں گیس کی قلت کے باوجود 4 لاکھ سے زائد نئے گیس کنکشنز کا پلان تیار کیا گیا ہے۔
تفصیلات کے مطابق آئندہ مالی سال کے لیے ملک میں 4 لاکھ 3 ہزار 50 نئے گیس کنکشنز کا ہدف مقرر کیا گیا ہے، تاہم سندھ اور بلوچستان میں کوئی نیا گیس کنکشن نہیں دیا جائے گا، جب کہ اس وقت بھی نئے گھریلو صارفین کے گیس کنکشنز پر پابندی عائد ہے۔
حکومتی دستاویز کے مطابق رواں مالی سال کے نظرثانی ہدف کے مقابلے نئے سال 3 لاکھ 73 ہزار 352 نئے گیس کنکشنز کا منصوبہ ترتیب دیا گیا ہے۔
آئندہ مالی سال سوئی ناردرن کے سسٹم پر 4 لاکھ 3 ہزار 50 نئے گیس کنکشنز کا ہدف رکھا گیا ہے، جب کہ سوئی سدرن کے سسٹم پر کوئی نیا گیس کنکشن نہ دینے کا منصوبہ ہے۔
آئندہ مالی سال میں 4 لاکھ نئے گھریلو گیس صارفین کا ہدف مقرر کیا گیا ہے، پلان کے مطابق 2800 نئے کمرشل گیس صارفین کو شامل کیا جائے گا، جب کہ 250 نئے صنعتی صارفین کا ہدف مقرر کیا گیا ہے۔
بجٹ 2024-25 : گیس کی قلت کے باوجود نئے کنکشن جاری کرنے کا فیصلہ
واضح رہے کہ رواں مالی سال نئے گیس کنکشنز کا ہدف ایک لاکھ 37 ہزار 26 مقرر تھا، جب کہ نظر ثانی نئے گیس کنکشنز کا ہدف 29 ہزار 698 ہے۔
