کراچی میں بے لگام ڈاکو دکاندار سے رات گئے 15 لاکھ روپے لوٹ کر فرار ہو گئے۔
تفصیلات کے مطابق کراچی میں ناگن چورنگی صدیق اکبر مسجد کے قریب شہری سے پندرہ لاکھ روپے چھین لئے گئے، ڈاکو جاتے جاتے شہری کو مزاحمت پر ٹانگ پر گولی بھی مار گئے۔
پولیس کے مطابق واردات ایک موٹرسائیکل پر سوار تین ملزمان نے کی، شہری کمیونیکیشن کی دکان کا مالک ہے وہ رات دکان بند کر کے واپس گھر لوٹ رہا تھا۔
دوسری جانب راولپنڈی کے مختلف علاقوں میں وارداتوں میں شہری 12 موٹر سائیکلوں، طلائی زیورات، موبائل فونز، نقدی اور دیگر اشیاء سے محروم ہوگئے، ڈاکوؤں نے 11 افراد سے جھپٹا مار کر ان کے موبائل چھین لئے گئے۔
اس کے علاوہ اسلام آباد کے مختلف علاقوں میں بھی 17 وارداتوں میں شہری 2 گاڑیوں 7 موٹر سائیکلوں، موبائل فونز اور نقدی وغیرہ سے محروم ہوگئے، تھانہ ترنول اور کھنہ کے علاقوں سے گن پوائنٹ پر موٹرسائیکل چھین لئے گئے۔
