یوبی: نائجیریا کے شمالی مشرق علاقے میں عسکریت پسند تنظیم کی جانب سے حملے میں 37 افراد ہلاک جبکہ متعدد زخمی ہوگئے۔
خبر رساں ادارے روئٹرز کے مطابق نائجیریا کے شمال مشرق میں واقع ریاست یوبی کے مافا گاؤں میں شدت پسند تنظیم کے حملے کے نتیجے میں کم از کم 81 افراد ہلاک متعدد زخمی اور کئی لا پتا ہو گئے۔
مقامی حکام کے مطابق بندوقوں اور آر پی جی گرینیڈز سے لیس تقریبا 150 دہشت گردوں نے اتوار کو مافا گاؤں پر حملہ کیا، تمام مسلح افراد 50 سے زیادہ موٹر سائیکلوں پر سوار ہو کر آئے تھے۔
یوبی اسٹیٹ میں پولیس کے ترجمان ڈنگس عبدالکریم نے کہا کہ ’’بوکو حرام تنظیم ‘‘ کے لوگوں نے بازار میں فائرنگ کی جبکہ دکانوں اور گھروں کو آگ لگا دی۔
ترجمان کے مطابق اس حملے میں بہت سے لوگوں کو قتل کیا، ہلاکتوں کی تعداد زیادہ ہو سکتی ہے کیوں کہ گاؤں کے متعدد لوگ ابھی تک لا پتا ہیں جس کے بارے میں کہا جارہا ہے کہ وہ بھی موت کا شکار ہوچکے ہیں۔
پولیس ترجمان عبدالکریم نے کہا کہ یہ حملہ مقامی چوکیداروں کے ہاتھوں بوکو حرام کے دو مشتبہ جنگجوؤں کی ہلاکت کا بظاہر بدلہ بھی ہوسکتا ہے۔
حکام نے بتایا کہ مافا میں ہلاک ہونے والوں کی تعداد کی تصدیق کے لیے کوششیں جاری ہیں تاہم اب تک کی رپورٹ کے مطابق اس حملے میں کم از کم 37 افراد ہلاک ہوئے ہیں۔