کراچی (24 اگست 2025): بیرون ملک مقیم قانونی ورثا جانشینی سرٹیفکیٹ کیسے حاصل کر سکتے ہیں نادرا نے اس کا مکمل طریقہ کار بتا دیا ہے۔
کسی بھی شخص کے انتقال کے بعد اس کی جائیداد اور املاک اس کے قانونی ورثا کو منتقل ہوتی ہے۔ تاہم اس کے لیے قانونی طور پر وراثتی سرٹیفکیٹ کی ضرورت ہوتی ہے اور نیشنل ایڈوانسڈ ڈیٹابیس رجسٹریشن اتھارٹی (نادرا) یہ وراثتی سرٹیفکیٹ بنا کر دیتا ہے۔
پاکستان میں مقیم افراد کو با آسانی کسی بھی نادرا سینٹر پر اس کے لیے درخواست دے سکتے ہیں۔ مگر بہت سارے ایسے پاکستانی بھی ہیں جن کی پاکستان میں جائیداد ہے، لیکن وہ بیرون ملک مقیم ہیں۔ تو ایسے اوور سیز پاکستانی کس طرح جانشینی سرٹیفکیٹ کے لیے اپلائی کر سکتے ہیں۔
نادرا پوڈکاسٹ میں اس سوال کا جواب پراجیکٹ ڈائریکٹر جانشینی سرٹیفکیٹ محمد واصف جہانگیر نے دیتے ہوئے اس کا آسان طریقہ کار بتا دیا۔
محمد واصف جہانگیر نے کہا کہ پاکستان میں موجود کسی بھی جائیداد کے اگر بیرون ملک مقیم کئی افراد قانونی وارث ہیں، تو ان میں سے ایک قانونی وارث پاکستان آ کر جانشینی سرٹیفکیٹ کے لیے اپلائی کر سکتا ہے۔
انہوں نے بتایا کہ اس کے لیے کوئی بھی ایک قانونی وارث پاکستان آ کر ہمارے کسی بھی نادرا سینٹر پر جانشینی سرٹیفکیٹ کے لیے درخواست جمع کرائے۔ درخواست جمع ہونے کے بعد درخواست گزار کو ایک یونیک پیٹرن آئی ڈی جاری ہوگا۔ اسی آئی ڈی پر باقی ورثا کی بائیومیٹرک کی جائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
واضح رہے کہ اس سے قبل نادرا نے ملک بھر کے عوام کے لیے وراثتی سرٹیفکیٹ کا حصول آسان بناتے ہوئے ملک بھر میں کسی بھی نادرا سینٹر پر درخواست دینے کی سہولت فراہم کی جا چکی ہے۔
نادرا کی طرف سے جاری کیے گئے ایک نئے نوٹیفکیشن کے مطابق اب وراثتی جائیداد پاکستان کے کسی بھی صوبے میں ہو، قانونی ورثا اس کا جانشینی سرٹیفکیٹ حاصل کرنے کی درخواست اسلام آباد سمیت ملک کے چاروں صوبوں (پنجاب، سندھ، بلوچستان اور خیبرپختونخوا) اور گلگت بلتستان میں نادرا دفاتر اور دیگر مقامات پر قائم 186 جانشینی سہولت مراکز یا سکسیشن فیسلیٹیشن یونٹس پر جمع کرا سکتے ہیں۔
اسی طرح قانونی ورثا کی بائیو میٹرک تصدیق کی سہولت بھی مزید بہتر بنا دی گئی ہے اور اب یہ کارروائی کسی بھی مقررہ قریبی مرکز میں جا کر مکمل کی جا سکتی ہے یا قانونی ورثا اس مقصد کیلیے نادرا کی پاک آئی ڈی موبائل ایپ بھی استعمال کر سکتے ہیں۔
سابقہ طریقہ کار کے تحت جانشینی سرٹیفکیٹ کی درخواست صرف اسی صوبے میں جمع کرانا لازم تھا جہاں وراثتی جائیداد موجود ہو جس کی وجہ سے دیگر شہروں میں مقیم شہریوں کو پریشانی کا سامنا کرنا پڑتا تھا۔
نادرا نے پہلے مرحلے میں بائیو میٹرک تصدیق کی سہولت پاک آئی ڈی موبائل ایپ پر متعارف کرائی تاہم درخواست جمع کرانے کیلیے متعلقہ صوبے کی شرط اب بھی موجود تھی۔
نادرا کی اس نئی سہولت کی بدولت شہریوں کیلیے جانشینی سرٹیفکیٹ کا حصول مزید آسان ہوگیا ہے اور وہ کسی بھی صوبے کے متعلقہ نادرا دفتر – جہاں جانشینی سہولت مرکز قائم ہو – میں اپنی درخواست جمع کرا سکتے ہیں۔
بائیو میٹرک تصدیق کیلیے قانونی ورثا نہ صرف نادرا کے کسی بھی مرکز پر آ سکتے ہیں بلکہ نادرا کی پاک آئی ڈی موبائل ایپ سے بھی فائدہ اٹھا سکتے ہیں۔
ترجمان نادرا کے مطابق اس سلسلے میں نادرا ہیڈکوارٹرز کی جانب سے تمام متعلقہ دفاتر کو نوٹیفکیشن جاری کر دیا گیا ہے اور شہری اب اس سہولت سے فائدہ اٹھا سکتے ہیں۔