کراچی ایئر پورٹ پر بیرونِ ملک سے آئے والد کو دیکھ کر بے ساختہ بھاگنے والی بچی کے بال پکڑ کر دھکا دینے والے اے ایس ایف سب انسپکٹر کو نوکری سے برخاست کر دیا گیا۔
تفصیلات کے مطابق کراچی ائیرپورٹ پر 10 مارچ کو اے ایس ایف افسر کی جانب سے بچی سے ناروا سلوک کی ویڈیو وائرل ہوگئی تھی، اے ایس ایف افسر نے کم سن بچی کو بالوں سے پکڑ کر فرش پر پھینک دیا تھا۔
ذرائع نے بتایا کہ اب اے ایس ایف اہلکار کو برطرف کرتے ہوئے ملوث افسر کے خلاف محکمانہ قوانین کے تحت مزید سخت ترین کارروائی بھی کی جا رہی ہے۔
ذرائع کے مطابق اہلکار شعبان اے ایس ایف میں 35 سالہ ملازمت مکمل کر چکاہے، اہلکار واقعے کے وقت ایئرپورٹ پربین الاقوامی آمد کے خارجی گیٹ کا انچارج تھا والد سے ملنے آنے والی بچی کو افسر نے دھکا دیا تھا۔
کراچی ایئرپورٹ پر اے ایس ایف افسر کی جانب سے بچی سے کیے جانے والے ناروا سلوک کے معاملے پر اہم پیشرفت سامنے آئی ہے۔
اس حوالے سے اے ایس ایف ترجمان کا واضح موقف سامنے آگیا جس میں کہا گیا ہے کہ ایئرپورٹس سیکیورٹی فورس بطور ادارہ مذکْورہ خاندان سے دلی ہمدردی کا اظہار اور دل آزاری پر معذرت کرتا ہے۔
ترجمان اے ایس ایف نے کہا کہ ادارہ ساتھ ہی ساتھ اس عزم کا اعادہ بھی کرتا ہے کہ مستقبل میں ایسا کوئی اور واقعہ کبھی رونما نہ ہو۔
ان کا کہنا تھا کہ سوشل میڈٖیا پر چلنے والی یہ ایک پرانی ویڈیو ہے جس کے ذمہ دار کے خلاف سخت محکمانہ تادیبی کارروائی عمل میں لاتے ہوئے متعلقہ افسر کو قانون کے مطابق کڑی سزا دی جاچُکی ہے۔
ترجمان کے مطابق سوشل میڈیا پر ایک ویڈیو وائرل ہو رہی ہے جس میں ایک بچی اپنے والد کو دیکھ کر بے ساختہ اس کی طرف لپکتی ہے اور انٹری پر موجود اہلکار اس کو غیر شائستہ طریقے سے روکتا ہے جس سے وہ نیچے گرجاتی ہے۔
انہوں نے کہا کہ اے ایس ایف پاکِستان آرمی ایکٹ کے تابع ایک منظم فورس ہے، فورس کے اہلکار اپنے فرائض منصبی ثابت قدمی اور خوش خلقی سے سرانجام دیتے ہیں۔
جہاں بھی کوئی کوتاہی سامنے آتی ہے اسی وقت اُس کا تدارک کیا جاتا ہے، مذکورہ اہلکار کا یہ فعل انفرادی عمل تھا، فورس کسی بھی اہلکار کے کسی بھی نامناسب رویے کے خلاف عدم برادشت کے رویے کی پالیسی پر سختی سے عمل پیرا ہے۔
ترجمان نے کہا کہ کچھ عناصر نے اس پُرانے واقعہ کو بدنیّتی سے جان بوجھ کر نئے سرے سے فورسز اور افواج پاکِستان کو بدنام کرنے کی غرض سے پھیلایا جو ایک گھناوٴنی سازش ہے۔
انہوں نے کہا کہ ایئرپورٹس سیکورٹی فورس میں افواج پاکستان کی طرز پر احتساب کا بِلا تخصیص کڑا نِظام رائج ہے، جِس سے کوئی بھی بالا تر نہیں۔
اسلام آباد : اے ایس ایف اہلکاروں نے اسلام آباد ایئرپورٹ پر قومی ہیروز سے ناروا سلوک کرتے ہوئے انٹر نیشنل ایونٹ میں جانے والی10پن بولنگ ٹیم سے بالز قبضے میں لے لیں، کھلاڑیوں نے وزیر کھیل سے نوٹس لینے کا مطالبہ کردیا۔
تفصیلات کے مطابق پاکستان کی ٹین پن بولنگ ٹیم ورلڈ ٹوور چیمپئن شپ میں شرکت کے لیے بنکاک جارہی تھی کہ اسلام آباد ائیرپورٹ عملے نے دوران چیکنگ بولنگ ٹیم سے ان کی بالز قبضے میں لے لیں۔
کھلاڑی نے سیکیورٹی عملے سے سوال کیا کہ بغیر بالز کے چیمپئن شپ میں کیسے کھیلیں گے؟ بالز ہمارا ہتھیار ہےاس کے بغیر ایونٹ میں جانا بےمقصد ہے، جس پر اےایس ایف اہلکاروں کا جواب تھا کہ بالز لے جانے کی اجازت نہیں ہے۔
کھلاڑی ایئرپورٹ عملے کےسامنے بےبس ہوگئے، اب ان بالز کو کارگو سے بھجوانا پڑے گا، ایئرپورٹ عملے کی ہٹ دھرمی کے باعث ٹیم ممبر اعجازالرحمان کی فلائٹ مس ہو گئی۔
اعجازالرحمان نے کہا کہ ہم انٹر نیشنل ایونٹ میں شرکت کے لئےاین اوسی لے چکے ہیں، ہمارے ساتھ پیش آئے واقعے کا وزیرکھیل نوٹس لیں، یاد رہے کہ ورلڈ ٹوور چیمپئن شپ22سے 28ستمبر تک بنکاک میں کھیلی جائےگی۔
ورلڈ ٹووربالنگ چیمپین شپ میں پاکستان کی آٹھ رکنی ٹیم شرکت کرے گی، کھلاڑیوں میں اعجاز الرحمن، علی سوریا، سکندر حیات، ثاقب شہزاد، افضل اختر اور علیم آغا شامل ہیں،۔
