ARYNews.tv | Urdu – Har Lamha Bakhabar

Tag: نائجیریا

  • مسلسل 100 گھنٹے تک کھانا بنانے کا ریکارڈ

    مسلسل 100 گھنٹے تک کھانا بنانے کا ریکارڈ

    نائیجیریا سے تعلق رکھنے والی ایک خاتون شیف نے مسلسل 100 گھنٹے تک کھانا بنایا جس کے بعد ان کا نام گنیز بک آف ورلڈ ریکارڈ میں شامل ہونے کا امکان پیدا ہوگیا ہے۔

    اردو نیوز کے مطابق افریقی ملک نائیجیریا سے تعلق رکھنے والی شیف نے ورلڈ ریکارڈ قائم کرنے کے لیے لگاتار 100 گھنٹے کھانا بنا ڈالا۔

    اے پی کے مطابق سوموار کے روز نائیجیریا سے تعلق رکھنے والی شیف نے طویل ترین وقت یعنی 100 گھنٹوں تک بغیر رکے کھانا بنایا، ہلدا باچی نامی شیف نے اس ورلڈ ریکارڈ کو قائم کرنے کے لیے گزشتہ ہفتے جمعرات کے روز سے کھانا بنانا شروع کر دیا تھا۔

    اس کے بعد انہوں نے انڈین شیف لتا ٹنڈن کا 87 گھنٹوں اور 45 منٹس کا ریکارڈ توڑ دیا جو انہوں نے 2019 میں اپنے نام کیا تھا۔

    ہلدا باچی نے گرین وِچ مین ٹائم کے مطابق شام 7 بج کر 45 منٹ پر نائیجیریا کے صنعتی شہر لاگوس میں لگاتار 100 گھنٹوں تک کھانا بنایا جس کے بعد انہیں ملک بھر میں خوب شہرت مل رہی ہے۔

    اس موقع پر ہزاروں افراد موجود تھے جو کہ ہلدا کے لیے گیت گا رہے تھے اور پھر جب انہوں نے مقررہ وقت کے بعد کھانا بنانا ختم کیا تو ورلڈ ریکارڈ کے انتظار میں موجود افراد جھوم اٹھے۔

    دوسری جانب گنیز ورلڈ ریکارڈ کے جانب سے ٹویٹ میں کہا گیا ہے کہ انہیں اس بات کا علم ہے کہ شیف نے کھانا بنانے کا ریکارڈ قائم کرنے کی کوشش کی ہے۔

    گنیز ورلڈ ریکارڈ کی ٹویٹ کے مطابق ہمیں ورلڈ ریکارڈ کی تصدیق کرنے سے قبل اس کے تمام شواہد کا جائزہ لینا ہوگا۔

    ہلدا باچی کا کہنا ہے کہ وہ دکھانا چاہتی تھیں کہ نائیجیریا کی نوجوان نسل کتنی محنتی اور ثابت قدم ہے، انہوں نے کہا کہ وہ اس سے نوجوان افریقی خواتین کے لیے مہم بھی چلانا چاہتی تھیں جنہیں معاشرے میں نظر انداز کیا جاتا ہے۔

    ہلدا نے جمعرات کے روز دوپہر 3 بجے کے قریب درجنوں نائیجیرین پکوان بنانا شروع کیے، جس میں سوپ سے سٹیو سمیت کئی پروٹینز اور مغربی افریقہ کے مشہور جولوف رائس بھی شامل تھے۔

    وہ ہر گھنٹے میں صرف پانچ منٹ کا وقفہ لیتی تھیں جبکہ ہر 12 گھنٹوں بعد ایک گھنٹہ آرام کرتی تھیں جس میں غسل اور میڈیکل چیک اپ بھی شامل تھے۔

    ان کی اس کاوِش کو سٹریمنگ پلیٹ فارمز پر بے شمار افراد نے دیکھا جبکہ ریکارڈ بنانے کے مقام پر ہزاروں کی تعداد میں مقامی شہریوں سمیت سلیبرٹیز انہیں داد دینے کے لیے موجود رہیں۔

  • نائجیریا کے گاؤں میں مسلح افراد نے تباہی مچا دی، درجنوں ہلاک، گھر راکھ کے ڈھیر میں بدل گئے

    نائجیریا کے گاؤں میں مسلح افراد نے تباہی مچا دی، درجنوں ہلاک، گھر راکھ کے ڈھیر میں بدل گئے

    کڈونا: مغربی افریقی ملک نائجیریا کے ایک گاؤں میں مسلح افراد نے تباہی مچا دی، درجنوں ہلاک ہو گئے، اور دسیوں گھر راکھ کے ڈھیر میں بدل گئے۔

    روئٹرز کے مطابق شمال مغربی نائجیریا کی کڈونا ریاست میں گاؤں پر مسلح افراد نے دھاوا بول دیا، اندھا دھند فائرنگ سے 38 افراد اپنی جانوں سے محروم ہو گئے۔

    جنوبی کڈونا پیپلز یونین کے ترجمان لوکا بنیات نے میڈیا کو بتایا کہ حملہ اتوار کی رات دیر گئے شروع ہوا اور پیر کی صبح تک جاری رہا، اس دوران مسلح افراد نے لوگوں کو گولیاں مار کر ہلاک کیا اور کچھ افراد کو تیز دھار چھریوں سے قتل کیا گیا۔

    اس ہول ناک واقعے میں 12 افراد بچ گئے، جنھیں زخمی حالت میں اسپتال منتقل کیا گیا، حملہ آوروں نے 100 گھروں کو بھی جلا کر راکھ کر دیا۔

    ایک رہائشی نے روئٹرز کو بتایا کہ میں نے اس جگہ بہت سے دوستوں، ان کے والدین، چچاؤں، اور سرپرستوں کو کھو دیا، اگر آپ نیچے جائیں تو دو گلیوں میں آپ کو ہر طرف لاشیں نظر آئیں گی۔

    بنیات کے مطابق پیر سے 5 دنوں کے دوران جنوبی کڈونا میں بلا اشتعال حملوں میں مجموعی طور پر 46 افراد مارے جا چکے ہیں، کئی افراد لا پتا ہیں۔ گاؤں والوں نے حملے شروع ہونے سے چن دن پہلے اجنبی چرواہوں کو علاقے کے قریب کیمپ لگاتے دیکھا تھا۔

    واضح رہے کہ مسلح افراد کے گروہوں نے حالیہ برسوں میں شمال مغربی نائجیریا میں سینکڑوں مقامی کمیونٹیز پر حملے کیے ہیں، دوسری طرف شمال مشرقی نائجیریا مذہبی عسکریت پسندوں کے حملوں کی زد پر ہے۔

  • نائجیریا میں کشتی الٹنے سے 76 افراد ہلاک، متعدد لاپتا

    نائجیریا میں کشتی الٹنے سے 76 افراد ہلاک، متعدد لاپتا

    ابوجا: نائجیریا میں کشتی الٹنے سے 76 افراد ہلاک، اور متعدد لاپتا ہو گئے۔

    تفصیلات کے مطابق نائجیریا کی جنوب مشرقی ریاست انامبرا میں کشتی ڈوبنے سے ہلاکتیں 76 ہو گئیں، کشتی میں 85 افراد سوار تھے، جب کہ 100 مسافروں کے بیٹھنے کی گنجائش تھی۔

    خبر رساں ایجنسی کے مطابق حادثہ اُس وقت پیش آیا جب انجن خراب ہونے سے کشتی رک گئی اورسیلابی ریلے کی نذر ہو گئی، ڈوبنے والوں میں سے 15 افراد کو بچا لیا گیا اور 10 لاشیں نکالی جا چکی ہیں۔

    نائجیریا کے صدر محمد بوہاری نے اپنے بیان میں چیہتر افراد کے ہلاک ہونے کی تصدیق کرتے ہوئے کہا کہ لاپتا افراد کی لاشیں ڈھونڈی جا رہی ہیں۔

    صدر نے مزید کہا کہ انھوں نے سیکیورٹی حکام کو حفاظتی پروٹوکول پر مکمل عمل کروانے کی ہدایت کی ہے، تاکہ مستقبل میں ایسے واقعات کو روکا جا سکے۔

  • نائیجیریا: غیر قانونی آئل ریفائنری میں دھماکا، 100 سے زائد ہلاک

    نائیجیریا: غیر قانونی آئل ریفائنری میں دھماکا، 100 سے زائد ہلاک

    ابوجا: نائجیریا میں ایک غیر قانونی آئل ریفائنری میں دھماکے میں کم از کم 100 افراد ہلاک ہو گئے۔

    تفصیلات کے مطابق ایک مقامی حکومتی اہل کار اور ایک ماحولیاتی گروپ نے بتایا ہے کہ نائجیریا کی ریورز ریاست میں تیل صاف کرنے کے غیر قانونی ڈپو میں ہونے والے دھماکے میں رات بھر 100 سے زیادہ افراد ہلاک ہو گئے۔

    پیٹرولیم وسائل کے ریاستی کمشنر گڈ لک اوپیاہ نے ہفتے کے روز کہا کہ ایک غیر قانونی بنکرنگ سائٹ پر آتش زدگی سے سو سے زیادہ لوگ ہلاک ہو گئے ہیں جن کی لاشیں بھی ناقابل شناخت ہو گئی ہیں۔

    یوتھ اینڈ انوائرمینٹل ایڈووکیسی سینٹر کے مطابق کئی گاڑیاں جو غیر قانونی ایندھن خریدنے کے لیے قطار میں کھڑی تھیں، دھماکے میں جل کر تباہ ہو گئیں۔

    غیر قانونی ریفائنری کا مالک واقعے کے بعد فرار ہو گیا ہے، اور حکومت نے اسے مطلوب قرار دے دیا ہے، حکام کا کہنا ہے کہ اگر وہ پکڑا جاتا ہے تو امید ہے کہ یہ معلوم ہو سکے کہ ریفائنری میں کیا ہوا تھا۔

    عالمی ذرائع ابلاغ کا کہنا ہے کہ تیل پیدا کرنے والے نائجر ڈیلٹا میں بے روزگاری اور غربت نے خام تیل کی غیر قانونی ریفائننگ کو ایک پرکشش لیکن مہلک کاروبار بنا دیا ہے۔

    خام تیل کو تیل کی بڑی کمپنیوں کی ملکیت والی پائپ لائنوں کے جال کے ذریعے عارضی ٹینکوں میں پہنچایا جاتا ہے جہاں اسے صاف کر کے مصنوعات میں بدلا جاتا ہے۔

    اس خطرناک عمل نے بہت سے مہلک حادثات کو جنم دیا ہے، اور علاقے کو بے انتہا آلودہ کر دیا ہے، کھیت کی زمینوں، کھاڑیوں اور جھیلوں میں تیل کے رساؤ سے بڑی مقدار میں آلودگی پائی جاتی ہے۔

  • ڈاکوؤں کے حملے میں 200 نائجیرین ہلاک

    ڈاکوؤں کے حملے میں 200 نائجیرین ہلاک

    ابوجا: نائجیریا میں ڈاکوؤں کے حملے میں 200 افراد ہلاک ہو گئے۔

    تفصیلات کے مطابق نائجیریا میں مسلح ڈاکوؤں کے حملے میں دو سو سے زائد افراد جاں بحق ہو گئے ہیں، یہ واقعہ چند روز قبل شمال مغربی نائجیریا میں پیش آیا۔

    عالمی میڈیا کے مطابق نائجیریا کی ریاست زمفارا میں حکومتی کارروائی کے جواب میں موٹر سائیکل سوار مسلح ڈاکوؤں نے 10 سے زائد گاؤں پر دھاوا بول دیا تھا، ڈاکوؤں نے حملے کے دوران اندھا دھند فائرنگ کی، جس سے دو سو سے زائد دیہاتی جاں بحق ہو گئے۔

    ڈاکوؤں کے حملے میں 10 ہزار لوگ بے گھر بھی ہو گئے ہیں، کیوں کہ حملے میں انھوں نے لوٹ مار کے ساتھ ساتھ گھروں کو نذر آتش بھی کیا، حکومتی فورسز کی کارروائی کے جواب میں 300 سے زائد موٹر سائیکل سوار ڈاکوؤں نے زمفارا کے دس سے زائد دیہاتوں پر حملہ کیا تھا۔

    نائجیریا کی افواج اور فضائیہ نے گزشتہ پیر کو گوسامی کے جنگلات اور تسمیرے گاؤں میں ڈاکوؤں کی کمین گاہوں کو نشانہ بنایا تھا جس میں 100 سے زائد ڈاکو مارے گئے تھے جن میں ان کے 2 سرغنہ بھی شامل تھے۔

    میتوں کو اجتماعی طور پر دفن کرنے والے دیہاتیوں نے بتایا کہ اب بھی کئی افراد لاپتا ہیں جو یا تو قتل کر دیے گئے ہیں یا پھر ڈاکو انھیں ساتھ لے گئے۔

    نائجیرین حکومت نے ان ڈاکوؤں کو دہشت گرد قرار دیتے ہوئے فیصلہ کن کارروائی کا عندیہ دیا ہے۔

  • نائجیریا نے 10 لاکھ آسٹرازینیکا ویکسینز تلف کر دیں

    نائجیریا نے 10 لاکھ آسٹرازینیکا ویکسینز تلف کر دیں

    ابوجا: مغربی افریقی ملک نائجیریا نے 10 لاکھ سے زائد کرونا ویکسین تلف کر دی ہیں۔

    تفصیلات کے مطابق نائجیریا میں حکومت نے میعاد (ایکسپائری) ختم ہونے پر آسٹرازینیکا کی ایک ملین سے زائد ڈوزز تلف کر دی ہیں، پریشانی میں مبتلا عوام کو یہ یقین دلانے کے لیے کہ اب کوئی ایکسپائر ویکسین زیر گردش نہیں پائی جائے گی۔

    حکومت نے ویکسینز گزشتہ روز بدھ کو تلف کی ہیں، رواں ماہ صحت حکام نے کہا تھا کہ امیر مغربی ممالک کی جانب سے عطیہ شدہ کرونا ویکسینز کی بڑی تعداد کی شیلف لائف پوری ہونے والی ہے، اور اس میں محض دو تین ہفتے رہ گئے ہیں۔

    خبر رساں ادارے روئٹرز نے 7 دسمبر کو اطلاع دی تھی کہ نائجیریا میں تقریباً 10 لاکھ کووِڈ ویکسینز استعمال کیے بغیر ہی نومبر میں ختم ہو چکی ہیں۔

    دارالحکومت ابوجا میں ایک ڈمپ سائٹ پر محکمہ صحت کے حکام اور رپورٹرز کی موجودگی میں ایک بلڈوزر کے ذریعے آسٹرازینیکا شاٹس کو تلف کیا گیا، جو کہ گتے کے ڈبوں اور پلاسٹک میں پیک کیے گئے تھے۔

    نائجیریا قومی محکمہ خوراک و ادویات کنٹرول مرکز کے ڈائریکٹر موجیسولا آدییے نے کہا کہ 11 سے 19 اکتوبر کی تاریخوں میں نائجیریا کو بھیجی گئی 2 سے 6 ملین کے لگ بھگ آسٹرا زینیکا ویکسین میں سے زیادہ تر کی مدت استعمال ختم ہو چکی ہے۔

    انھوں نے کہا ہے کہ بعض ٹیسٹوں کے بعد ویکسین کو ضائع کرنے کا فیصلہ کیا گیا ہے، نائجیریا کے عوام کو نقصان سے بچانے کے لیے ویکسین کو ضائع کرنا ضروری ہے۔

    نائجیریا قومی ایجنسی برائے خدماتِ صحت کے ڈائریکٹر فیصل شعیب نے کہا ہے کہ اب کے بعد حکومت مدت استعمال ختم ہونے کے قریب ویکسین قبول نہیں کرے گی۔

  • بڑا سانحہ، نائجیریا میں 21 منزلہ عمارت گر گئی

    بڑا سانحہ، نائجیریا میں 21 منزلہ عمارت گر گئی

    لاگوس: نائجیریا میں ملک کے بڑے شہر لاگوس میں ایک 21 منزلہ عمارت منہدم ہو گئی۔

    تفصیلات کے مطابق نائجیریا میں ایک زیر تعمیر 21 منزلہ عمارت زمیں بوس ہوگئی، واقعے میں متعدد افراد کا ملبے تلے دبے ہونے کا خدشہ ہے۔

    یہ واقعہ پیر کی دوپہر کو شہر کے ایک متمول علاقے آئیکوئی میں پیش آیا، عمارت لگژری اپارٹمنٹس پر مشتمل اور زیر تعمیر تھی، فی الحال یہ معلوم نہیں ہو سکا ہے کہ انہدام کے وقت عمارت میں کتنے لوگ موجود تھے۔

    غیر ملکی میڈیا کے مطابق قریبی عمارتوں میں رہائش پذیر شہریوں کا کہنا تھا کہ انھیں لگا جیسے زلزلہ آ گیا ہو، انھوں نے دیکھا کہ گیارہ منزلہ عمارت ڈھہ گئی ہے۔

    رپورٹس کے مطابق منہدم ہونے والی عمارت گزشتہ دو برس سے زیر تعمیر تھی، آج صبح ڈویلپر نے ممکنہ خریداروں کے ساتھ اس عمارت میں میٹنگ بھی کی تھی۔

    سوشل میڈیا پر تصاویر اور ویڈیوز میں دیکھا جا سکتا ہے کہ سائٹ پر کنکریٹ ملبے کا ایک بڑا ڈھیر پڑا ہوا ہے۔

    میڈیا رپورٹس کے مطابق نائجیریا کے 2 کروڑ آبادی والے سب سے بڑے شہر لاگوس میں عمارتوں کا انہدام نسبتاً ایک عام واقعہ بن چکا ہے۔ 2019 میں دو عمارتیں گر گئی تھیں، جن میں سے ایک اسکول بھی قائم تھا، جس میں درجنوں لوگ ہلاک ہو گئے تھے۔

    اس وقت ایک مقامی ماہر تعمیرات نے امریکی ٹی وی کو بتایا تھا کہ لاگوس میں تقریباً ایک ہزار عمارتوں کو گرنے کا خطرہ لاحق ہے۔

  • نائجیریا: ٹوئٹر نے صدر مملکت کا ٹوئٹ ڈیلیٹ کر دیا

    نائجیریا: ٹوئٹر نے صدر مملکت کا ٹوئٹ ڈیلیٹ کر دیا

    ابوجہ: سماجی رابطوں کی ویب سائٹ ٹوئٹر نے نائجیریا کے صدر کا ٹوئٹ پالیسی کے خلاف قرار دیتے ہوئے ڈیلیٹ کر دیا۔

    تفصیلات کے مطابق ٹوئٹر نے کمپنی کے قانون کی خلاف وزری کا حوالہ دے کر نائجیریا کے صدر محمدو بوحاری کا منگل کو کیا گیا ایک ٹوئٹ حذف کر دیا ہے، ٹوئٹ میں بوحاری نے ملک کے جنوب مشرقی علاقے کی صورت حال پر مخالفین کے لیے دھمکی آمیز زبان استعمال کی تھی۔

    محمد بوحاری کا یہ ٹوئٹ ایک ایسی صورت حال میں سامنے آیا تھا جب ملک میں علیحدگی پسندی کے جذبات اور تشدد کا رجحان تیزی سے بڑھ رہا ہے، صدر نے ٹوئٹ میں ریاست بیافرا کے حامیوں کو سیکیورٹی حکام اور حکومت پر بڑھتے حملوں پر سزا دینے کی دھمکی دی تھی۔

    بوحاری نے ٹوئٹ میں لکھا تھا کہ بیافرا خانہ جنگی کے دوران جو تباہی اور ہلاکتیں ہوئیں، انھیں سمجھنے کے لیے آج یہ برا سلوک کرنے والے ابھی بہت کم عمر ہیں، اور ہم میں سے وہ جنھوں نے 30 ماہ تک جنگ کا سامنا کیا، وہ ان لوگوں سے اسی زبان میں بات کریں گے جو یہ سمجھتے ہیں۔

    غیر ملکی میڈیا کا کہنا ہے کہ بوحاری کا یہ ٹوئٹ ملک کے جنوب مشرقی علاقوں میں آتش زدگی اور حملوں کا رد عمل ظاہر ہوتا ہے، تاہم ابھی تک کسی بھی گروپ نے ان حملوں کی ذمہ داری قبول نہیں کی ہے۔

    سوشل میڈیا کمپنی نے کہا کہ بوحاری کا ٹوئٹ ناروا سلوک والی پالیسی کی خلاف ورزی پر مبنی تھا، جس کی وجہ سے صدر کا اکاؤنٹ بھی 12 گھنٹوں کے لیے معطل کیا گیا۔

    بوحاری کے ڈیلیٹ کیے گئے ٹوئٹ میں 1967-1970 کے دوران کے نائجیریائی خانہ جنگی کا بھی ذکر کیا گیا تھا، واضح رہے کہ اس عرصے کے دوران ملک کے فوجیوں نے خود ساختہ جمہوریہ بیافرا کو ہرایا تھا، جس نے نائجیریا کے جنوب مشرقی حصے پر قبضہ کر رکھا تھا۔

  • کرونا وائرس: افریقی ملک کے سائنس دانوں کا بڑا کارنامہ

    کرونا وائرس: افریقی ملک کے سائنس دانوں کا بڑا کارنامہ

    ابوجا: مغربی افریقا کے ملک نائیجیریا نے کرونا وائرس کی 2 ویکسینز تیار کر لی ہیں۔

    تفصیلات کے مطابق نائیجیریا حکومت کے سیکریٹری اور کو وِڈ 19 کے خلاف جدوجہد کمیٹی کے سربراہ بوس مصطفیٰ نے ایک بیان میں کہا ہے کہ ملک کے سائنس دانوں نے کرونا وائرس کے خلاف بڑی کامیابی حاصل کرتے ہوئے مقامی ویکسینز تیار کر لی ہیں۔

    بوس مصطفیٰ نے میڈیا کو بتایا کہ مقامی طور پر تیار کردہ کرونا ویکسینز کے کلینیکل تجربات جاری ہیں۔

    ان کا کہنا تھا کلینیکل تجربات مکمل ہونے اور منظوری سرٹیفیکیٹ حاصل ہونے کے بعد مقامی ویکسینز کا استعمال شروع کر دیا جائے گا۔

    انھوں نے کہا یہ کامیابی سائنسی میدان میں ایک نئے دور کا آغاز ثابت ہوگی، اور اس سے ملک کی میڈیکل انڈسٹری کے حوصلے بڑھیں گے، متعلقہ اداروں سے اپیل ہے کہ ملکی محققین کے ساتھ تعاون کریں، تاکہ ان کی بھرپور حوصلہ افزائی ہو۔

    خیال رہے کہ کرونا ویکسین کے سلسلے میں ڈبلیو ایچ او اور دیگر اداروں کے تحت شروع ہونے والے عالمی رسائی پروگرام ’کوویکس‘ کے تحت نائیجیریا آسٹرا زینیکا ویکسین کی 42 لاکھ 24 ہزار خوراکیں وصول کر چکا ہے۔

    یاد رہے کہ گزشتہ برس اپریل میں ایک افریقی ملک مڈغاسکر کے صدر آنڈری رجولینا نے کرونا وائرس کی مؤثر شافی دوا کے طور پر مقامی طور پر تیار کردہ ایک مشروب Covid Organics لانچ کیا تھا، اسے مڈغاسکر کے سائنسی ادارے مالاگاسی انسٹی ٹیوٹ آف اپلائیڈ ریسرچ نے تیار کیا تھا۔

  • آمنہ جسے افریقا کے لوک ادب میں مرد کے روپ میں‌ پیش کیا گیا

    آمنہ جسے افریقا کے لوک ادب میں مرد کے روپ میں‌ پیش کیا گیا

    مغربی افریقا کے قدیم تجارتی راستے اور مصروف گزر گاہیں آج مختلف ممالک کے درمیان سرحدوں میں‌ بٹ چکی ہیں جن میں سے ایک نائجیریا ہے جو قدیم تہذیب اور روایات کا امین ہے۔ اس خطّے کی تہذیب اور تاریخ و ثقافت متنوع اور ہمہ رنگ ہے جہاں آٹھویں صدی میں اسلام کی بہار آئی اور مسلمانوں‌ کی حکومت قائم ہوئی۔

    اسی سرزمین پر لگ بھگ پانچ صدی‌ قبل ایک لڑکی نے جنم لیا تھا جس کا نام تاریخ کے اوراق میں‌ ہمیشہ کے لیے محفوظ ہو گیا۔ اس کا ذکر افریقا کی لوک داستانوں اور شاعری میں‌ کیا گیا اور آج بھی خاص طور پر نائجیریا میں‌ اسے عزم و ہمّت، بہادری اور جواں مردی کی مثال اور طاقت کی علامت مانا جاتا ہے۔

    اس لڑکی کا نام آمنہ تھا جس نے 1533 میں اس وقت کے ایک مال دار اور امیر کبیر گھرانے میں‌ آنکھ کھولی۔ اس کی جائے پیدائش زازاؤ نامی وہ علاقہ ہے جو اب نائجیریا میں‌ شامل ہے۔ آمنہ کے والد اور ان کا خاندان دھاتوں‌ اور نمک کے کاروبار سے وابستہ تھا۔ یہ خاندان "الھوسا” کہلاتا تھا اور زازاؤ پر آمنہ کے والد کی امارت بھی قائم تھی۔ ان کے انتقال کے بعد ان کا بیٹا اور آمنہ کا بھائی کرامہ تخت نشیں ہوا جب کہ آمنہ نے ایک الگ ہی راستہ چنا۔

    اس نے فوج کا حصّہ بننا پسند کیا۔ دراصل سپاہ گری اس کا شوق تھا۔ وہ شروع ہی سے بہادر اور نڈر تھی۔ اس نے اپنے شوق اور لگن کے سبب روایتی ہتھیار چلانے اور سامانِ حرب کا استعمال سیکھا۔ حکم راں خاندان کی اس لڑکی نے میدان میں طاقت آزمانے کو اہمیت دی اور ثابت کیا کہ وہ کسی بھی محاذ پر بے جگری سے دشمن کا مقابلہ کرسکتی ہے۔ یوں اسے اپنی فوج میں اہم مقام حاصل ہوا۔

    1576 میں آمنہ کے بھائی کی موت کے بعد رعایا نے اسے اپنی ملکہ منتخب کرلیا۔ آمنہ کو اس سرزمین کی پہلی خاتون حکم راں کہا جاتا ہے جس نے ملکہ بننے کے چند ماہ بعد فوجی مہمات شروع کیں اور متعدد لڑائیوں میں آگے رہی۔

    نائجیریا کی اس ملکہ کو افسانوی شہرت ملی اور لوک داستانوں میں اسے ایک مرد کی صورت پیش کیا گیا ہے جو موت کی آنکھوں میں آنکھیں ڈال دیتا ہے۔

    آمنہ کے بارے میں یہ بھی مشہور ہے کہ وہ ہر محاذِ جنگ سے واپسی پر شادی کرتی اور چند ہفتوں بعد وہ رشتہ ختم کردیتی تھی۔