حیدرآباد: واٹر اینڈ سینیٹیشن ایجنسی (واسا) کے حکام نے کہا ہے کہ مختلف سرکاری ادارے واسا کے 7 ارب 50 کروڑ روپے کے نادہندہ ہیں۔
واسا حکام کے مطابق مختلف وفاقی، صوبائی اور خود مختار ادارے واسا کے بلوں کی بر وقت ادائیگی کرنے میں ناکام رہے ہیں، واسا کی دسمبر 2023 تک بقایا جات کی تفصیلات اے آر وائی نیوز نے حاصل کر لی ہیں۔
حیدرآباد میں قائم وفاقی ادارے واسا کے ایک ارب 45 کروڑ روپے کے نادہندہ ہیں، صوبائی اداروں نے واسا کے ایک ارب 76 کروڑ 60 لاکھ روپے کے واجبات ادا کرنے ہیں، جب کہ خود مختار اداروں پر واسا کے 4 ارب 28 کروڑ 82 لاکھ روپے کے واجبات ہیں۔
محکمہ صحت کے اسپتالوں پر 38 کروڑ 70 لاکھ روپے کے واجبات ہیں، سرکاری تعلیمی اداروں اور حیدرآباد بورڈ پر 17 کروڑ 23 لاکھ روپے کے واجبات ہیں، سائٹ حیدرآباد پر بھی ایک ارب 15 کروڑ روپے کے واجبات ہیں، اور سندھ ورکرز ویلفیئر بورڈ بھی 41 کروڑ 91 لاکھ روپے کا نادہندہ ہے۔
محکمہ داخلہ سندھ کے نادہندہ اداروں میں پولیس ٹریننگ سینٹر، سینٹرل جیل، نارا جیل بھی شامل ہیں، پاکستان پوسٹ، ریلوے اور حیسکو کے گرڈ اسٹیشنز، اور رہائشی کالونیاں بھی نادہندہ ہیں۔
