نجم سیٹھی پاکستان بھارت کا میچ بارش کی نذر ہونے پر اے سی سی پر برہم ہوگئے اور اس کے غلط فیصلے کی نشاندہی بھی کردی۔
سابق سربراہ پاکستان کرکٹ بورڈ نے ٹوئٹر پر ایک پوسٹ شیئر کی ہے جس میں انھوں نے کرکٹ کے سب سے بڑے مقابلے کے یوں بے نتیجہ ختم ہونے پر اپنے جذبات کا اظہار کرتے ہوئے کہا ہے کہ انھوں نے پہلے ہی اے سی سی سے میچز متحدہ عرب امارت میں رکھنے کی سفارش کی تھی۔
نجم سیٹھی نے سوشل میڈیا پوسٹ میں کہا کہ یہ مایوس کن ہے کہ کرکٹ کا سب سے بڑا میچ یوں بارش سے متاثر ہو، ان دنوں میں سری لنکا میں برسات ہوتی ہے۔
انھوں نے کہا کہ ’’ پی سی بی کے سربراہ کے طور پر اے سی سی پر زور دیا تھا کہ ایشیا کپ کے میچز یو اے ای میں رکھیں تاہم سری لنکا کو ایونٹ دینے کے لیے مختلف بہانے بنائےگئے، یہ کہا گیا کہ یو اے ای میں گرمی ہوگی۔‘‘
سابق پی سی بی سربراہ نے نشاندہی کرتے ہوئے کہا کہ متحدہ عرب امارات میں ویسا ہی موسم ہوتا ہے جیسا ماضی میں کھیلے گئے ایشیا کپ اور آئی پی ایل کے دوران تھا، کھیلوں پر سیاست کو ترجیح دینا ناقابل معافی عمل ہے۔
How disappointing! Rain mars the greatest contest in cricket. But this was forecast. As PCB Chair, I urged the ACC to play in UAE but poor excuses were made to accommodate Sri Lanka. Too hot in Dubai, they said. But it was as hot when the Asia Cup was played there last time in…
— Najam Sethi (@najamsethi) September 2, 2023
واضح رہے کہ پاکستان اور بھارت کا ہائی وولٹیج میچ بارش کے باعث بے نتیجہ ختم ہوگیا جس کے باعث شائقین کو مایوسی کا سامنا کرنا پڑا۔
بھارت نے پہلے کھیلتے ہوئے اپنی تمام وکٹیں کھو کر 266 رنز اسکور کیے تھے، شاہین نے عمدہ بولنگ کرتے ہوئے پھر سے بھارتی ٹاپ آرڈر کو پویلین بھیجنے میں اہم کردار ادا کیا اور 4 وکٹیں حاصل کی تھیں، تاہم بارش کے باعث پاکستان کی بیٹنگ نہ آسکی اور دنوں ٹیموں کو ایک ایک پوائنٹ دے دیا گیا۔
