کراچی: سیشن عدالت ملیر نے ناظم جوکھیو قتل کیس میں پیپلزپارٹی کے ایم پی اے جام اویس سمیت دیگر ملزمان کو بری کردیا۔
تفصیلات کے مطابق سیشن عدالت ملیر میں ناظم جوکھیو قتل کیس کی سماعت ہوئی،سماعت میں عدالت نے ملزمان کی مقتول کے ورثا سے صلح کی درخواستوں پر محفوظ فیصلہ سنایا۔
فیصلے میں پیپلزپارٹی کے ایم پی اے جام اویس سمیت دیگر ملزمان کو بری کرتے ہوئے رہا کرنے کا حکم دیا۔
فرسٹ ایڈیشنل سیشن جج ملیر کی عدالت نے ناظم جوکھیو قتل کیس میں رکن سندھ اسمبلی جام اویس گہرام کی صلح نامے کی درخواست منظور کرلی ہے جب کہ دو ملزمان کی صلح نامے کی درخواست مسترد کردی۔
عدالت نے کہا کہ دو ملزمان پر اغوا کا الزام ہے، اس لیے ان کی صلح کی درخواست مسترد کی جاتی ہے۔
عدالت نے اپنے فیصلے میں کہا کہ جام اویس گہرام، معراج جوکھیو اور احمد خان کی صلح کی درخواست منظور کی گئی ہے جب کہ ملزمان دودو خان اور سومار کو قتل کے الزام سے رہا کیا جاتا ہے۔
فیصلے میں کہا گیا کہ دو ملزمان پر مقتول کے اغو اکا مقدمہ چلے گا۔
مقدمے کے ایک ملزم سلیم سالار نے صلح نامے کی بنیاد پر کیس سے رہا ہونے سے انکار کرتے ہوئے کہا تھا کہ میرا اس کیس میں کوئی کردار نہیں ہے، صلح نامے کی بنیاد پر رہا نہیں ہوسکتا۔
واضح رہے کہ ناظم جوکھیو کو نومبر 2022 میں تشدد کرکے قتل کردیا گیا تھا، رکن قومی اسمبلی جام کریم کے خلاف پولیس نے ناکافی شواہد کی بنیاد پر پہلے ہی مقدمہ ختم کردیا تھا۔
امکان ہے کہ آج ایم پی اے جام اویس گہرام سمیت دیگر ملزمان کو ملیر جیل سے رہا کیا جائے۔
