Tag: ناقابل ضمانت وارنٹ گرفتاری

اسلام آباد : انسداد دہشت گردی عدالت نے وزیراعلیٰ کے پی علی امین گنڈا پور کے ناقابل ضمانت وارنٹ گرفتاری منسوخ کردیے۔

تفصیلات کے مطابق وزیراعلیٰ کے پی علی امین گنڈا پور  نے تھانہ آئی نائن میں درج مقدمے میں انسداد دہشت گردی عدالت کی جانب سے جاری ناقابل ضمانت وارنٹ گرفتاری منسوخ کرنے کے لیے درخواست دی۔

درخواست میں کہا گیا کہ مصروفیات کی وجہ سے عدالت حاضر نہیں ہوسکا، عدالت کے سامنے سرنڈر کرتا ہوں، جس کے بعد عدالت نے وزیراعلیٰ کے پی کے ناقابل ضمانت وارنٹ گرفتاری منسوخ کردیے۔

خیال رہے عدالت نے مسلسل غیرحاضری پر ناقابل ضمانت وارنٹ گرفتاری جاری کئے تھے۔

دوسری جانب وزیر اعلیٰ خیبر پختونخوا جوڈیشل کمپلیکس توڑ پھوڑ کیس میں انسداد دہشت گردی عدالت میں پیش ہوئے۔

جج طاہر عباس سپرا نے کہا عمر ایوب ، شبلی فراز ، علی امین ، محمد عاصم ، اور علی نواز اعوان اس کیس میں اشتہاری ہیں، جس پر وکیل راجہ ظہور الحسن نے بتایا کہ وزیراعلیٰ کے پی چار اپریل 2023 کو گرفتار ہوئے، پولیس نے جوڈیشل کمپلیکس توڑ پھوڑ کیس میں کیوں گرفتار نہیں کیا، پولیس نے بدنیتی کی وجہ سے جوڈیشل کمپلیکس توڑ پھوڑ کیس میں گرفتاری نہیں ڈالی۔

وکیل کا مزید کہنا تھا کہ پولیس کو تمام کیسز کا علم تھا پولیس کو اگر علی امین مطلوب ہوتے تو وہ گرفتاری ڈال لیتی، اسلام آباد ہائیکورٹ کے زریعے ان کے تمام کیسز کی فہرست مانگی جس میں اس کیس کا پتہ چلا۔

جج طاہر عباس سپرا نے کہا عدالت نے تو وزیراعلیٰ کے پی کو اشتہاری قرار دیا وہ آرڈر تو موجود ہے ، اگر عدالت نے غلط طور پر اشتہاری قرار دیا تو کیا اس آڈر کو چیلنج کیا گیا، اشتہاری ضمانت قبل از گرفتاری کی درخواست کیسے منظور کی جاسکتی گھر بیٹھ کر یہ نہیں کہا جاسکتا کہ بدنیتی پر مقدمہ بنایا گیا ہم پیش نہیں ہونگے۔

راجہ ظہور الحسن نے مزید کہا علی امین گرفتار تھے تو وہ اشتہاری کیسے ہوسکتے ہیں، وزیر اعلیٰ کو عدالت ابلانے کا کوئی شوق نہیں مگر کیس کی سماعت تو کرنی ہے ، جس پر جج طاہر عباس سپرا نے کہا عدالت کو کوئی ججمنٹ دے دیں کہ ضمانت قبل از گرفتاری میں اشتہاری ہونے کی کوئی حیثیت نہیں، وکلا عدالت کو ملزمان کے اشتہاری ہونے سے متعلق مطمئن کریں۔

وزیراعلیٰ کے پی نے عدالت سے استدعا کی کہ محرم کے بعد سماعت رکھ لیں، جس پر عدالت نے درخواستوں پر سماعت 29 جولائی تک ملتوی کردی۔

لاہور: سیشن عدالت نے رشوت لینے، دینے اور اعانت جرم کے مقدمے میں مونس الٰہی کے ناقابل ضمانت وارنٹ گرفتاری جاری کر دئیے ہیں۔

تفصیلات کے مطابق لاہور کی سیشن عدالت میں ایف آئی اے کی جانب سے مونس الٰہی کے دائمی وارنٹ گرفتاری کے لیے درخواست دائر کی گئی۔

ایف آئی اے نے درخواست میں موقف اختیار کیا کہ ملزم کو شامل تفتیش کرنے کی کوشش کی گئی ، اطلاع کے لیے ملزم کے گھر، شارع عام اور احاطہ عدالت میں اشتہار چسپاں کیے گئے۔

ایف آئی اے کا کہنا تھا کہ ملزم دیدہ دانستہ طور پر روپوش ہے، ملزم شامل تفتیش ہونے سے گریزاں ہے، عدالت سے استدعا ہے کہ ملزم مونس الٰہی اور شریک ملزم عامر سہیل کے دائمی وارنٹ گرفتاری جاری کیے جائیں۔

جس پر عدالت نے مونس الٰہی کے ناقابل ضمانت وارنٹ گرفتاری جاری کر دئیے۔

اس سے قبل عدالت نے منی لانڈرنگ اور کرپشن سرکل کے مقدمے میں ملوث سابق وفاقی وزیر مونس الہٰی کو اشتہاری قرار دیا تھا جبکہ عدالت نے مونس الٰہی کا شناختی کارڈ، پاسپورٹ، بینک اکاؤنٹ، تمام جائیداد کے منجمد ہونے کی کارروائی کا آغاز کردیا ہے۔

عدالت نے پاسپورٹ، شناختی کارڈ اور رہائش گاہ کا درست ایڈریس سمیت مونس الہٰی کی ٹریول ہسٹری، بینک اکاؤنٹس کی تفصیلات طلب کرلیں۔